12. брахмадаттаттхерага̄тха̄ван̣н̣ана̄

аккодхасса̄тиа̄дика̄ а̄йасмато брахмадаттаттхерасса га̄тха̄. ка̄ уппатти? айампи пуримабуддхесу ката̄дхика̄ро таттха таттха бхаве пун̃н̃а̄ни упачинитва̄ имасмим̣ буддхуппа̄де са̄ваттхийам̣ косаларан̃н̃о путто хутва̄ ниббатти, брахмадаттотисса на̄мам̣ ахоси. со вайаппатто джетаванамахе буддха̄нубха̄вам̣ дисва̄ пат̣иладдхасаддхо паббаджитва̄ випассана̄йа каммам̣ каронто саха пат̣исамбхида̄хи чхал̣абхин̃н̃о ахоси. там̣ екадивасам̣ нагаре пин̣д̣а̄йа чарантам̣ ан̃н̃атаро бра̄хман̣о аккоси. тхеро там̣ сутва̄пи тун̣хӣбхӯто пин̣д̣а̄йа чаратийева, бра̄хман̣о пунапи аккосийева. манусса̄ евам̣ аккосантампи нам̣ ‘‘айам̣ тхеро на кин̃чи бхан̣атӣ’’ти а̄хам̣су. там̣ сутва̄ тхеро тесам̣ манусса̄нам̣ дхаммам̣ десенто –

441. ‘‘аккодхасса куто кодхо, дантасса самаджӣвино;

саммадан̃н̃а̄ вимуттасса, упасантасса та̄дино.

442. ‘‘тассева тена па̄пийо, йо куддхам̣ пат̣икуджджхати;

куддхам̣ аппат̣икуджджханто, сан̇га̄мам̣ джети дуджджайам̣.

443. ‘‘убхиннаматтхам̣ чарати, аттано ча парасса ча;

парам̣ сан̇купитам̣ н̃атва̄, йо сато упасаммати.

444. ‘‘убхиннам̣ тикиччхантам̣ там̣, аттано ча парасса ча;

джана̄ ман̃н̃анти ба̄лоти, йе дхаммасса аковида̄. (сам̣. ни. 1.189);

445. ‘‘уппадждже те саче кодхо, а̄ваджджа какачӯпамам̣;

уппадждже че расе тан̣ха̄, путтамам̣сӯпамам̣ сара.

446. ‘‘саче дха̄вати читтам̣ те, ка̄месу ча бхавесу ча;

кхиппам̣ нигган̣ха сатийа̄, кит̣т̣ха̄дам̣ вийа дуппасу’’нти. –

има̄ га̄тха̄ абха̄си.

таттха аккодхасса̄ти кодхарахитасса маггена самуччхиннакодхасса. куто кодхоти куто на̄ма хету кодхо уппаджджеййа, тасса уппаттика̄ран̣ам̣ наттхӣти аттхо. дантасса̄ти уттамена дамена аггамаггадаматхена дантасса. самаджӣвиноти ка̄йависама̄дӣни саббасо паха̄йа ка̄йасама̄дӣнам̣ васена самам̣ джӣвантасса саттат̣т̣ха̄нийена сампаджан̃н̃ена саммадева ваттантасса. саммадан̃н̃а̄ вимуттасса̄ти самма̄ ан̃н̃а̄йа абхин̃н̃еййа̄дике дхамме джа̄нитва̄ сабба̄савехи виппамуттасса. тато ева саббакилесадаратхапарил̣а̄хавӯпасамена упасантасса. ит̣т̣ха̄дӣсу та̄дилаккхан̣аппаттийа̄ та̄дино кхӣн̣а̄савасса куто кодхоти ан̃н̃а̄падесена тхеро аттано кодха̄бха̄вам̣ тасса ча ка̄ран̣а̄ни ватва̄ ида̄ни кодхе акодхе ча а̄дӣнава̄нисам̣садассанена дхаммам̣ катхенто ‘‘тассева̄’’тиа̄дима̄ха. таттха йо куддхам̣ пат̣икуджджхатӣти йо пуггало аттано упари куддхам̣ купитам̣ пуггалам̣ пат̣икуджджхати, тассева тена пат̣икуджджханапаччаккосанапат̣иппахаран̣а̄дина̄ па̄пийо идхалоке вин̃н̃ӯгараха̄дивасена паралоке нирайадуккха̄дивасена абхаддакатарам̣ акалйа̄н̣атарам̣ хоти. куджджханена пана акуддхасса па̄пам̣ хотӣти ваттаббамева наттхи. кечи пана ‘‘йо акуддхам̣ пат̣икуддхам̣ а̄раббха куджджхатӣ’’ти аттхам̣ ваданти. куддхам̣ аппат̣икуджджхантоти йо пана куддхам̣ пуггалам̣ ‘‘айам̣ куддхо кодхапарето’’ти н̃атва̄ на пат̣икуджджхати кхамати, со дуджджайам̣ килесасан̇га̄мам̣ джети на̄ма. на кевалан̃часса килесасан̇га̄маджайо ева, атха кхо убхайахитапат̣ипаттимпӣти дассенто а̄ха ‘‘убхиннаматтхам̣…пе… упасамматӣ’’ти. йо парам̣ пуггалам̣ сан̇купитам̣ куддхам̣ ‘‘кодхапарето’’ти н̃атва̄ там̣ метта̄йанто аджджхупеккханто ва̄ сато сампаджа̄но хутва̄ упасаммати кхамати на пат̣иппхарати. со аттано ча парасса ча̄ти убхиннам̣ убхайалокасукха̄вахам̣ аттхам̣ хитам̣ чарати.

