10. каппат̣акураттхерага̄тха̄ван̣н̣ана̄

айамити каппат̣оти а̄йасмато каппат̣акураттхерасса га̄тха̄. ка̄ уппатти. айампи пуримабуддхесу ката̄дхика̄ро таттха таттха бхаве пун̃н̃а̄ни упачинанто випассисса бхагавато ка̄ле кулагехе ниббаттитва̄ вин̃н̃утам̣ патто екадивасам̣ бхагавантам̣ вината̄йа на̄ма надийа̄ тӣре ан̃н̃атарасмим̣ руккхамӯле нисиннам̣ дисва̄ пасаннама̄насо кетакапуппхехи пӯджам̣ ака̄си. со тена пун̃н̃акаммена девамануссесу сам̣саранто имасмим̣ буддхуппа̄де са̄ваттхийам̣ дуггатакуле ниббаттитва̄ йа̄ва вайаппатти, та̄ва ан̃н̃ам̣ упа̄йам̣ аджа̄нанто каппат̣акхан̣д̣анива̄сано сара̄вахаттхо таттха таттха курам̣ парийесанто вичари, тена каппат̣акуротвева пан̃н̃а̄йиттха. со вайаппатто тин̣ам̣ виккин̣итва̄ джӣвикам̣ каппенто екадивасам̣ тин̣ала̄ванаттхам̣ аран̃н̃ам̣ гато таттха ан̃н̃атарам̣ кхӣн̣а̄саваттхерам̣ дисва̄ там̣ упасан̇камитва̄ вандитва̄ нисӣди. тасса тхеро дхаммам̣ катхеси. со дхаммам̣ сутва̄ пат̣иладдхасаддхо ‘‘ким̣ ме има̄йа киччхаджӣвика̄йа̄’’ти паббаджитва̄ аттано ниваттхакаппат̣ачол̣ам̣ екасмим̣ т̣ха̄не никкхипи. йада̄ часса анабхирати уппаджджати, тада̄ там̣ каппат̣ам̣ олокентасса анабхирати вигаччхати, сам̣вегам̣ пат̣илабхи. евам̣ каронто саттаккхаттум̣ уппаббаджи. тасса там̣ ка̄ран̣ам̣ бхиккхӯ бхагавато а̄рочесум̣. атхекадивасам̣ каппат̣акуро бхиккху дхаммасабха̄йам̣ парисапарийанте нисинно нидда̄йати, там̣ бхагава̄ чоденто –

199. ‘‘айамити каппат̣о каппат̣акуро, аччха̄йа атибхарита̄йа;

аматагхат̣ика̄йам̣ дхаммакат̣аматто, катападам̣ джха̄на̄ни очетум̣.

200. ‘‘ма̄ кхо твам̣ каппат̣а пача̄леси, ма̄ твам̣ упакан̣н̣амхи та̄л̣ессам̣;

на хи твам̣ каппат̣а маттаман̃н̃а̄си, сан̇гхамаджджхамхи пачала̄йама̄но’’ти. –

га̄тха̄двайам̣ абха̄си.

таттха айамити каппат̣о каппат̣акуроти каппат̣акуро бхиккху ‘‘айам̣ мама каппат̣о, имам̣ паридахитва̄ йатха̄ татха̄ джӣва̄мӣ’’ти евам̣ уппаннамиччха̄витакко аччха̄йа атибхарита̄йа аматагхат̣ика̄йам̣ мама аматагхат̣е тахам̣ тахам̣ вассанте ‘‘аматамадхигатам̣ ахамануса̄са̄ми, ахам̣ дхаммам̣ десеми’’ (маха̄ва. 12; ма. ни. 1.286; 2.342). ‘‘андхӣбхӯтасмим̣ локасмим̣, а̄хан̃чхам̣ аматадундубхи’’нтиа̄дина̄ (маха̄ва. 11; ма. ни. 1.285; 2.341) гхосетва̄ майа̄ дхамма̄мате павассийама̄не катападам̣ джха̄на̄ни очетум̣ локийалокуттараджджха̄на̄ни упачетум̣ бха̄ветум̣ катападам̣ кат̣амаггавихитабха̄вана̄маггам̣ идам̣ мама са̄санам̣, татха̄пи дхаммакат̣аматто мама са̄санадхаммато уккан̣т̣хачитто апагатама̄насо каппат̣акуроти там̣ чодетва̄ пунаписса саход̣д̣хам̣ чорам̣ ган̣ханто вийа пама̄давиха̄рам̣ дассенто ‘‘ма̄ кхо твам̣, каппат̣а, пача̄лесӣ’’ти га̄тхама̄ха.

таттха ма̄ кхо твам̣, каппат̣а, пача̄лесӣти твам̣, каппат̣акура, ‘‘мама дхаммам̣ сун̣исса̄мӣ’’ти нисӣдитва̄ ма̄ кхо пача̄леси ма̄ пачала̄хи ма̄ ниддам̣ упагаччхи. ма̄ твам̣ упакан̣н̣амхи та̄л̣ессанти там̣ нидда̄йама̄нам̣ упакан̣н̣амхи кан̣н̣асамӣпе десана̄хаттхена ахам̣ ма̄ пата̄л̣ессам̣. йатха̄ ито парам̣ килесаппаха̄на̄йа ахам̣ там̣ на овадеййам̣, татха̄ пат̣ипаджджа̄хӣти аттхо. на хи твам̣, каппат̣а, маттаман̃н̃а̄сӣти твам̣, каппат̣а, сан̇гхамаджджхамхи пачала̄йама̄но маттам̣ пама̄н̣ам̣ на ва̄ ман̃н̃аси, ‘‘айаматидуллабхо кхан̣о пат̣иладдхо, со ма̄ упаджджхага̄’’ти еттакампи на джа̄на̄си, пасса йа̄ва ча те апараддханти чодеси.

евам̣ бхагавата̄ двӣхи га̄тха̄хи га̄л̣хам̣ там̣ ниггайха чодана̄йа ката̄йа ат̣т̣хиведхавиддхо вийа чан̣д̣агаджо маггам̣ отаранто вийа ча сан̃джа̄тасам̣вего випассанам̣ пат̣т̣хапетва̄ начирассева арахаттам̣ па̄пун̣и. тена вуттам̣ апада̄не (апа. тхера 2.52.17-22) –

‘‘вината̄надийа̄ тӣре, виха̄си пурисуттамо;

аддасам̣ вираджам̣ буддхам̣, екаггам̣ сусама̄хитам̣.

‘‘мадхугандхасса пуппхена, кетакасса ахам̣ тада̄;

пасанначитто сумано, буддхасет̣т̣хамапӯджайим̣.

‘‘еканавутито каппе, йам̣ пуппхамабхипӯджайим̣;

дуггатим̣ на̄бхиджа̄на̄ми, буддхапӯджа̄йидам̣ пхалам̣.

‘‘килеса̄ джха̄пита̄ майхам̣…пе… катам̣ буддхасса са̄сана’’нти.

арахаттам̣ пана патва̄ саттха̄ра̄ вуттага̄тха̄двайамева аттано арахатта̄дхигаманасса ан̇кусабхӯтанти паччуда̄ха̄си. тенасса тадева ан̃н̃а̄бйа̄каран̣ам̣ ахосӣти.

каппат̣акураттхерага̄тха̄ван̣н̣ана̄ нит̣т̣хита̄.

чатуттхаваггаван̣н̣ана̄ нит̣т̣хита̄.