3. ванаваччхаттхерага̄тха̄ван̣н̣ана̄

аччходика̄ путхусила̄ти а̄йасмато ванаваччхаттхерасса га̄тха̄. ка̄ уппатти? айампи пуримабуддхесу ката̄дхика̄ро таттха таттха бхаве виват̣т̣ӯпаниссайам̣ кусалабӣджам̣ ропенто випассисса бхагавато ка̄ле кулагехе ниббаттитва̄ вин̃н̃утам̣ патто парасса каммам̣ катва̄ джӣванто кассачи апара̄дхам̣ катва̄ маран̣абхайена таджджито пала̄йанто антара̄магге бодхируккхам̣ дисва̄ пасаннама̄насо тасса мӯлам̣ саммаджджитва̄ пин̣д̣ибандхехи асокапуппхехи пӯджам̣ катва̄ вандитва̄ бодхим̣ абхимукхо намассама̄но паллан̇кена нисинно ма̄ретум̣ а̄гате паччаттхике дисва̄ тесу читтам̣ акопетва̄ бодхим̣ ева а̄вадждженто сатапорисе папа̄те папати. со тена пун̃н̃акаммена девалоке ниббаттитва̄ апара̄парам̣ пун̃н̃а̄ни катва̄ девамануссесу сам̣саранто имасмим̣ буддхуппа̄де ра̄джагахе вибхавасампаннасса бра̄хман̣асса путто хутва̄ ниббатти, ‘‘ваччхо’’тисса на̄мам̣ ахоси. со вайаппатто бимбиса̄расама̄гаме пат̣иладдхасаддхо паббаджитва̄ арахаттам̣ па̄пун̣и. тена вуттам̣ апада̄не (апа. тхера 1.16.7-14) –

‘‘паракамма̄йане йутто, апара̄дхам̣ ака̄сахам̣;

ванантам̣ абхидха̄виссам̣, бхайаверасамаппито.

‘‘пуппхитам̣ па̄дапам̣ дисва̄, пин̣д̣ибандхам̣ суниммитам̣;

тамбапуппхам̣ гахетва̄на, бодхийам̣ окирим̣ ахам̣.

‘‘саммаджджитва̄на там̣ бодхим̣, па̄т̣алим̣ па̄дапуттамам̣;

паллан̇кам̣ а̄бхуджитва̄на, бодхимӯле упа̄висим̣.

‘‘гатамаггам̣ гавесанта̄, а̄гаччхум̣ мама сантикам̣;

те ча дисва̄нахам̣ таттха, а̄ваджджим̣ бодхимуттамам̣.

‘‘вандитва̄на ахам̣ бодхим̣, виппасаннена четаса̄;

анеката̄ле папатим̣, гиридугге бхайа̄наке.

‘‘еканавутито каппе, йам̣ пуппхамабхиропайим̣;

дуггатим̣ на̄бхиджа̄на̄ми, бодхипӯджа̄йидам̣ пхалам̣.

‘‘ито ча татийе каппе, ра̄джа̄ сусан̃н̃ато ахам̣;

саттаратанасампанно, чаккаваттӣ махаббало.

‘‘килеса̄ джха̄пита̄ майхам̣…пе… катам̣ буддхасса са̄сана’’нти.

арахаттам̣ пана патва̄ вивека̄бхиратийа̄ ванейева васи, тена ванаваччхоти саман̃н̃а̄ удапа̄ди. атха када̄чи тхеро н̃а̄тиджана̄нуггахаттхам̣ ра̄джагахам̣ гато таттха н̃а̄такехи упат̣т̣хийама̄но катипа̄хам̣ васитва̄ гамана̄ка̄рам̣ сандассети. там̣ н̃а̄така̄, ‘‘бханте, амха̄кам̣ ануггахаттхам̣ дхуравиха̄ре васатха, майам̣ упат̣т̣хахисса̄ма̄’’ти йа̄чим̣су. тхеро тесам̣ паббатара̄ман̣еййакиттана̄падесена вивека̄бхиратим̣ ниведенто –

113. ‘‘аччходика̄ путхусила̄, гонан̇гуламига̄йута̄;

амбусева̄ласан̃чханна̄, те села̄ рамайанти ма’’нти. – га̄тхам̣ абха̄си;

таттха аччходика̄ти аччхам̣ абахалам̣ сукхумам̣ удакам̣ етесӯти ‘‘аччходака̄’’ти ваттаббе лин̇гавипалла̄сена аччходика̄’’ти вуттам̣. етена тесам̣ удакасампаттим̣ дассети. путхусила̄ти путхула̄ виттхата̄ мудусукхасампхасса̄ сила̄ етесӯти путхусила̄. етена нисаджджанат̣т̣ха̄насампаттим̣ дассети. гуннам̣ вийа нан̇гулам̣ нан̇гут̣т̣хам̣ етесанти гонан̇гула̄, ка̄л̣амаккат̣а̄, ‘‘пакатимаккат̣а̄’’типи вадантийева. гонан̇гулехи ча пасада̄дикехи мигехи ча тахам̣ тахам̣ вичарантехи а̄йута̄ миссита̄ти гонан̇гуламига̄йута̄. етена тесам̣ амануссӯпача̄рита̄йа аран̃н̃алаккхан̣ӯпетатам̣ дассети. амбусева̄ласан̃чханна̄ти пасаванато сататам̣ паггхарама̄насалилата̄йа тахам̣ тахам̣ удакасева̄ласан̃чха̄дита̄. те села̄ рамайанти манти йаттха̄хам̣ васа̄ми; те едиса̄ села̄ паббата̄ вивека̄бхиратийа̄ мам̣ рамайанти, тасма̄ таттхева̄хам̣ гаччха̄мӣти адхиппа̄йо. идамева ча тхерасса ан̃н̃а̄бйа̄каран̣ам̣ ахоси.

ванаваччхаттхерага̄тха̄ван̣н̣ана̄ нит̣т̣хита̄.