38. дхаммадиннаттхерӣваттху

йасса̄ти имам̣ дхаммадесанам̣ саттха̄ вел̣уване вихаранто дхаммадиннам̣ на̄ма бхиккхуним̣ а̄раббха катхеси.

екадивасан̃хи тасса̄ гихика̄ле са̄мико виса̄кхо упа̄сако саттху сантике дхаммам̣ сутва̄ ана̄га̄мипхалам̣ патва̄ чинтеси – ‘‘майа̄ саббам̣ са̄патеййам̣ дхаммадиннам̣ пат̣иччха̄петум̣ ват̣т̣атӣ’’ти. со тато пуббе а̄гаччханто дхаммадиннам̣ ва̄тапа̄нена олокентим̣ дисва̄ ситам̣ кароти. там̣ дивасам̣ пана ва̄тапа̄нена т̣хитам̣ анолокентова агама̄си. са̄ ‘‘ким̣ ну кхо ида’’нти чинтетва̄ ‘‘хоту, бходжанака̄ле джа̄нисса̄мӣ’’ти бходжанавела̄йа бхаттам̣ упана̄меси. со ан̃н̃есу дивасесу ‘‘ехи, екато бхун̃джа̄ма̄’’ти вадати, там̣ дивасам̣ пана тун̣хӣбхӯтова бхун̃джи. са̄ ‘‘кеначидева ка̄ран̣ена купито бхависсатӣ’’ти чинтеси. атха нам̣ виса̄кхо сукханисиннавела̄йа там̣ паккоситва̄ ‘‘дхаммадинне имасмим̣ гехе саббам̣ са̄патеййам̣ пат̣иччха̄хӣ’’ти а̄ха. са̄ ‘‘куддха̄ на̄ма са̄патеййам̣ на пат̣иччха̄пенти, ким̣ ну кхо ета’’нти чинтетва̄ ‘‘тумхе пана, са̄мӣ’’ти а̄ха. ахам̣ ито пат̣т̣ха̄йа на кин̃чи вича̄ремӣти. тумхехи чхад̣д̣итам̣ кхел̣ам̣ ко пат̣иччхиссати, евам̣ санте мама паббаджджам̣ ануджа̄на̄тха̄ти. со ‘‘са̄дху, бхадде’’ти сампат̣иччхитва̄ махантена сакка̄рена там̣ бхиккхунӣупассайам̣ нетва̄ пабба̄джеси. са̄ ладдхӯпасампада̄ дхаммадиннаттхерӣ на̄ма ахоси.

са̄ павивекака̄мата̄йа бхиккхунӣхи саддхим̣ джанападам̣ гантва̄ таттха вихарантӣ на чирассева саха пат̣исамбхида̄хи арахаттам̣ патва̄ ‘‘ида̄ни мам̣ нисса̄йа н̃а̄тиджана̄ пун̃н̃а̄ни кариссантӣ’’ти пунадева ра̄джагахам̣ пачча̄ган̃чхи. упа̄сако тасса̄ а̄гатабха̄вам̣ сутва̄ ‘‘кена ну кхо ка̄ран̣ена а̄гата̄’’ти бхиккхунӣупассайам̣ гантва̄ тхерим̣ вандитва̄ екамантам̣ нисинно ‘‘уккан̣т̣хита̄ ну кхоси, аййети ваттум̣ аппатирӯпам̣, пан̃хамекам̣ нам̣ пуччхисса̄мӣ’’ти чинтетва̄ сота̄паттимагге пан̃хам̣ пуччхи, са̄ там̣ виссаджджеси. упа̄сако тенева упа̄йена сесамаггесупи пан̃хам̣ пуччхитва̄ атиккамма пан̃хасса пут̣т̣хака̄ле та̄йа ‘‘аччайа̄си, а̄вусо, виса̄кха̄’’ти ватва̄ ‘‘а̄кан̇кхама̄но саттха̄рам̣ упасан̇камитва̄ имам̣ пан̃хам̣ пуччхеййа̄сӣ’’ти вутте тхерим̣ вандитва̄ ут̣т̣ха̄йа̄сана̄ саттху сантикам̣ гантва̄ там̣ катха̄салла̄пам̣ саббам̣ бхагавато а̄рочеси. саттха̄ ‘‘сукатхитам̣ мама дхӣта̄йа дхаммадинна̄йа, ахампетам̣ пан̃хам̣ виссадждженто евамева виссаджджеййа’’нти ватва̄ дхаммам̣ десенто имам̣ га̄тхама̄ха –

421. ‘‘йасса пуре ча паччха̄ ча, маджджхе ча наттхи кин̃чанам̣;

акин̃чанам̣ ана̄да̄нам̣, тамахам̣ брӯми бра̄хман̣а’’нти.

таттха пурети атӣтесу кхандхесу. паччха̄ти ана̄гатесу кхандхесу. маджджхети паччуппаннесу кхандхесу. наттхи кин̃чананти йассетесу т̣ха̄несу тан̣ха̄га̄хасан̇кха̄там̣ кин̃чанам̣ наттхи, тамахам̣ ра̄гакин̃чана̄дӣхи акин̃чанам̣ кассачи гахан̣асса абха̄вена ана̄да̄нам̣ бра̄хман̣ам̣ вада̄мӣти аттхо.

десана̄васа̄не бахӯ сота̄паттипхала̄дӣни па̄пун̣им̣сӯти.

дхаммадиннаттхерӣваттху ат̣т̣хатим̣сатимам̣.