36. нат̣апуттакаттхераваттху

хитва̄ ратин̃ча̄ти имам̣ дхаммадесанам̣ саттха̄ вел̣уване вихаранто екам̣ нат̣апуттакам̣йева а̄раббха катхеси. ваттху пуримасадисамева. идха пана саттха̄, ‘‘бхиккхаве, мама путто ратин̃ча аратин̃ча паха̄йа т̣хито’’ти ватва̄ имам̣ га̄тхама̄ха –

418. ‘‘хитва̄ ратин̃ча аратин̃ча, сӣтибхӯтам̣ нирӯпадхим̣;

саббалока̄бхибхум̣ вӣрам̣, тамахам̣ брӯми бра̄хман̣а’’нти.

таттха ратинти пан̃чака̄магун̣аратим̣. аратинти аран̃н̃ава̄се уккан̣т̣хитаттам̣. сӣтибхӯтанти ниббутам̣. нирӯпадхинти нирупаккилесам̣. вӣранти там̣ еварӯпам̣ саббам̣ кхандхалокам̣ абхибхавитва̄ т̣хитам̣ вӣрийавантам̣ ахам̣ бра̄хман̣ам̣ вада̄мӣти аттхо.

десана̄васа̄не бахӯ сота̄паттипхала̄дӣни па̄пун̣им̣сӯти.

нат̣апуттакаттхераваттху чхаттим̣сатимам̣.