5. уккхепакатаваччхаттхерага̄тха̄ван̣н̣ана̄

уккхепакатаваччхасса̄ти а̄йасмато уккхепакатаваччхаттхерасса га̄тха̄. ка̄ уппатти? сопи кира пуримабуддхесу ката̄дхика̄ро таттха таттха бхаве виват̣т̣ӯпаниссайам̣ пун̃н̃ам̣ упачинанто ито чатунавуте каппе сиддхаттхасса бхагавато ка̄ле кулагехе ниббаттитва̄ вин̃н̃утам̣ патто саттха̄рам̣ уддисса ма̄л̣ам̣ каронтасса пӯгасса екаттхамбхам̣ алабхантасса тхамбхам̣ датва̄ саха̄йакиччам̣ ака̄си. со тена пун̃н̃акаммена девалоке ниббаттитва̄ апара̄парам̣ пун̃н̃а̄ни катва̄ девамануссесу сам̣саранто имасмим̣ буддхуппа̄де са̄ваттхийам̣ ан̃н̃атарасса бра̄хман̣асса путто хутва̄ ниббатти, ваччхотисса готтато а̄гатана̄мам̣. со саттху сантике дхаммам̣ сутва̄ пат̣иладдхасаддхо паббаджитва̄ косаларат̣т̣хе га̄мака̄ва̄се васанто а̄гата̄гата̄нам̣ бхиккхӯнам̣ сантике дхаммам̣ парийа̄пун̣а̄ти. ‘‘айам̣ винайо идам̣ суттантам̣ айам̣ абхидхаммо’’ти пана париччхедам̣ на джа̄на̄ти. атхекадивасам̣ а̄йасмантам̣ дхаммасена̄патим̣ пуччхитва̄ йатха̄париччхедам̣ саббам̣ саллаккхеси. дхаммасан̇гӣтийа̄ пуббепи пит̣ака̄дисаман̃н̃а̄ парийаттисаддхамме ваваттхита̄ ева, йато бхиккхӯнам̣ винайадхара̄дивоха̄ро. со тепит̣акам̣ буддхавачанам̣ угган̣ханто парипуччханто таттха вутте рӯпа̄рӯпадхамме саллаккхетва̄ випассанам̣ пат̣т̣хапетва̄ саммасанто начирассева арахаттам̣ па̄пун̣и. тена вуттам̣ апада̄не (апа. тхера 1.2.13-26) –

‘‘сиддхаттхасса бхагавато, маха̄пӯгаган̣о аху;

саран̣ам̣ гата̄ ча те буддхам̣, саддаханти татха̄гатам̣.

‘‘саббе сан̇гамма мантетва̄, ма̄л̣ам̣ куббанти саттхуно;

екаттхамбхам̣ алабханта̄, вичинанти браха̄ване.

‘‘техам̣ аран̃н̃е дисва̄на, упагамма ган̣ам̣ тада̄;

ан̃джалим̣ паггахетва̄на, пат̣ипуччхим̣ ган̣ам̣ ахам̣.

‘‘те ме пут̣т̣ха̄ вийа̄кам̣су, сӣлаванто упа̄сака̄;

ма̄л̣ам̣ майам̣ каттука̄ма̄, екаттхамбхо на лаббхати.

‘‘екаттхамбхам̣ мамам̣ детха, ахам̣ дасса̄ми саттхуно;

а̄харисса̄махам̣ тхамбхам̣, аппоссукка̄ бхаванту те.

‘‘те ме тхамбхам̣ павеччхим̣су, пасанна̄ тут̣т̣хама̄наса̄;

тато пат̣иниваттитва̄, агамам̣су сакам̣ гхарам̣.

‘‘ачирам̣ гате пӯгаган̣е, тхамбхам̣ аха̄сахам̣ тада̄;

хат̣т̣хо хат̣т̣хена читтена, пат̣хамам̣ уссапесахам̣.

‘‘тена читтаппаса̄дена, вима̄нам̣ упападжджахам̣;

уббиддхам̣ бхаванам̣ майхам̣, саттабхӯмам̣ самуггатам̣.

