7. каммакатха̄ван̣н̣ана̄

каммакатха̄ван̣н̣ана̄

234. ида̄ни тасса̄ хетусампаттийа̄ паччайабхӯтам̣ каммам̣ дассентена катхита̄йа каммакатха̄йа апуббаттха̄нуван̣н̣ана̄. таттха ахоси каммам̣ ахоси каммавипа̄котиа̄дӣсу атӣтабхавесу катасса каммасса атӣтабхавесуйева випаккавипа̄кам̣ гахетва̄ ‘‘ахоси каммам̣ ахоси каммавипа̄ко’’ти вуттам̣. тассева атӣтасса каммасса дит̣т̣хадхаммаведанӣйасса упападжджаведанӣйасса ча паччайавекаллена атӣтабхавесуйева авипаккавипа̄кан̃ча атӣтейева париниббутасса ча дит̣т̣хадхаммаведанӣйаупападжджаведанӣйаапарапарийа̄йаведанӣйасса каммасса авипаккавипа̄кан̃ча гахетва̄ ахоси каммам̣ на̄хоси каммавипа̄коти вуттам̣. атӣтассева каммасса авипаккавипа̄касса паччуппаннабхаве паччайасампаттийа̄ випаччама̄нам̣ випа̄кам̣ гахетва̄ ахоси каммам̣ аттхи каммавипа̄коти вуттам̣. атӣтассева каммасса атиккантавипа̄кака̄ласса ча паччуппаннабхаве паринибба̄йантасса ча авипаччама̄нам̣ випа̄кам̣ гахетва̄ ахоси каммам̣ наттхи каммавипа̄коти вуттам̣. атӣтассева каммасса випа̄ка̄рахасса авипаккавипа̄касса ана̄гате бхаве паччайасампаттийа̄ випаччитаббам̣ випа̄кам̣ гахетва̄ ахоси каммам̣ бхависсати каммавипа̄коти вуттам̣. атӣтассева каммасса атиккантавипа̄кака̄ласса ча ана̄гатабхаве паринибба̄йитаббасса ча авипаччитаббам̣ випа̄кам̣ гахетва̄ ахоси каммам̣ на бхависсати каммавипа̄коти вуттам̣. евам̣ атӣтакаммам̣ атӣтапаччуппанна̄на̄гатавипа̄ка̄випа̄кавасена чхадха̄ дасситам̣.

паччуппаннабхаве катасса дит̣т̣хадхаммаведанӣйасса каммасса идхева випаччама̄нам̣ випа̄кам̣ гахетва̄ аттхи каммам̣ аттхи каммавипа̄коти вуттам̣. тассева паччуппаннасса каммасса паччайавекаллена идха авипаччама̄нан̃ча дит̣т̣хева дхамме паринибба̄йантасса идха авипаччама̄нан̃ча випа̄кам̣ гахетва̄ аттхи каммам̣ наттхи каммавипа̄коти вуттам̣. паччуппаннассева каммасса упападжджаведанӣйасса ча апарапарийа̄йаведанӣйасса ча ана̄гатабхаве випаччитаббам̣ випа̄кам̣ гахетва̄ аттхи каммам̣ бхависсати каммавипа̄коти вуттам̣. паччуппаннассева каммасса упападжджаведанӣйасса паччайавекаллена ана̄гатабхаве авипаччитаббан̃ча ана̄гатабхаве паринибба̄йитаббасса апарапарийа̄йаведанӣйасса авипаччитаббан̃ча випа̄кам̣ гахетва̄ аттхи каммам̣ на бхависсати каммавипа̄коти вуттам̣. евам̣ паччуппаннакаммам̣ паччуппанна̄на̄гатавипа̄ка̄випа̄кавасена чатудха̄ дасситам̣.

ана̄гатабхаве ка̄таббасса каммасса ана̄гатабхаве випаччитаббам̣ випа̄кам̣ гахетва̄ бхависсати каммам̣ бхависсати каммавипа̄коти вуттам̣. тассева ана̄гатасса каммасса паччайавекаллена авипаччитаббан̃ча ана̄гатабхаве паринибба̄йитаббасса авипаччитаббан̃ча випа̄кам̣ гахетва̄ бхависсати каммам̣ на бхависсати каммавипа̄коти вуттам̣. евам̣ ана̄гатакаммам̣ ана̄гатавипа̄ка̄випа̄кавасена двидха̄ дасситам̣. там̣ саббам̣ екато катва̄ два̄дасавидхена каммам̣ дасситам̣ хоти.

