10. кан̣хадиннаттхерага̄тха̄ван̣н̣ана̄

упа̄сита̄ саппуриса̄ти а̄йасмато кан̣хадиннаттхерасса га̄тха̄. ка̄ уппатти? айампи пуримабуддхесу ката̄дхика̄ро таттха таттха бхаве пун̃н̃а̄ни упачинанто ито чатунавуте каппе кулагехе ниббаттитва̄ вин̃н̃утам̣ патто екадивасам̣ собхитам̣ на̄ма паччекабуддхам̣ дисва̄ пасанначитто пунна̄гапуппхехи пӯджам̣ ака̄си. со тена пун̃н̃акаммена девамануссесу сам̣саранто имасмим̣ буддхуппа̄де ра̄джагахе бра̄хман̣акуле ниббаттитва̄ кан̣хадинноти ладдхана̄мо вайаппатто упаниссайасампаттийа̄ чодийама̄но дхаммасена̄патим̣ упасан̇камитва̄ дхаммам̣ сутва̄ пат̣иладдхасаддхо паббаджитва̄ випассанам̣ вад̣д̣хетва̄ арахаттам̣ па̄пун̣и. тена вуттам̣ апада̄не (апа. тхера 2.48.61-65) –

‘‘собхито на̄ма самбуддхо, читтакӯт̣е васӣ тада̄;

гахетва̄ гирипунна̄гам̣, сайамбхум̣ абхипӯджайим̣.

‘‘чатуннавутито каппе, йам̣ буддхамабхипӯджайим̣;

дуггатим̣ на̄бхиджа̄на̄ми, буддхапӯджа̄йидам̣ пхалам̣.

‘‘килеса̄ джха̄пита̄ майхам̣…пе… катам̣ буддхасса са̄сана’’нти.

арахаттам̣ пана патва̄ ан̃н̃ам̣ бйа̄каронто –

179. ‘‘упа̄сита̄ саппуриса̄, сута̄ дхамма̄ абхин̣хасо;

сутва̄на пат̣ипаджджиссам̣, ан̃джасам̣ аматогадхам̣.

180. ‘‘бхавара̄гахатасса ме сато, бхавара̄го пуна ме на виджджати;

на ча̄ху на ча ме бхависсати, на ча ме етарахи виджджатӣ’’ти. –

га̄тха̄двайам̣ абха̄си.

таттха упа̄сита̄ти паричарита̄ пат̣ипаттипайирупа̄сана̄йа пайирупа̄сита̄. саппуриса̄ти сантехи сӣла̄дигун̣ехи саманна̄гата̄ пуриса̄, арийапуггала̄ са̄рипуттаттхера̄дайо. етена пуримачаккадвайасампаттиматтано дассети. на хи патирӯпадесава̄сена вина̄ саппурисӯпаниссайо самбхавати. сута̄ дхамма̄ти саччапат̣иччасамуппа̄да̄дипат̣исам̣йуттадхамма̄ сотадва̄ра̄нуса̄рена упадха̄рита̄. етена аттано ба̄хусаччам̣ дассенто паччхимачаккадвайасампаттим̣ дассети. абхин̣хасоти бахусо на ка̄лена ка̄лам̣. идан̃ча падам̣ ‘‘упа̄сита̄ саппуриса̄’’ти еттха̄пи йоджетаббам̣. сутва̄на пат̣ипаджджиссам̣, ан̃джасам̣ аматогадханти те дхамме сутва̄ таттха вуттарӯпа̄рӯпадхамме салаккхан̣а̄дито париггахетва̄ ануккамена випассанам̣ вад̣д̣хетва̄ аматогадхам̣ нибба̄напатит̣т̣хам̣ там̣сампа̄пакам̣ ан̃джасам̣ арийам̣ ат̣т̣хан̇гикам̣ маггам̣ пат̣ипаджджим̣ па̄пун̣им̣.

бхавара̄гахатасса ме сатоти бхавара̄гена бхаватан̣ха̄йа ана̄димати сам̣са̄ре хатасса упаддутасса мама сато сама̄насса, аггамаггена ва̄ хатабхавара̄гасса. бхавара̄го пуна ме на виджджатӣти тато ева пуна ида̄ни бхавара̄го ме наттхи. на ча̄ху на ме бхависсати, на ча ме етарахи виджджатӣти йадипи пуббе путхуджджанака̄ле секкхака̄ле ча ме бхавара̄го ахоси, аггамаггаппаттито пана пат̣т̣ха̄йа на ча̄ху на ча ахоси, а̄йатимпи на ме бхависсати, етарахи адхуна̄пи на ча ме виджджати на ча упалаббхати, пахӣноти аттхо. бхавара̄гавачаненева четтха тадекат̣т̣хата̄йа ма̄на̄дӣнампи абха̄во вуттоти саббасо париккхӣн̣абхавасам̣йоджанатам̣ дассети.

кан̣хадиннаттхерага̄тха̄ван̣н̣ана̄ нит̣т̣хита̄.

татийаваггаван̣н̣ана̄ нит̣т̣хита̄.