6. ан̃н̃атарабра̄хман̣апаббаджитаваттху

ба̄хитапа̄поти имам̣ дхаммадесанам̣ саттха̄ джетаване вихаранто ан̃н̃атарам̣ бра̄хман̣апаббаджитам̣ а̄раббха катхеси.

еко кира бра̄хман̣о ба̄хиракапаббаджджа̄йа паббаджитва̄ ‘‘саман̣о готамо аттано са̄ваке ‘паббаджита̄’ти вадати, ахан̃чамхи паббаджито, мампи кхо евам̣ ваттум̣ ват̣т̣атӣ’’ти чинтетва̄ саттха̄рам̣ упасан̇камитва̄ етаматтхам̣ пуччхи. саттха̄ ‘‘на̄хам̣ еттакена ‘паббаджито’ти вада̄ми, килесамала̄нам̣ пана пабба̄джитатта̄ паббаджито на̄ма хотӣ’’ти ватва̄ имам̣ га̄тхама̄ха –

388. ‘‘ба̄хитапа̄поти бра̄хман̣о, самачарийа̄ саман̣оти вуччати;

пабба̄джайаматтано малам̣, тасма̄ паббаджитоти вуччатӣ’’ти.

таттха самачарийа̄ти сабба̄кусала̄ни саметва̄ чаран̣ена. тасма̄ти йасма̄ ба̄хитапа̄пата̄йа бра̄хман̣о, акусала̄ни саметва̄ чаран̣ена саман̣оти вуччати, тасма̄ йо аттано ра̄га̄дималам̣ пабба̄джайанто виноденто чарати, сопи тена пабба̄джанена паббаджитоти вуччатӣти аттхо.

десана̄васа̄не со бра̄хман̣апаббаджито сота̄паттипхале патит̣т̣хахи, сампатта̄нампи са̄ттхика̄ дхаммадесана̄ ахосӣти.

ан̃н̃атарабра̄хман̣апаббаджитаваттху чхат̣т̣хам̣.