2. сиримиттаттхерага̄тха̄ван̣н̣ана̄

аккодханотиа̄дика̄ а̄йасмато сиримиттаттхерасса га̄тха̄. ка̄ уппатти? айампи пуримабуддхесу ката̄дхика̄ро таттха таттха бхаве виват̣т̣ӯпаниссайам̣ кусалам̣ упачинитва̄ имасмим̣ буддхуппа̄де ра̄джагахе махаддханакут̣умбикасса путто хутва̄ ниббатти, сиримиттоти ладдхана̄мо. тасса кира ма̄та̄ сиригуттасса бхагинӣ. тасса ваттху дхаммападаван̣н̣ана̄йам̣ (дха. па. ат̣т̣ха. 1.гарахадиннаваттху) а̄гатамева. со сиригуттасса бха̄гинеййо сиримитто вайаппатто саттху дханапа̄ладамане ладдхаппаса̄до паббаджитва̄ випассана̄йа каммам̣ каронто начирассева арахаттам̣ патто. екадивасам̣ па̄тимоккхам̣ уддиситум̣ а̄санам̣ абхирухитва̄ читтабӣджаним̣ гахетва̄ нисинно бхиккхӯнам̣ дхаммам̣ катхеси. катхенто ча ул̣а̄ратаре гун̣е вибхаджитва̄ дассенто –

502. ‘‘аккодханонупана̄хӣ, ама̄йо риттапесун̣о;

са ве та̄дисако бхиккху, евам̣ печча на сочати.

503. ‘‘аккодханонупана̄хӣ, ама̄йо риттапесун̣о;

гуттадва̄ро сада̄ бхиккху, евам̣ печча на сочати.

504. ‘‘аккодханонупана̄хӣ, ама̄йо риттапесун̣о;

калйа̄н̣асӣло со бхиккху, евам̣ печча на сочати.

505. ‘‘аккодханонупана̄хӣ, ама̄йо риттапесун̣о;

калйа̄н̣амитто со бхиккху, евам̣ печча на сочати.

506. ‘‘аккодханонупана̄хӣ, ама̄йо риттапесун̣о;

калйа̄н̣апан̃н̃о со бхиккху, евам̣ печча на сочати.

507. ‘‘йасса саддха̄ татха̄гате, ачала̄ суппатит̣т̣хита̄;

сӣлан̃ча йасса калйа̄н̣ам̣, арийакантам̣ пасам̣ситам̣.

508. ‘‘сан̇гхе паса̄до йассаттхи, уджубхӯтан̃ча дассанам̣;

адалиддоти там̣ а̄ху, амогхам̣ тасса джӣвитам̣.

509. ‘‘тасма̄ саддхан̃ча сӣлан̃ча, паса̄дам̣ дхаммадассанам̣;

ануйун̃джетха медха̄вӣ, сарам̣ буддха̄на са̄сана’’нти. – има̄ га̄тха̄ абха̄си;

таттха аккодханоти акуджджханасӣло. упат̣т̣хите хи кодхуппаттинимитте адхива̄санакхантийам̣ т̣хатва̄ копасса ануппа̄дако. анупана̄хӣти на упана̄хако, парехи катам̣ апара̄дхам̣ пат̣ичча ‘‘аккоччхи мам̣ авадхи мам̣, аджини мам̣ аха̄си ме’’тиа̄дина̄ (дха. па. 3; маха̄ва. 464; ма. ни. 3.237) кодхасса анупанайханасӣло. сантадосапат̣иччха̄даналаккхан̣а̄йа ма̄йа̄йа абха̄вато ама̄йо. писун̣ава̄ча̄вирахитато риттапесун̣о, са ве та̄дисако бхиккхӯти со татха̄рӯпо татха̄джа̄тико йатха̄вуттагун̣асаманна̄гато бхиккху. евам̣ йатха̄вуттапат̣ипаттийа̄ печча паралоке на сочати соканимиттасса абха̄вато. чаккхудва̄ра̄дайо ка̄йадва̄ра̄дайо ча гутта̄ пихита̄ сам̣вута̄ етасса̄ти гуттадва̄ро. калйа̄н̣асӣлоти сундарасӣло сувисуддхасӣло. калйа̄н̣амиттоти –

‘‘пийо гарубха̄ванийо, ватта̄ ча вачанаккхамо;

гамбхӣран̃ча катхам̣ катта̄, но чат̣т̣ха̄не нийоджайе’’ти. (а. ни. 7.37) –

евам̣ вибха̄виталаккхан̣о калйа̄н̣амитто етасса̄ти калйа̄н̣амитто. калйа̄н̣апан̃н̃оти сундарапан̃н̃о. йадипи пан̃н̃а̄ на̄ма асундара̄ наттхи, ниййа̄ника̄йа пана пан̃н̃а̄йа васена евам̣ вуттам̣

