36. самасӣсат̣т̣хан̃а̄н̣аниддесаван̣н̣ана̄

87. самасӣсат̣т̣хан̃а̄н̣аниддесе пан̃чаккхандха̄тиа̄дӣхи дасахи ра̄сӣхи саббадхаммасан̇гахо ведитаббо. на хи екекасса васена а̄йатанадха̄тура̄сиваджджехи сесехи ат̣т̣хахи ра̄сӣхи висум̣ висум̣ саббадхаммо сан̇гайхатӣти. йасма̄ пана локуттарадхамма̄ хетусамуччхедена самуччхиндитабба̄ на хонти, тасма̄ саббадхаммасаддена сан̇гахита̄пи локуттарадхамма̄ самуччхедавасена самбхавато идха на гахетабба̄, хетусамуччхедена самуччхиндитабба̄ ева тебхӯмакадхамма̄ гахетабба̄. самма̄ самуччхиндатӣти йатха̄йогам̣ виккхамбханатадан̇гасамуччхедапаха̄навасена парийут̣т̣ха̄нам̣ анусайан̃ча ниродхенто самма̄ самуччхиндати. евам̣ пуггала̄дхит̣т̣ха̄на̄йа десана̄йа самма̄ самуччхедо ниддит̣т̣хо. ниродхетӣти ануппа̄даниродхена ниродхети. имина̄ самуччхедаттхо вутто. на упат̣т̣ха̄тӣти евам̣ ниродхе кате со со дхаммо пуна на упатит̣т̣хати, на уппаджджатӣти аттхо. имина̄ ниродхаттхо вутто. евам̣ анупат̣т̣хаханадхаммавасена анупат̣т̣ха̄набха̄во ниддит̣т̣хо. саманти ка̄маччханда̄дӣнам̣ самитатта̄ самам̣. та̄ни пана неккхамма̄дӣни сатта, рӯпа̄рӯпаджджха̄на̄ни ат̣т̣ха, маха̄випассана̄ ат̣т̣ха̄раса, арийамагга̄ чатта̄роти саттатим̣са хонти.

тераса сӣса̄ни сӣсабхӯта̄нам̣ саббесам̣ сан̇гахавасена вутта̄ни. идха пана саддха̄дӣни ат̣т̣хева сӣса̄ни йуджджанти. на хи арахато тан̣ха̄дӣни пан̃ча сӣса̄ни санти. палибодхасӣсанти палибундханам̣ палибодхо, нибба̄намагга̄варан̣анти аттхо. сӣсанти падха̄нам̣, адхиканти аттхо. палибодхойева сӣсам̣, там̣сампайутта̄дисаббапалибодхесу ва̄ сӣсанти палибодхасӣсам̣. еса найо сесесу. висесато пана винибандхананти уннативасена сам̣са̄ре бандханам̣. пара̄ма̄соти абхинивесо. виккхепоти виппакин̣н̣ата̄. килесоти килиссанам̣. адхимоккхоти адхимуччанам̣. паггахоти усса̄ханам̣. упат̣т̣ха̄нанти апила̄панам̣. авиккхепоти авиппакин̣н̣ата̄. дассананти йатха̄сабха̄вапат̣иведхо. паваттанти упа̄диннаккхандхапаваттам̣. гочароти а̄рамман̣ам̣. имесу два̄дасасупи ва̄ресу падха̄нат̣т̣хо сӣсат̣т̣хо. вимоккхоти виккхамбханатадан̇гасамуччхедапат̣иппассаддхиниссаран̣авимуттӣсу пан̃часу ниссаран̣авимутти нибба̄нам̣. сан̇кха̄расӣсанти саббасан̇кхатасан̇кха̄ра̄нам̣ сӣсам̣, кот̣и аваса̄нанти аттхо. етена анупа̄дисесапаринибба̄нам̣ вуттам̣. сан̇кха̄ра̄бха̄ваматтавасена ва̄ кхандхапаринибба̄намева вуттам̣ хоти. неккхамма̄дикам̣ саман̃ча саддха̄дикам̣ сӣсан̃ча, самасӣсам̣ ва̄ асса аттхӣти самасӣсӣти. атха ва̄ терасаннам̣ сӣса̄нам̣ тан̣ха̄дӣни пан̃ча сӣса̄ни самудайасаччам̣, саддха̄дӣни пан̃ча маггасаччам̣, паваттасӣсам̣ джӣвитиндрийам̣ дуккхасаччам̣, гочарасӣсан̃ча сан̇кха̄расӣсан̃ча ниродхасаччанти имесам̣ чатуннам̣ арийасачча̄нам̣ екасмим̣ роге ва̄ екасмим̣ ирийа̄патхе ва̄ екасмим̣ сабха̄гаджӣвитиндрийе ва̄ абхисамайо ча анупа̄дисесапаринибба̄нан̃ча йасса хоти, со пуббе вуттасама̄нан̃ча имесан̃ча сӣса̄нам̣ аттхита̄йа самасӣсӣти вуччати.

самасӣсат̣т̣хан̃а̄н̣аниддесаван̣н̣ана̄ нит̣т̣хита̄.