3. миччха̄дит̣т̣хиниддесаван̣н̣ана̄

136. миччха̄дит̣т̣хи хет̣т̣ха̄ вуттаттха̄йева. айам̣ пана апаро найо – наттхи диннанти уччхедадит̣т̣хикатта̄ да̄напхалам̣ пат̣иккхипати. наттхи йит̣т̣ханти еттха йит̣т̣ханти кхуддакайан̃н̃о. хутанти маха̄йан̃н̃о. двиннампи пхалам̣ пат̣иккхипати. наттхи сукатадуккат̣а̄нам̣ камма̄нам̣ пхалам̣ випа̄коти да̄напхаласса пат̣иккхиттатта̄ сӣла̄дӣнам̣ пун̃н̃акамма̄нам̣, па̄н̣а̄типа̄та̄дӣнам̣ па̄пакамма̄нам̣ пхалам̣ пат̣иккхипати. наттхи айам̣ локоти пуре катена каммуна̄. наттхи паро локоти идха катена каммуна̄. наттхи ма̄та̄, наттхи пита̄ти тесу катакамма̄нам̣ пхалам̣ пат̣иккхипати. наттхи сатта̄ опапа̄тика̄ти каммахетукам̣ упапаттим̣ пат̣иккхипати. наттхи локе саман̣абра̄хман̣а̄…пе… паведентӣти идхалокапаралоке пасситум̣ абхин̃н̃а̄пат̣ила̄бха̄йа пат̣ипадам̣ пат̣иккхипати. идха па̄л̣ийам̣ пана наттхи диннанти ваттхӯти наттхи диннанти вуччама̄нам̣ да̄нам̣, тасса̄ дит̣т̣хийа̄ ваттхӯти аттхо. евам̣ва̄до миччха̄ти евам̣ наттхи диннанти ва̄до вачанам̣ миччха̄ випарӣтоти аттхо.

миччха̄дит̣т̣хиниддесаван̣н̣ана̄ нит̣т̣хита̄.