13. аккхаруккхапетаваттхуван̣н̣ана̄

йам̣ дада̄ти на там̣ хотӣти идам̣ аккхада̄йакапетаваттху. тасса ка̄ уппатти? бхагавати са̄ваттхийам̣ вихаранте ан̃н̃атаро са̄ваттхива̄сӣ упа̄сако сакат̣ехи бхан̣д̣асса пӯретва̄ ван̣иджджа̄йа видесам̣ гантва̄ таттха аттано бхан̣д̣ам̣ виккин̣итва̄ пат̣ибхан̣д̣ам̣ сакат̣есу а̄ропетва̄ са̄ваттхим̣ уддисса маггам̣ пат̣ипаджджи. тасса маггам̣ гаччхантасса ат̣авийам̣ екасса сакат̣асса аккхо бхиджджи. атха ан̃н̃атаро пурисо руккхагахан̣аттхам̣ кут̣ха̄рипхарасум̣ га̄ха̄петва̄ аттано га̄мато никкхамитва̄ аран̃н̃е вичаранто там̣ т̣ха̄нам̣ патва̄ там̣ упа̄сакам̣ аккхабхан̃джанена доманассаппаттам̣ дисва̄ ‘‘айам̣ ва̄н̣иджо аккхабхан̃джанена ат̣авийам̣ киламатӣ’’ти анукампам̣ упа̄да̄йа руккхадан̣д̣ам̣ чхиндитва̄ дал̣хам̣ аккхам̣ катва̄ сакат̣е йоджетва̄ ада̄си.

со апарена самайена ка̄лам̣ катва̄ тасмим̣йева ат̣авипадесе бхуммадевата̄ хутва̄ ниббатто. аттано каммам̣ паччавеккхитва̄ раттийам̣ тасса упа̄сакасса гехам̣ гантва̄ гехадва̄ре т̣хатва̄ –

800. ‘‘йам̣ дада̄ти на там̣ хоти, детхева да̄нам̣ датва̄ убхайам̣ тарати;

убхайам̣ тена да̄нена гаччхати, джа̄гаратха ма̄ памаджджатха̄’’ти. –

га̄тхама̄ха. таттха йам̣ дада̄ти на там̣ хотӣти йам̣ деййадхаммам̣ да̄йако дети, на тадева паралоке тасса да̄насса пхалабха̄вена хоти, атха кхо ан̃н̃ам̣ бахум̣ ит̣т̣хам̣ кантам̣ пхалам̣ хотийева. тасма̄ детхева да̄нанти йатха̄ татха̄ да̄нам̣ детха ева. таттха ка̄ран̣ама̄ха ‘‘датва̄ убхайам̣ таратӣ’’ти, да̄нам̣ датва̄ дит̣т̣хадхаммикампи сампара̄йикампи дуккхам̣ анаттхан̃ча атиккамати. убхайам̣ тена да̄нена гаччхатӣти дит̣т̣хадхаммикам̣ сампара̄йикан̃ча̄ти убхайампи сукхам̣ тена да̄нена упагаччхати па̄пун̣а̄ти, аттано паресан̃ча хитасукхавасена̄пи айаматтхо йоджетаббо. джа̄гаратха ма̄ памаджджатха̄ти евам̣ убхайа̄наттханива̄ран̣ам̣ убхайахитаса̄дханам̣ да̄нам̣ сампа̄детум̣ джа̄гаратха, да̄нӯпакаран̣а̄ни саджджетва̄ таттха ча аппаматта̄ хотха̄ти аттхо. а̄дарадассанаттхам̣ четтха а̄мед̣итавасена вуттам̣.

ва̄н̣иджо аттано киччам̣ тӣретва̄ пат̣иниваттитва̄ ануккамена са̄ваттхим̣ патва̄ дутийадивасе саттха̄рам̣ упасан̇камитва̄ вандитва̄ екамантам̣ нисинно там̣ паваттим̣ бхагавато а̄рочеси. саттха̄ таматтхам̣ ат̣т̣хуппаттим̣ катва̄ сампаттапариса̄йа дхаммам̣ десеси. са̄ десана̄ маха̄джанасса са̄ттхика̄ ахосӣти.

аккхаруккхапетаваттхуван̣н̣ана̄ нит̣т̣хита̄.