39. ан̇гулима̄латтхераваттху

усабханти имам̣ дхаммадесанам̣ саттха̄ джетаване вихаранто ан̇гулима̄латтхерам̣ а̄раббха катхеси. ваттху ‘‘на ве кадарийа̄ девалокам̣ ваджантӣ’’ти (дха. па. 177) га̄тха̄ван̣н̣ана̄йа вуттамева. вуттан̃хи таттха –

бхиккхӯ ан̇гулима̄лам̣ пуччхим̣су – ‘‘ким̣ ну кхо, а̄вусо ан̇гулима̄ла, дут̣т̣хахаттхим̣ чхаттам̣ дха̄ретва̄ т̣хитам̣ дисва̄ бха̄йӣ’’ти? ‘‘на бха̄йим̣, а̄вусо’’ти. те саттха̄рам̣ упасан̇камитва̄ а̄хам̣су – ‘‘ан̇гулима̄ло, бханте, ан̃н̃ам̣ бйа̄каротӣ’’ти. саттха̄ ‘‘на, бхиккхаве, мама путто ан̇гулима̄ло бха̄йати. кхӣн̣а̄саваусабха̄нан̃хи антаре джет̣т̣хакаусабха̄ мама путтасадиса̄ бхиккхӯ на бха̄йантӣ’’ти ватва̄ имам̣ га̄тхама̄ха –

422. ‘‘усабхам̣ паварам̣ вӣрам̣, махесим̣ виджита̄винам̣;

анеджам̣ нха̄такам̣ буддхам̣, тамахам̣ брӯми бра̄хман̣а’’нти.

тассаттхо – аччхамбхитат̣т̣хена усабхасадисата̄йа усабхам̣ уттамат̣т̣хена паварам̣ вӣрийасампаттийа̄ вӣрам̣ маханта̄нам̣ сӣлаккхандха̄дӣнам̣ еситатта̄ махесим̣ тин̣н̣ам̣ ма̄ра̄нам̣ виджитатта̄ виджита̄винам̣ нха̄такилесата̄йа нха̄такам̣ чатусаччабуддхата̄йа буддхам̣ там̣ еварӯпам̣ ахам̣ бра̄хман̣ам̣ вада̄мӣти аттхо.

десана̄васа̄не бахӯ сота̄паттипхала̄дӣни па̄пун̣им̣сӯти.

ан̇гулима̄латтхераваттху екӯначатта̄лӣсам̣.