‘‘ваджджама̄на̄су бхерӣсу, парича̄ремахам̣ сада̄;

пан̃чапан̃н̃а̄сакаппамхи, ра̄джа̄ а̄сим̣ йасодхаро.

‘‘таттха̄пи бхаванам̣ майхам̣, саттабхӯмам̣ самуггатам̣;

кӯт̣а̄га̄раварӯпетам̣, екаттхамбхам̣ манорамам̣.

‘‘екавӣсатикаппамхи, удено на̄ма кхаттийо;

татра̄пи бхаванам̣ майхам̣, саттабхӯмам̣ самуггатам̣.

‘‘йам̣ йам̣ йонупападжджа̄ми, деваттам̣ атха ма̄нусам̣;

анубхоми сукхам̣ саббам̣, екаттхамбхассидам̣ пхалам̣.

‘‘чатуннавутито каппе, йам̣ тхамбхамададам̣ тада̄;

дуггатим̣ на̄бхиджа̄на̄ми, екаттхамбхассидам̣ пхалам̣.

‘‘килеса̄ джха̄пита̄ майхам̣…пе… катам̣ буддхасса са̄сана’’нти.

арахаттам̣ пана патва̄ катакиччатта̄ акила̄субха̄ве т̣хито аттано сантикам̣ упагата̄нам̣ гахат̣т̣хапаббаджита̄нам̣ анукампам̣ упа̄да̄йа тепит̣акам̣ буддхавачанам̣ вӣмам̣ситва̄ дхаммам̣ десеси. десенто ча екадивасам̣ атта̄нам̣ парам̣ вийа катва̄ дассенто –

65. ‘‘уккхепакатаваччхасса, сан̇калитам̣ бахӯхи вассехи;

там̣ бха̄сати гахат̣т̣ха̄нам̣, сунисинно ул̣а̄рапа̄моджджо’’ти. – га̄тхам̣ абха̄си;

таттха уккхепакатаваччхасса̄ти катауккхепаваччхасса, бхиккхуно сантике висум̣ висум̣ уггахитам̣ винайападесам̣ суттападесам̣ абхидхаммападесан̃ча йатха̄париччхедам̣ винайасутта̄бхидхамма̄нам̣йева упари кхипитва̄ саджджха̄йанавасена таттха таттхева паккхипитва̄ т̣хитаваччхена̄ти аттхо каран̣аттхе хи идам̣ са̄мивачанам̣. сан̇калитам̣ бахӯхи вассехӣти бахукехи сам̣ваччхарехи сампин̣д̣анавасена хадайе т̣хапитам̣. ‘‘сан̇кхалита’’нтипи па̄т̣хо, сан̇кхалитам̣ вийа катам̣ ека̄баддхавасена ва̄чуггатам̣ катам̣. йам̣ буддхавачананти вачанасесо. танти там̣ парийаттидхаммам̣ бха̄сати катхети. гахат̣т̣ха̄нанти тесам̣ йебхуййата̄йа вуттам̣. сунисинноти тасмим̣ дхамме самма̄ ниччало нисинно, ла̄бхасакка̄ра̄дим̣ апачча̄сӣсанто кевалам̣ вимутта̄йатанасӣсейева т̣хатва̄ катхетӣти аттхо. тена̄ха ‘‘ул̣а̄рапа̄моджджо’’ти пхаласама̄паттисукхавасена дхаммадесана̄васенева ча уппаннаул̣а̄рапа̄моджджоти. вуттан̃хетам̣ –

‘‘йатха̄ йатха̄вусо бхиккху, йатха̄сутам̣ йатха̄парийаттам̣ дхаммам̣ виттха̄рена паресам̣ десети татха̄ татха̄ со тасмим̣ дхамме лабхати аттхаведам̣, лабхати дхаммаведам̣, лабхати дхаммӯпасам̣хитам̣ па̄моджджа’’нтиа̄ди (дӣ. ни. 3.355).

уккхепакатаваччхаттхерага̄тха̄ван̣н̣ана̄ нит̣т̣хита̄.