37. ван̇гӣсаттхераваттху

чутим̣ йо ведӣти имам̣ дхаммадесанам̣ саттха̄ джетаване вихаранто ван̇гӣсаттхерам̣ а̄раббха катхеси.

ра̄джагахе киреко бра̄хман̣о ван̇гӣсо на̄ма матаманусса̄нам̣ сӣсам̣ а̄кот̣етва̄ ‘‘идам̣ нирайе ниббаттасса сӣсам̣, идам̣ тираччха̄найонийам̣, идам̣ петтивисайе, идам̣ мануссалоке, идам̣ девалоке ниббаттасса сӣса’’нти джа̄на̄ти. бра̄хман̣а̄ ‘‘сакка̄ имам̣ нисса̄йа локам̣ кха̄диту’’нти чинтетва̄ там̣ две раттаваттха̄ни паридаха̄петва̄ а̄да̄йа джанападам̣ чаранта̄ мануссе ваданти ‘‘есо ван̇гӣсо на̄ма бра̄хман̣о матаманусса̄нам̣ сӣсам̣ а̄кот̣етва̄ ниббаттат̣т̣ха̄нам̣ джа̄на̄ти, аттано н̃а̄така̄нам̣ ниббаттат̣т̣ха̄нам̣ пуччхатха̄’’ти. манусса̄ йатха̄балам̣ дасапи каха̄пан̣е вӣсатипи сатампи датва̄ н̃а̄така̄нам̣ ниббаттат̣т̣ха̄нам̣ пуччханти. те анупуббена са̄ваттхим̣ патва̄ джетаванасса авидӯре нива̄сам̣ ган̣хим̣су. те бхуттапа̄тара̄са̄ маха̄джанам̣ гандхама̄ла̄дихаттхам̣ дхаммассавана̄йа гаччхантам̣ дисва̄ ‘‘кахам̣ гаччхатха̄’’ти пуччхитва̄ ‘‘виха̄рам̣ дхаммассавана̄йа̄’’ти вутте ‘‘таттха гантва̄ ким̣ кариссатха, амха̄кам̣ ван̇гӣсабра̄хман̣ена садисо на̄ма наттхи, матаманусса̄нам̣ сӣсам̣ а̄кот̣етва̄ ниббаттат̣т̣ха̄нам̣ джа̄на̄ти, н̃а̄така̄нам̣ ниббаттат̣т̣ха̄нам̣ пуччхатха̄’’ти а̄хам̣су. те ‘‘ван̇гӣсо ким̣ джа̄на̄ти, амха̄кам̣ саттха̄ра̄ садисо на̄ма наттхӣ’’ти ватва̄ итарехипи ‘‘ван̇гӣсасадисо наттхӣ’’ти вутте катхам̣ вад̣д̣хетва̄ ‘‘етха, да̄ни во ван̇гӣсасса ва̄ амха̄кам̣ ва̄ саттху джа̄нанабха̄вам̣ джа̄нисса̄ма̄’’ти те а̄да̄йа виха̄рам̣ агамам̣су. саттха̄ тесам̣ а̄гаманабха̄вам̣ н̃атва̄ нирайе тираччха̄найонийам̣ мануссалоке девалокети чатӯсу т̣ха̄несу ниббатта̄нам̣ чатта̄ри сӣса̄ни, кхӣн̣а̄савасӣсан̃ча̄ти пан̃ча сӣса̄ни а̄хара̄петва̄ пат̣ипа̄т̣ийа̄ т̣хапетва̄ а̄гатака̄ле ван̇гӣсам̣ пуччхи – ‘‘твам̣ кира сӣсам̣ а̄кот̣етва̄ матака̄нам̣ ниббаттат̣т̣ха̄нам̣ джа̄на̄сӣ’’ти? ‘‘а̄ма, джа̄на̄мӣ’’ти. ‘‘идам̣ касса сӣса’’нти? со там̣ а̄кот̣етва̄ ‘‘нирайе ниббаттасса̄’’ти а̄ха. атхасса саттха̄ ‘‘са̄дху са̄дхӯ’’ти са̄дхука̄рам̣ датва̄ итара̄нипи тӣн̣и сӣса̄ни пуччхитва̄ тена авираджджхитва̄ вуттавуттаккхан̣е татхева тасса са̄дхука̄рам̣ датва̄ пан̃чамам̣ сӣсам̣ дассетва̄ ‘‘идам̣ касса сӣса’’нти пуччхи, со тампи а̄кот̣етва̄ ниббаттат̣т̣ха̄нам̣ на джа̄на̄ти.

