7. антагга̄хика̄дит̣т̣хиниддесаван̣н̣ана̄

140. антагга̄хика̄йа дит̣т̣хийа̄ пат̣хамава̄ре а̄ка̄рапуччха̄. дутийе а̄ка̄рагахан̣ам̣. татийе а̄ка̄рависсаджджанам̣. таттха локоти атта̄. со антоти ан̃н̃аман̃н̃апат̣ипаккхесу сассатуччхедантесу сассатагга̄хе сассатанто, асассатагга̄хе уччхеданто. париттам̣ ока̄санти суппаматтам̣ ва̄ сара̄ваматтам̣ ва̄ кхуддакам̣ т̣ха̄нам̣. нӣлакато пхаратӣти нӣланти а̄рамман̣ам̣ кароти. айам̣ локоти атта̄нам̣ сандха̄йа вуттам̣. париват̣умоти самантато париччхедава̄. антасан̃н̃ӣти антава̄тисан̃н̃ӣ. анто асса аттхӣти антоти гахетаббам̣. йам̣ пхаратӣти йам̣ касин̣арӯпам̣ пхарати. там̣ ваттху чева локо ча̄ти там̣ касин̣арӯпам̣ а̄рамман̣ан̃чева а̄локийат̣т̣хена локо ча. йена пхаратӣти йена читтена пхарати. со атта̄ чева локо ча̄ти атта̄намапеккхитва̄ пуллин̇гам̣ катам̣, там̣ читтам̣ атта̄ чева а̄локанат̣т̣хена локо ча̄ти вуттам̣ хоти. антава̄ти анто. ока̄сакато пхаратӣти а̄локакасин̣авасена теджокасин̣авасена ода̄такасин̣авасена ва̄ обха̄соти пхарати. нӣла̄дӣнам̣ пан̃чаннам̣ пабхассаракасин̣а̄нам̣йева гахитатта̄ патхавӣа̄пова̄йокасин̣авасена атта̄бхинивесо на хотӣти гахетаббам̣.

випулам̣ ока̄санти кхаламан̣д̣аламатта̄дивасена махантам̣ т̣ха̄нам̣. анантава̄ти вуддхаанантава̄. апарийантоти вуддхаапарийанто. анантасан̃н̃ӣти анантотисан̃н̃ӣ. там̣ джӣванти со джӣво. лин̇гавипалла̄со като. джӣвоти ча атта̄ ева. рӯпа̄дӣни пан̃чапи париват̣умат̣т̣хена сарӣрам̣. джӣвам̣ на сарӣранти аттасан̇кха̄то джӣво рӯпасан̇кха̄там̣ сарӣрам̣ на хоти. еса найо ведана̄дӣсу. татха̄гатоти сатто. араханти еке. парам̣ маран̣а̄ти маран̣ато уддхам̣, паралокети аттхо. рӯпам̣ идхева маран̣адхамманти аттано па̄кат̣аккхандхасӣсена пан̃чаккхандхаггахан̣ам̣, там̣ имасмим̣йева локе нассанапакатиканти аттхо. сесаккхандхесупи есева найо. ка̄йасса бхеда̄ти кхандхапан̃чакасан̇кха̄тасса ка̄йасса бхедато парам̣. имина̄ вачанена ‘‘парам̣ маран̣а̄’’ти етасса уддесасса аттхо вутто. хотипӣтиа̄дӣсу хотӣти мӯлападам̣. чатӯсупи апи-саддо самуччайаттхо. тит̣т̣хатӣти сассататта̄ тит̣т̣хати, на чаватӣти аттхо. ‘‘хотӣ’’ти падасса ва̄ аттхависесанаттхам̣ ‘‘тит̣т̣хатӣ’’ти падам̣ вуттанти ведитаббам̣. уппаджджатӣти ан̣д̣аджаджала̄буджайонипавесавасена уппаджджати на̄ма, ниббаттатӣти сам̣седаджаопапа̄тикайонипавесавасена ниббаттати на̄ма̄ти аттхайоджана̄ ведитабба̄. уччхиджджатӣти пабандха̄бха̄вавасена. винассатӣти бхан̇гавасена. на хоти парам̣ маран̣а̄ти пуримапада̄нам̣ аттхавиваран̣ам̣, чутито уддхам̣ на виджджатӣти аттхо. хоти ча на ча хотӣти екаччасассатика̄нам̣ дит̣т̣хи, екена парийа̄йена хоти, екена парийа̄йена на хотӣти аттхо. джӣвабха̄вена хоти, пуббаджӣвасса абха̄вена на хотӣти вуттам̣ хоти. нева хоти на на хотӣти амара̄виккхепика̄нам̣ дит̣т̣хи, хотӣти ча нева хоти, на хотӣти ча на хотӣти аттхо. анува̄дабхайа̄ муса̄ва̄дабхайа̄ ча мандатта̄ момӯхатта̄ ча пуббавуттанайасса пат̣иккхепаматтам̣ кароти. имехи пан̃н̃а̄са̄йа а̄ка̄рехӣти йатха̄вутта̄нам̣ дасаннам̣ пан̃чака̄нам̣ васена пан̃н̃а̄са̄йа а̄ка̄рехӣти.

антагга̄хика̄дит̣т̣хиниддесаван̣н̣ана̄ нит̣т̣хита̄.