еваметтха кодха̄дӣнам̣ виккхамбханавасена самуччхедавасена ча аккодхана̄димукхена, пуггала̄дхит̣т̣ха̄на̄йа га̄тха̄йа самма̄пат̣ипаттим̣ дассетва̄ ида̄ни ниппхаттиталокуттарасаддха̄дике уддхаритва̄ пуггала̄дхит̣т̣ха̄на̄йа ева га̄тха̄йа самма̄пат̣ипаттим̣ дассенто ‘‘йасса саддха̄’’тиа̄дима̄ха. тассаттхо – йасса пуггаласса татха̄гате самма̄самбуддхе ‘‘итипи со бхагава̄’’тиа̄динайаппаватта̄ маггена̄гатасаддха̄, тато ева ачала̄ авикампа̄ сут̣т̣ху патит̣т̣хита̄. ‘‘аттхӣ’’ти, падам̣ а̄нетва̄ самбандхитаббам̣. арийакантанти арийа̄нам̣ кантам̣ пийа̄йитам̣ бхавантарепи авиджаханато. пасам̣ситанти буддха̄дӣхи пасат̣т̣хам̣, ван̣н̣итам̣ тхомитам̣ аттхӣти йоджана̄. там̣ панетам̣ сӣлам̣ гахат̣т̣хасӣлам̣ паббаджитасӣланти дувидхам̣. таттха гахат̣т̣хасӣлам̣ на̄ма пан̃часиккха̄падасӣлам̣, йам̣ гахат̣т̣хена раккхитум̣ сакка̄. паббаджитасӣлам̣ на̄ма дасасиккха̄падасӣлам̣ упа̄да̄йа саббам̣ чатупа̄рисуддхисӣлам̣, тайидам̣ саббампи акхан̣д̣а̄дибха̄вена апара̄мат̣т̣хата̄йа ‘‘калйа̄н̣а’’нти ведитаббам̣.

сан̇гхе паса̄до йассаттхӣти ‘‘суппат̣ипанно бхагавато са̄вакасан̇гхо’’тиа̄дина̄ арийасан̇гхе паса̄до саддха̄ йасса пуггаласса аттхи ачало суппатит̣т̣хитоти а̄нетва̄ йоджетаббам̣. уджубхӯтан̃ча дассананти дит̣т̣хиван̇ка̄бха̄вато килесаван̇ка̄бха̄вато ча уджубхӯтам̣. акут̣илам̣ аджимхам̣ каммассаката̄дассанан̃чева саппаччайана̄марӯпадассанан̃ча̄ти дувидхампи дассанам̣ йасса аттхи ачалам̣ суппатит̣т̣хитанти йоджана̄. адалиддоти там̣ а̄ху саддха̄дханам̣, сӣладханам̣, сутадханам̣, ча̄гадханам̣, пан̃н̃а̄дхананти имесам̣ сувисуддха̄нам̣ дхана̄нам̣ аттхита̄йа ‘‘адалиддо’’ти там̣ та̄дисам̣ пуггалам̣ буддха̄дайо арийа̄ а̄ху. амогхам̣ тасса джӣвитам̣ тасса татха̄рӯпасса джӣвитам̣ дит̣т̣хадхаммика̄диаттха̄дхигамена амогхам̣ аван̃джхам̣ сапхаламева̄ти а̄хӯти аттхо.

тасма̄ти, йасма̄ йатха̄вуттасаддха̄дигун̣асаманна̄гато пуггало ‘‘адалиддо амогхаджӣвито’’ти вуччати, тасма̄ ахампи татха̄рӯпо бхавеййанти. саддхан̃ча…пе… са̄сананти ‘‘саббапа̄пасса акаран̣а’’нтиа̄дина̄ (дха. па. 183; дӣ. ни. 2.90) вуттам̣ буддха̄нам̣ са̄санам̣ ануссаранто кулапутто вуттаппабхедам̣ саддхан̃чева сӣлан̃ча дхаммадассанахетукам̣ дхамме суниччхайа̄ вимоккхабхӯтам̣ паса̄дан̃ча ануйун̃джеййа вад̣д̣хеййа̄ти.

евам̣ тхеро бхиккхӯнам̣ дхаммадесана̄мукхена аттани виджджама̄не гун̣е пака̄сенто ан̃н̃ам̣ бйа̄ка̄си.

сиримиттаттхерага̄тха̄ван̣н̣ана̄ нит̣т̣хита̄.