14. бхогасам̣харан̣апетиваттхуван̣н̣ана̄

майам̣ бхоге сам̣харимха̄ти идам̣ бхогасам̣харан̣апетиваттху. тасса ка̄ уппатти? бхагавати вел̣уване вихаранте ра̄джагахе кира чатассо иттхийо ма̄накӯт̣а̄дивасена саппимадхутеладхан̃н̃а̄дӣхи воха̄рам̣ катва̄ айонисо бхоге сам̣харитва̄ джӣванти. та̄ ка̄йасса бхеда̄ парам̣ маран̣а̄ бахинагаре парикха̄пит̣т̣хе петийо хутва̄ ниббаттим̣су. та̄ раттийам̣ дуккха̄бхибхӯта̄ –

801. ‘‘майам̣ бхоге сам̣харимха̄, самена висамена ча;

те ан̃н̃е парибхун̃джанти, майам̣ дуккхасса бха̄гинӣ’’ти. –

виппалапантийо бхеравена маха̄саддена виравим̣су. манусса̄ там̣ сутва̄ бхӣтатасита̄ вибха̄та̄йа раттийа̄ буддхаппамукхасса бхиккхусан̇гхасса маха̄да̄нам̣ саджджетва̄ саттха̄рам̣ бхиккхусан̇гхан̃ча нимантетва̄ пан̣ӣтена кха̄данӣйена бходжанӣйена паривиситва̄ бхагавантам̣ бхутта̄вим̣ онӣтапаттапа̄н̣им̣ упанисӣдитва̄ там̣ паваттим̣ ниведесум̣. бхагава̄ ‘‘упа̄сака̄ тена во саддена кочи антара̄йо наттхи, чатассо пана петийо дуккха̄бхибхӯта̄ аттана̄ дуккат̣ам̣ каммам̣ катхетва̄ паридеванавасена виссарена виравантийо –

‘‘майам̣ бхоге сам̣харимха̄, самена висамена ча;

те ан̃н̃е парибхун̃джанти, майам̣ дуккхасса бха̄гинӣ’’ти. –

имам̣ га̄тхама̄хам̣сӯти авоча.

таттха бхогети парибхун̃джитаббат̣т̣хена ‘‘бхога̄’’ти ладдхана̄ме ваттха̄бхаран̣а̄дике виттӯпакаран̣ависесе. сам̣харимха̄ти маччхерамалена парийа̄динначитта̄ кассачи кин̃чи адатва̄ сан̃чинимха. самена висамена ча̄ти н̃а̄йена ча ан̃н̃а̄йена ча, н̃а̄йапатирӯпакена ва̄ ан̃н̃а̄йена те бхоге амхехи сам̣харите ида̄ни ан̃н̃е парибхун̃джанти. майам̣ дуккхасса бха̄гинӣти майам̣ пана кассачипи сучаритасса акататта̄ дуччаритасса ча кататта̄ етарахи петайонипарийа̄паннасса махато дуккхасса бха̄гинийо бхава̄ма, маха̄дуккхам̣ анубхава̄ма̄ти аттхо.

евам̣ бхагава̄ та̄хи петӣхи вуттам̣ га̄тхам̣ ватва̄ та̄сам̣ паваттим̣ катхетва̄ там̣ ат̣т̣хуппаттим̣ катва̄ сампаттапариса̄йа дхаммам̣ десетва̄ упари сачча̄ни пака̄сеси, саччапарийоса̄не бахӯ сота̄паттипхала̄дӣни па̄пун̣им̣сӯти.

бхогасам̣харан̣апетиваттхуван̣н̣ана̄ нит̣т̣хита̄.