5. саббамиттаттхерага̄тха̄ван̣н̣ана̄

джано джанамхи самбаддхоти а̄йасмато саббамиттаттхерасса га̄тха̄. ка̄ уппатти? айампи пуримабуддхесу ката̄дхика̄ро таттха таттха бхаве пун̃н̃а̄ни упачинанто ито два̄навуте каппе тиссасса бхагавато ка̄ле неса̄дакуле ниббаттитва̄ ванача̄рико хутва̄ ване миге вадхитва̄ мам̣сам̣ кха̄данто джӣвати. атхасса бхагава̄ анугган̣ханаттхам̣ васанат̣т̣ха̄насамӣпе тӣн̣и падачетийа̄ни дассетва̄ пакка̄ми. со атӣтака̄ле самма̄самбуддхесу катапаричайатта̄ чаккан̇кита̄ни дисва̄ пасаннама̄насо коран̣д̣апуппхехи пӯджам̣ катва̄ тена пун̃н̃акаммена та̄ватим̣сабхаване ниббаттитва̄ апара̄парам̣ сугатӣсуйева сам̣саранто имасмим̣ буддхуппа̄де са̄ваттхинагаре бра̄хман̣акуле ниббатти, саббамиттотисса на̄мам̣ ахоси. со вин̃н̃утам̣ патто джетаванапат̣иггахан̣е буддха̄нубха̄вам̣ дисва̄ пат̣иладдхасаддхо паббаджитва̄ каммат̣т̣ха̄нам̣ гахетва̄ аран̃н̃е вихаранто вассам̣ упагантва̄ вут̣т̣хавассо бхагавантам̣ вандитум̣ са̄ваттхим̣ гаччханто антара̄магге ма̄гавикехи од̣д̣ите па̄се мигапотакам̣ баддхам̣ аддаса. ма̄та̄ панасса мигӣ па̄сам̣ аппавит̣т̣ха̄пи путтасинехена дӯрам̣ на гаччхати, маран̣абхайена па̄сасамӣпампи на упагаччхати мигапотако ча бхӣто ито чито ча париваттенто карун̣ам̣ вилапати, там̣ дисва̄ тхеро, ‘‘ахо сатта̄нам̣ снехахетукам̣ дуккха’’нти гаччханто тато парам̣ самбахуле чоре екам̣ пурисам̣ джӣвага̄хам̣ гахетва̄ пала̄лавен̣ийа̄ сарӣрам̣ вет̣хетва̄ джха̄пенте, тан̃ча маха̄виравам̣ виравантам̣ дисва̄ тадубхайам̣ нисса̄йа сан̃джа̄тасам̣вего тесам̣ чора̄нам̣ сун̣анта̄нам̣йева –

149. ‘‘джано джанамхи самбаддхо, джанамевассито джано;

джано джанена хет̣хӣйати, хет̣хети ча джано джанам̣.

150. ‘‘ко хи тасса джаненаттхо, джанена джанитена ва̄;

джанам̣ оха̄йа гаччхам̣ там̣, хет̣хайитва̄ бахум̣ джана’’нти. – га̄тха̄двайам̣ абха̄си;

таттха джаноти андхаба̄ладжано. джанамхӣти ан̃н̃е джане. самбаддхоти тан̣ха̄бандханена баддхо. ‘‘айам̣ ме путто, ма̄та̄’’тиа̄дина̄ пат̣ибаддхо. айамева ва̄ па̄т̣хо, ‘‘име мам̣ посенти, ахам̣ име нисса̄йа джӣва̄мӣ’’ти пат̣ибаддхачиттоти аттхо. джанамевассито джаноти ‘‘айам̣ ме путто, дхӣта̄’’тиа̄дина̄ ан̃н̃амева джанам̣ ан̃н̃о джано ассито тан̣ха̄йа аллӣно париггайха т̣хито. джано джанена хет̣хӣйати, хет̣хети ча джано джананти каммассаката̄йа йатха̄бхӯта̄вабодхасса ча абха̄вато аджджхупеккханам̣ акатва̄ лобхавасена йатха̄ джано джанам̣ ассито, евам̣ досавасена джано джанена хет̣хӣйати виба̄дхӣйати. ‘‘тайидам̣ майхам̣ва упари хет̣ханапхалавасена парипатиссатӣ’’ти аджа̄нанто хет̣хети ча джано джанам̣.

ко хи тасса джаненаттхоти тасса ан̃н̃аджанасса ан̃н̃ена джанена тан̣ха̄васена асситена досавасена хет̣хитена ва̄ ко аттхо. джанена джанитена ва̄ти ма̄та̄пита̄ хутва̄ тена ан̃н̃ена джанена джанитена ва̄ ко аттхо. джанам̣ оха̄йа гаччхам̣ там̣, хет̣хайитва̄ бахум̣ джананти йасма̄ сам̣са̄ре чарато джанасса айамева̄нурӯпа̄ пат̣ипатти, тасма̄ там̣ джанам̣, тасса ча ба̄дхика̄ йа̄ са̄ тан̣ха̄ ча, йо ча со досо ева бахум̣ джанам̣ ба̄дхайитва̄ т̣хито, тан̃ча оха̄йа саббасо паха̄йа париччаджитва̄ гаччхам̣, техи анупаддутам̣ т̣ха̄нам̣ гаччхеййам̣ па̄пун̣еййанти аттхо. евам̣ пана ватва̄ тхеро та̄вадева випассанам̣ уссукка̄петва̄ арахаттамапа̄пун̣и. тена вуттам̣ апада̄не (апа. тхера 2.50.15-24) –

‘‘ванакаммико пуре а̄сим̣, питума̄туматенахам̣;

пасума̄рена джӣва̄ми, кусалам̣ ме на виджджати.

‘‘мама а̄сайаса̄манта̄, тиссо локаггана̄йако;

пада̄ни тӣн̣и дассеси, анукампа̄йа чаккхума̄.

‘‘акканте ча паде дисва̄, тиссана̄масса саттхуно;

хат̣т̣хо хат̣т̣хена читтена, паде читтам̣ паса̄дайим̣.

‘‘коран̣д̣ам̣ пуппхитам̣ дисва̄, па̄дапам̣ дхаран̣ӣрухам̣;

сакосакам̣ гахетва̄на, падасет̣т̣хамапӯджайим̣.

‘‘тена каммена сукатена, четана̄пан̣идхӣхи ча;

джахитва̄ ма̄нусам̣ дехам̣, та̄ватим̣самагаччхахам̣.

‘‘йам̣ йам̣ йонупападжджа̄ми, деваттам̣ атха ма̄нусам̣;

коран̣д̣акачхави хоми, суппабха̄со бхава̄махам̣.

‘‘двенавуте ито каппе, йам̣ каммамакарим̣ тада̄;

дуггатим̣ на̄бхиджа̄на̄ми, падапӯджа̄йидам̣ пхалам̣.

‘‘килеса̄ джха̄пита̄ майхам̣…пе… катам̣ буддхасса са̄сана’’нти.

те пана чора̄ тхерасса сантике дхаммам̣ сутва̄ сам̣вегаджа̄та̄ паббаджитва̄ дхамма̄нудхаммам̣ пат̣ипаджджим̣сӯти.

саббамиттаттхерага̄тха̄ван̣н̣ана̄ нит̣т̣хита̄.