7. нандакаттхерага̄тха̄ван̣н̣ана̄

йатха̄пи бхаддо а̄джан̃н̃оти а̄йасмато нандакаттхерасса га̄тха̄. ка̄ уппатти? айампи пуримабуддхесу ката̄дхика̄ро таттха таттха бхаве пун̃н̃а̄ни каронто сикхисса бхагавато ка̄ле паччантадесе уппаджджитва̄ вин̃н̃утам̣ патто ванача̄рико хутва̄ вичаранто екадивасам̣ саттху чан̇каманат̣т̣ха̄нам̣ дисва̄ пасанначитто ва̄лука̄ окири. со тена пун̃н̃акаммена девамануссесу сам̣саранто имасмим̣ буддхуппа̄де чампа̄йам̣ гахапатикуле ниббатти, тасса нандакоти на̄мам̣ акам̣су. джет̣т̣хакабха̄та̄ панасса бхарато на̄ма. тасса пуббайого анантараваттхусмим̣ а̄вибхависсати. те убхопи вин̃н̃утам̣ патва̄ а̄йасмантам̣ сон̣ам̣ кол̣ивисам̣ паббаджитам̣ сутва̄ ‘‘сон̣опи на̄ма татха̄сукхума̄ло паббаджи, киман̇гам̣ пана майа’’нти паббаджим̣су. тесу бхарато начирассева випассанам̣ вад̣д̣хетва̄ чхал̣абхин̃н̃о ахоси. нандако пана килеса̄нам̣ балавабха̄вена та̄ва випассанам̣ уссукка̄петум̣ на̄саккхи, випассана̄йа каммам̣ кароти ева. атхасса бхарататтхеро а̄сайам̣ н̃атва̄ авассайо бхавитука̄мо там̣ паччха̄саман̣ам̣ катва̄ виха̄рато никкхамитва̄ маггасамӣпе нисинно випассана̄катхам̣ катхеси.

тена ча самайена сакат̣асаттхе гаччханте еко сакат̣е йутто гон̣о чиккхаллат̣т̣ха̄не сакат̣ам̣ уддхаритум̣ асакконто парипати. тато нам̣ саттхава̄хо сакат̣а̄ мочетва̄ тин̣ан̃ча па̄нӣйан̃ча датва̄ париссамам̣ апанетва̄ пуна дхуре йоджеси. тато гон̣о вӯпасантапариссамо ладдхабало там̣ сакат̣ам̣ чиккхаллат̣т̣ха̄нато уддхаритва̄ тхале патит̣т̣ха̄песи. атха бхарататтхеро нандакасса ‘‘пассаси но твам̣, а̄вусо нандака, имасса камма’’нти там̣ нидассетва̄ тена ‘‘пасса̄мӣ’’ти вутте ‘‘имаматтхам̣ сут̣т̣ху упадха̄рехӣ’’ти а̄ха. итаро ‘‘йатха̄йам̣ гон̣о вӯпасантапариссамо пан̇кат̣т̣ха̄нато бха̄рам̣ уббахати, евам̣ майа̄пи сам̣са̄рапан̇като атта̄ уддхаритаббо’’ти тамева̄рамман̣ам̣ катва̄ випассана̄йа каммам̣ каронто начирассева арахаттам̣ па̄пун̣и. тена вуттам̣ апада̄не (апа. тхера 2.48.90-95) –

‘‘мигалуддо пуре а̄сим̣, аран̃н̃е ка̄нане ахам̣;

ва̄тамигам̣ гавесанто, чан̇камам̣ аддасам̣ ахам̣.

‘‘уччхан̇гена пулинам̣ гайха, чан̇каме окирим̣ ахам̣;

пасанначитто сумано, сугатасса сирӣмато.

‘‘екатим̣се ито каппе, пулинам̣ окирим̣ ахам̣;

дуггатим̣ на̄бхиджа̄на̄ми, пулинасса идам̣ пхалам̣.

‘‘килеса̄ джха̄пита̄ майхам̣…пе… катам̣ буддхасса са̄сана’’нти.

арахаттам̣ пана патва̄ аттано джет̣т̣хабха̄тикасса бхарататтхерасса сантике ан̃н̃ам̣ бйа̄каронто –

173. ‘‘йатха̄пи бхаддо а̄джан̃н̃о, кхалитва̄ патитит̣т̣хати;

бхиййо ладдха̄на сам̣вегам̣, адӣно вахате дхурам̣.

174. ‘‘евам̣ дассанасампаннам̣, самма̄самбуддхаса̄вакам̣;

а̄джа̄нӣйам̣ мам̣ дха̄ретха, путтам̣ буддхасса ораса’’нти. – га̄тха̄двайам̣ абха̄си;

таттха бхиййо ладдха̄на сам̣вегам̣, адӣно вахате дхуранти ‘‘майхам̣ джа̄тибалавӣрийа̄нам̣ анануччхавикаметам̣ йадидам̣ а̄гатасса бха̄расса авахана’’нти сам̣вегам̣ лабхитва̄ адӣно адӣнама̄насо алӣначитто. ‘‘алӣно’’ти ва̄ па̄т̣хо, со ева аттхо. бхиййо пунаппунам̣ бхиййосоматта̄йа аттано дхурам̣ бха̄рам̣ вахате уббахати. сесам̣ хет̣т̣ха̄ раман̣ӣйавиха̄риттхерасса га̄тха̄ван̣н̣ана̄йам̣ вуттанайамева.

нандакаттхерага̄тха̄ван̣н̣ана̄ нит̣т̣хита̄.