15. могхара̄джасуттаван̣н̣ана̄

1123. два̄хам̣ сакканти могхара̄джасуттам̣. таттха два̄ханти две ва̄ре ахам̣. со хи пуббе аджитасуттасса ча тиссаметтеййасуттасса ча аваса̄не двиккхаттум̣ бхагавантам̣ пуччхи. бхагава̄ панасса индрийапарипа̄кам̣ а̄гамайама̄но на бйа̄ка̄си. тена̄ха – ‘‘два̄хам̣ саккам̣ апуччхисса’’нти. йа̄вататийан̃ча девӣси, бйа̄каротӣти ме сутанти йа̄вататийан̃ча сахадхаммикам̣ пут̣т̣хо висуддхидевабхӯто иси бхагава̄ самма̄самбуддхо бйа̄каротӣти евам̣ ме сутам̣. годха̄варӣтӣрейева кира со евамассоси. тена̄ха – ‘‘бйа̄каротӣти ме сута’’нти.

1124. айам̣ локоти мануссалоко. паро локоти там̣ т̣хапетва̄ авасесо. садевакоти брахмалокам̣ т̣хапетва̄ авасесо упапаттидевасаммутидевайутто, ‘‘брахмалоко садевако’’ти етам̣ ва̄ ‘‘садеваке локе’’тиа̄динайанидассанаматтам̣, тена саббопи татха̄вуттаппака̄ро локо ведитаббо.

1125. евам̣ абхиккантадасса̄винти евам̣ аггадасса̄вим̣, садевакасса локасса аджджха̄сайа̄дхимуттигатипара̄йан̣а̄дӣни пасситум̣ саматтханти дассети.

1126. сун̃н̃ато локам̣ авеккхассӯти авасийапаваттасаллаккхан̣авасена ва̄ туччхасан̇кха̄расаманупассана̄васена ва̄ти двӣхи ка̄ран̣ехи сун̃н̃ато локам̣ пасса. атта̄нудит̣т̣хим̣ ӯхачча̄ти сакка̄йадит̣т̣хим̣ уддхаритва̄. сесам̣ саббаттха па̄кат̣амева.

евам̣ бхагава̄ имампи суттам̣ арахаттаникӯт̣енева десеси. десана̄парийоса̄не ча вуттасадисо ева дхамма̄бхисамайо ахосӣти.

параматтхаджотика̄йа кхуддака-ат̣т̣хакатха̄йа

суттанипа̄та-ат̣т̣хакатха̄йа могхара̄джасуттаван̣н̣ана̄ нит̣т̣хита̄.