атха нам̣ саттха̄ ‘‘ким̣, ван̇гӣса, на джа̄на̄сӣ’’ти ватва̄, ‘‘а̄ма, на джа̄на̄мӣ’’ти вутте ‘‘ахам̣ джа̄на̄мӣ’’ти а̄ха. атха нам̣ ван̇гӣсо йа̄чи ‘‘детха ме имам̣ манта’’нти. на сакка̄ апаббаджитасса да̄тунти. со ‘‘имасмим̣ манте гахите сакаладжамбудӣпе ахам̣ джет̣т̣хако бхависса̄мӣ’’ти чинтетва̄ те бра̄хман̣е ‘‘тумхе таттхева катипа̄хам̣ васатха, ахам̣ паббаджисса̄мӣ’’ти уййоджетва̄ саттху сантике паббаджитва̄ ладдхӯпасампадо ван̇гӣсаттхеро на̄ма ахоси. атхасса саттха̄ дваттим̣са̄ка̄ракаммат̣т̣ха̄нам̣ датва̄ ‘‘мантасса парикаммам̣ саджджха̄йа̄хӣ’’ти а̄ха. со там̣ саджджха̄йанто антарантара̄ бра̄хман̣ехи ‘‘гахито те манто’’ти пуччхийама̄но ‘‘а̄гаметха та̄ва, ган̣ха̄мӣ’’ти ватва̄ катипа̄хенева арахаттам̣ патва̄ пуна бра̄хман̣ехи пут̣т̣хо ‘‘абхаббо да̄на̄хам̣, а̄вусо, ганту’’нти а̄ха. там̣ сутва̄ бхиккхӯ ‘‘айам̣, бханте, абхӯтена ан̃н̃ам̣ бйа̄каротӣ’’ти саттху а̄рочесум̣. саттха̄ ‘‘ма̄, бхиккхаве, евам̣ авачуттха, ида̄ни, бхиккхаве, мама путто чутипат̣исандхикусало джа̄то’’ти ватва̄ има̄ га̄тха̄ абха̄си –

419. ‘‘чутим̣ йо веди сатта̄нам̣, упапаттин̃ча саббасо;

асаттам̣ сугатам̣ буддхам̣, тамахам̣ брӯми бра̄хман̣ам̣.

420. ‘‘йасса гатим̣ на джа̄нанти, дева̄ гандхаббама̄нуса̄;

кхӣн̣а̄савам̣ арахантам̣, тамахам̣ брӯми бра̄хман̣а’’нти.

таттха йо ведӣти йо сатта̄нам̣ сабба̄ка̄рена чутин̃ча пат̣исандхин̃ча па̄кат̣ам̣ катва̄ джа̄на̄ти, тамахам̣ алаггата̄йа асаттам̣, пат̣ипаттийа̄ сут̣т̣ху гататта̄ сугатам̣, чатуннам̣ сачча̄нам̣ буддхата̄йа буддхам̣ бра̄хман̣ам̣ вада̄мӣти аттхо. йасса̄ти йассете дева̄дайо гатим̣ на джа̄нанти, тамахам̣ а̄сава̄нам̣ кхӣн̣ата̄йа кхӣн̣а̄савам̣, килесехи а̄ракатта̄ арахантам̣ бра̄хман̣ам̣ вада̄мӣти аттхо.

десана̄васа̄не бахӯ сота̄паттипхала̄дӣни па̄пун̣им̣сӯти.

ван̇гӣсаттхераваттху саттатим̣сатимам̣.