5. а̄нандаттхераваттху

дива̄ тапатӣти имам̣ дхаммадесанам̣ саттха̄ мига̄рама̄тупа̄са̄де вихаранто а̄нандаттхерам̣ а̄раббха катхеси.

пасенади косало кира маха̄пава̄ран̣а̄йа сабба̄бхаран̣апат̣иман̣д̣ито гандхама̄ла̄дӣни а̄да̄йа виха̄рам̣ агама̄си. тасмим̣ кхан̣е ка̄л̣уда̄йиттхеро джха̄нам̣ сама̄паджджитва̄ парисапарийанте нисинно хоти, на̄мамева панассетам̣, сарӣрам̣ суван̣н̣аван̣н̣ам̣. тасмим̣ пана кхан̣е чандо уггаччхати, сӯрийо аттхамети. а̄нандаттхеро аттхаментасса ча сӯрийасса уггаччхантасса ча чандасса обха̄сам̣ олокенто ран̃н̃о сарӣробха̄сам̣ тхерасса сарӣробха̄сам̣ татха̄гатасса ча сарӣробха̄сам̣ олокеси. таттха саббобха̄се атиккамитва̄ саттха̄ва вирочати. тхеро саттха̄рам̣ вандитва̄, ‘‘бханте, аджджа мама име обха̄се олокентасса тумха̄камева обха̄со руччати. тумха̄кан̃хи сарӣрам̣ саббобха̄се атиккамитва̄ вирочатӣ’’ти а̄ха. атха нам̣ саттха̄, ‘‘а̄нанда, сӯрийо на̄ма дива̄ вирочати, чандо раттим̣, ра̄джа̄ алан̇катака̄лейева, кхӣн̣а̄саве ган̣асан̇ган̣икам̣ паха̄йа антосама̄паттийам̣йева вирочати, буддха̄ пана раттимпи дива̄пи пан̃чавидхена теджена вирочантӣ’’ти ватва̄ имам̣ га̄тхама̄ха –

387. ‘‘дива̄ тапати а̄диччо, раттима̄бха̄ти чандима̄;

саннаддхо кхаттийо тапати, джха̄йӣ тапати бра̄хман̣о;

атха саббамахораттим̣, буддхо тапати теджаса̄’’ти.

таттха дива̄ тапатӣти дива̄ вирочати, раттим̣ панасса гатамаггопи на пан̃н̃а̄йати. чандима̄ти чандопи аббха̄дӣхи вимутто раттимева вирочати, но дива̄. саннаддхоти суван̣н̣аман̣ивичиттехи сабба̄бхаран̣ехи пат̣иман̣д̣ито чатуран̇гинийа̄ сена̄йа париккхиттова ра̄джа̄ вирочати, на ан̃н̃а̄такавесена т̣хито. джха̄йӣти кхӣн̣а̄саво пана ган̣ам̣ винодетва̄ джха̄йантова вирочати. теджаса̄ти самма̄самбуддхо пана сӣлатеджена дуссӣлйатеджам̣, гун̣атеджена ниггун̣атеджам̣, пан̃н̃а̄теджена дуппан̃н̃атеджам̣, пун̃н̃атеджена апун̃н̃атеджам̣, дхамматеджена адхамматеджам̣ парийа̄дийитва̄ имина̄ пан̃чавидхена теджаса̄ ниччака̄ламева вирочатӣти аттхо.

десана̄васа̄не бахӯ сота̄паттипхала̄дӣни па̄пун̣им̣сӯти.

а̄нандаттхераваттху пан̃чамам̣.