убхиннам̣ тикиччхантам̣ танти там̣ аттано ча парасса ча̄ти убхиннам̣ двиннам̣ кодхабйа̄дхитикиччха̄йа тикиччхантам̣ кхамантам̣ пуггалам̣ йе джана̄ дхаммасса арийа̄ча̄радхамме акусала̄, те ба̄ла̄ ‘‘айам̣ авиддасу йо атта̄нам̣ аккосантасса пахарантасса кин̃чи на каротӣ’’ти ман̃н̃анти, там̣ тесам̣ айонисо ман̃н̃ананти адхиппа̄йо. ‘‘тикиччхана’’нтипи пат̣ханти, тикиччханасабха̄ванти аттхо.

евам̣ тхерена вуччама̄нам̣ дхаммам̣ сутва̄ аккосакабра̄хман̣о сам̣вигго пасанначитто ча хутва̄ тхерам̣ кхама̄петва̄ тассева сантике паббаджи. тхеро тасса каммат̣т̣ха̄нам̣ денто ‘‘имасса метта̄бха̄вана̄ йутта̄’’ти метта̄каммат̣т̣ха̄нам̣ датва̄ кодхапарийут̣т̣ха̄на̄дӣсу паччавеккхан̣а̄дивидхим̣ дассенто ‘‘уппадждже те’’тиа̄дима̄ха. таттха уппадждже те сачети саче те каммат̣т̣ха̄нам̣ ануйун̃джантасса кан̃чи пуггалам̣ нисса̄йа чирапаричайо кодхо уппаджджеййа, тасса вӯпасама̄йа –

‘‘убхатодан̣д̣акена чепи, бхиккхаве, какачена чора̄ очарака̄ ан̇гаман̇га̄ни окантеййум̣, татра̄пи йо мано падӯсеййа, на ме со тена са̄санакаро’’ти (ма. ни. 1.232) –

саттха̄ра̄ вуттам̣ какачӯпамам̣ ова̄дам̣ а̄ваджджехи. уппадждже че расе тан̣ха̄ти саче те мадхура̄дибхеде расе тан̣ха̄ абхила̄со уппаджджеййа, тасса вӯпасама̄йа –

‘‘путтамам̣сам̣ джа̄йампатика̄ йатха̄ канта̄раниттхаран̣аттхамева кха̄дим̣су, на расатан̣ха̄йа евам̣ кулапуттопи паббаджито пин̣д̣апа̄там̣ пат̣исевати…пе… пха̄сувиха̄ро ча̄’’ти (сам̣. ни. 2.63 аттхато сама̄нам̣) –

евам̣ вуттам̣ путтамам̣сӯпамова̄дам̣ сара ануссара.

саче дха̄вати те читтанти айонисо манаси карото тава читтам̣ ка̄месу пан̃чака̄магун̣есу чхандара̄гавасена, ка̄мабхава̄дӣсу бхавесу бхавапаттхана̄васена саче дха̄вати сарати джавати. кхиппам̣ нигган̣ха сатийа̄, кит̣т̣ха̄дам̣ вийа дуппасунти татха̄ дха̄витум̣ аденто йатха̄ на̄ма пурисо кит̣т̣ха̄дам̣ сассакха̄дакам̣ дуппасум̣ дут̣т̣хагон̣ам̣ йоттена тхамбхе бандхитва̄ аттано васе ваттети, евам̣ сатийа̄ сатийоттена самма̄дхитхамбхе бандханто кхиппам̣ сӣгхамева нигган̣ха, йатха̄ килесавигамена ниббисеванам̣ хоти, татха̄ дамехӣти. кечи пана ‘‘тхеро путхуджджанова хутва̄ аккосам̣ адхива̄сенто тесам̣ манусса̄нам̣ арийагун̣е пака̄сенто дхаммам̣ катхетва̄ паччха̄ двӣхи га̄тха̄хи атта̄нам̣ оваданто випассанам̣ вад̣д̣хетва̄ арахаттам̣ патва̄ ан̃н̃ам̣ бйа̄каронто има̄йева га̄тха̄ абха̄сӣ’’ти ваданти.

брахмадаттаттхерага̄тха̄ван̣н̣ана̄ нит̣т̣хита̄.