35. паринибба̄нан̃а̄н̣аниддесаван̣н̣ана̄

86. паринибба̄нан̃а̄н̣аниддесе идха̄ти имасмим̣ са̄сане. сампаджа̄ноти са̄ттхакасампаджан̃н̃ам̣, саппа̄йасампаджан̃н̃ам̣, гочарасампаджан̃н̃ам̣, асаммохасампаджан̃н̃анти имехи чатӯхи сампаджан̃н̃ехи сампаджа̄но. паваттанти саббаттха йатха̄нурӯпам̣ парийут̣т̣ха̄напаваттан̃ча анусайаппаваттан̃ча. парийа̄дийатӣти упача̄раппана̄васена вуттесу виккхамбханавасена, випассана̄васена вуттесу тадан̇гавасена, маггавасена вуттесу самуччхедавасена кхепети аппаваттам̣ кароти. пеййа̄ламукхена хи дутийа̄диджха̄насама̄паттимаха̄випассана̄магга̄ сам̣кхитта̄. йасма̄ етам̣ паччавеккхантасса паваттам̣ н̃а̄н̣ам̣ паринибба̄не н̃а̄н̣ам̣ на̄ма хоти, тасма̄ виккхамбханапаринибба̄нам̣ тадан̇гапаринибба̄нам̣ самуччхедапаринибба̄нантипи вуттамева хоти. етехи килесапаринибба̄напаччавеккхан̣ан̃а̄н̣ам̣ вуттам̣. атха ва̄ пана̄тиа̄дӣхи кхандхапаринибба̄напаччавеккхан̣ан̃а̄н̣ам̣ ниддисати. анупа̄дисеса̄йа нибба̄надха̄туйа̄ти дувидха̄ хи нибба̄надха̄ту саупа̄дисеса̄ ча анупа̄дисеса̄ ча. таттха упа̄дӣйате ‘‘ахам̣ мама̄’’ти бхусам̣ ган̣хӣйатӣти упа̄ди, кхандхапан̃чакассетам̣ адхивачанам̣. упа̄дийева сесо авасит̣т̣хоти упа̄дисесо, саха упа̄дисесена ваттатӣти саупа̄дисеса̄. наттхеттха упа̄дисесоти анупа̄дисеса̄. саупа̄дисеса̄ пат̣хамам̣ вутта̄. айам̣ пана анупа̄дисеса̄. та̄йа анупа̄дисеса̄йа нибба̄надха̄туйа̄. чаккхупаваттанти чаккхупаватти чаккхусамуда̄ча̄ро. парийа̄дийатӣти кхепӣйати маддӣйатӣти. еса найо сесесу.

паринибба̄нан̃а̄н̣аниддесаван̣н̣ана̄ нит̣т̣хита̄.