8. дхаммасавапитуттхерага̄тха̄ван̣н̣ана̄

са вӣсавассасатикоти а̄йасмато дхаммасавапитуттхерасса га̄тха̄. ка̄ уппатти? айампи пуримабуддхесу ката̄дхика̄ро буддхасун̃н̃е локе кулагехе ниббаттитва̄ вин̃н̃утам̣ патто бхӯтаган̣е на̄ма паббате вихарантам̣ паччекасамбуддхам̣ дисва̄ пасаннама̄насо тин̣асӯлапуппхехи пӯджам̣ ака̄си. со тена пун̃н̃акаммена девалоке ниббаттитва̄ апара̄парам̣ сугатӣсуйева сам̣саранто имасмим̣ буддхуппа̄де магадхарат̣т̣хе бра̄хман̣акуле ниббаттитва̄ вин̃н̃утам̣ патто да̄рапариггахам̣ катва̄ дхаммасавам̣ на̄ма путтам̣ лабхитва̄ тасмим̣ паббаджите сайампи вӣсавассасатико хутва̄, ‘‘мама путто та̄ва тарун̣о паббаджи, атха касма̄ на̄хам̣ паббаджисса̄мӣ’’ти сан̃джа̄тасам̣вего саттху сантикам̣ гантва̄ дхаммам̣ сутва̄ паббаджитва̄ випассанам̣ пат̣т̣хапетва̄ начирассева арахаттам̣ саччха̄ка̄си. тена вуттам̣ апада̄не (апа. тхера 1.16.35-38) –

‘‘химавантасса̄видӯре, бхӯтаган̣о на̄ма паббато;

васатеко джино таттха, сайамбхӯ локаниссат̣о.

‘‘тин̣асӯлам̣ гахетва̄на, буддхасса абхиропайим̣;

екӯнасатасахассам̣, каппам̣ на винипа̄тико.

‘‘ито ека̄дасе каппе, екосим̣ дхаран̣ӣрухо;

саттаратанасампанно, чаккаваттӣ махаббало.

‘‘килеса̄ джха̄пита̄ майхам̣…пе… катам̣ буддхасса са̄сана’’нти.

арахаттам̣ пана патва̄ аттано пат̣ипаттим̣ паччавеккхитва̄ сан̃джа̄тасоманассо уда̄ненто –

108. ‘‘са вӣсавассасатико, паббаджим̣ анага̄рийам̣;

тиссо виджджа̄ ануппатта̄, катам̣ буддхасса са̄сана’’нти. – га̄тхам̣ абха̄си;

таттха са вӣсавассасатикоти со вӣсам̣вассасатико, со ахам̣ джа̄тийа̄ вӣса̄дхикавассасатико сама̄но. паббаджинти паббаджджам̣ упагаччхим̣. сесам̣ вуттанайамева. идамева ча имасса тхерасса ан̃н̃а̄бйа̄каран̣ам̣ ахоси.

дхаммасавапитуттхерага̄тха̄ван̣н̣ана̄ нит̣т̣хита̄.