4. ан̃н̃атарабра̄хман̣аваттху

джха̄йинти имам̣ дхаммадесанам̣ саттха̄ джетаване вихаранто ан̃н̃атарам̣ бра̄хман̣ам̣ а̄раббха катхеси.

со кира чинтеси – ‘‘саттха̄ аттано са̄ваке, ‘бра̄хман̣а̄’ти вадати, ахан̃чамхи джа̄тиготтена бра̄хман̣о, мампи ну кхо евам̣ ваттум̣ ват̣т̣атӣ’’ти. со саттха̄рам̣ упасан̇камитва̄ таматтхам̣ пуччхи. саттха̄ ‘‘на̄хам̣ джа̄тиготтаматтена бра̄хман̣ам̣ вада̄ми, уттаматтхам̣ арахаттам̣ ануппаттамева паневам̣ вада̄мӣ’’ти ватва̄ имам̣ га̄тхама̄ха –

386. ‘‘джха̄йим̣ вираджама̄сӣнам̣, катакиччамана̄савам̣;

уттаматтхамануппаттам̣, тамахам̣ брӯми бра̄хман̣а’’нти.

таттха джха̄йинти дувидхена джха̄нена джха̄йантам̣ ка̄мараджена вираджам̣ ване екакама̄сӣнам̣ чатӯхи маггехи сол̣асаннам̣ кичча̄нам̣ кататта̄ катакиччам̣ а̄сава̄нам̣ абха̄вена ана̄савам̣ уттаматтхам̣ арахаттам̣ ануппаттам̣ ахам̣ бра̄хман̣ам̣ вада̄мӣти аттхо.

десана̄васа̄не со бра̄хман̣о сота̄паттипхале патит̣т̣хахи, сампатта̄нампи са̄ттхика̄ дхаммадесана̄ ахосӣти.

ан̃н̃атарабра̄хман̣аваттху чатуттхам̣.