имасмим̣ т̣ха̄не т̣хатва̄ тӣн̣и каммачатукка̄ни а̄харитва̄ вуччанти – тесу хи вуттесу айаматтхо па̄кат̣атаро бхависсатӣти. чатуббидхан̃хи каммам̣ дит̣т̣хадхаммаведанӣйам̣ упападжджаведанӣйам̣ апарапарийа̄йаведанӣйам̣ ахосикамманти. тесу екаджаванавӣтхийам̣ саттасу читтесу кусала̄ ва̄ акусала̄ ва̄ пат̣хамаджаваначетана̄ дит̣т̣хадхаммаведанӣйакаммам̣ на̄ма. там̣ имасмим̣йева аттабха̄ве випа̄кам̣ дети. татха̄ асакконтам̣ пана ‘‘ахоси каммам̣ на̄хоси каммавипа̄ко, на бхависсати каммавипа̄ко, наттхи каммавипа̄ко’’ти имасса тикасса васена ахосикаммам̣ на̄ма хоти. аттхаса̄дхика̄ пана саттамаджаваначетана̄ упападжджаведанӣйакаммам̣ на̄ма. там̣ анантаре аттабха̄ве випа̄кам̣ дети. татха̄ асакконтам̣ вуттанайенева ахосикаммам̣ на̄ма хоти. убхиннам̣ антаре пана пан̃чаджаваначетана̄ апарапарийа̄йаведанӣйакаммам̣ на̄ма. там̣ ана̄гате йада̄ ока̄сам̣ лабхати, тада̄ випа̄кам̣ дети. сати сам̣са̄раппаваттийа̄ ахосикаммам̣ на̄ма на хоти.

апарампи чатуббидхам̣ каммам̣ йаггарукам̣ йаббахулам̣ йада̄саннам̣ кат̣атта̄ ва̄ пана камманти. таттха кусалам̣ ва̄ хоту акусалам̣ ва̄, гарука̄гарукесу йам̣ гарукам̣ ма̄тугха̄та̄дикаммам̣ ва̄ махаггатакаммам̣ ва̄, тадева пат̣хамам̣ випаччати. татха̄ бахула̄бахулесупи йам̣ бахулам̣ хоти сусӣлйам̣ ва̄ дуссӣлйам̣ ва̄, тадева пат̣хамам̣ випаччати. йада̄саннам̣ на̄ма маран̣ака̄ле ануссаритакаммам̣ ва̄ катакаммам̣ ва̄. йан̃хи а̄саннамаран̣е ануссаритум̣ саккоти ка̄тум̣ ва̄, тенева упападжджати. етехи пана тӣхи муттам̣ пунаппунам̣ ладдха̄севанам̣ кат̣атта̄ ва̄ пана каммам̣ на̄ма хоти. тесам̣ абха̄ве там̣ пат̣исандхим̣ а̄кад̣д̣хати.

апарам̣ ва̄ чатуббидхам̣ каммам̣ джанакам̣ упаттхамбхакам̣ упапӣл̣акам̣ упагха̄таканти. таттха джанакам̣ на̄ма кусалампи хоти акусалампи. там̣ пат̣исандхийам̣ паваттепи рӯпа̄рӯпавипа̄кам̣ джанети. упаттхамбхакам̣ пана джанетум̣ на саккоти, ан̃н̃ена каммена динна̄йа пат̣исандхийа̄ джаните випа̄ке уппаджджанакасукхадуккхам̣ упаттхамбхети, аддха̄нам̣ паваттети. упапӣл̣акам̣ ан̃н̃ена каммена динна̄йа пат̣исандхийа̄ джаните випа̄ке уппаджджанакасукхадуккхам̣ пӣл̣ети ба̄дхати, аддха̄нам̣ паваттитум̣ на дети. упагха̄такам̣ пана кусалампи акусалампи сама̄нам̣ ан̃н̃ам̣ дуббалакаммам̣ гха̄тетва̄ тасса випа̄кам̣ пат̣иба̄хитва̄ аттано випа̄касса ока̄сам̣ кароти. евам̣ пана каммена кате ока̄се там̣ випа̄кам̣ уппаннам̣ на̄ма вуччати.

ити имесам̣ два̄дасаннам̣ камма̄нам̣ каммантаран̃ча випа̄кантаран̃ча буддха̄нам̣ каммавипа̄кан̃а̄н̣ассева йа̄тха̄васарасато па̄кат̣ам̣ хоти аса̄дха̄ран̣ам̣ са̄вакехи. випассакена пана каммантарам̣ випа̄кантаран̃ча екадесато джа̄нитаббам̣. тасма̄ айам̣ мукхаматтадассанена каммависесо пака̄ситоти.

235. евам̣ суддхикакаммавасена пат̣хамава̄рам̣ ватва̄ тадева каммам̣ двидха̄ вибхаджитва̄ кусала̄кусала̄дийугалавасена дасахи парийа̄йехи апаре даса ва̄ра̄ вутта̄. таттха а̄рогйат̣т̣хена кусалам̣, ана̄рогйат̣т̣хена акусалам̣, идам̣ дукам̣ джа̄тивасена вуттам̣. акусаламева ра̄га̄дидосасам̣йогена са̄ваджджам̣, кусалам̣ тадабха̄вена анаваджджам̣. акусалам̣ апарисуддхатта̄, кан̣ха̄бхиджа̄тихетутта̄ ва̄ кан̣хам̣, кусалам̣ парисуддхатта̄, сукка̄бхиджа̄тихетутта̄ ва̄ суккам̣. кусалам̣ сукхавуддхиматта̄ сукхудрайам̣, акусалам̣ дуккхавуддхиматта̄ дуккхудрайам̣. кусалам̣ сукхапхалаватта̄ сукхавипа̄кам̣, акусалам̣ дуккхапхалаватта̄ дуккхавипа̄канти еваметесам̣ на̄на̄ка̄ро ведитабботи.

каммакатха̄ван̣н̣ана̄ нит̣т̣хита̄.