35. нат̣апуттакаттхераваттху

хитва̄ти имам̣ дхаммадесанам̣ саттха̄ вел̣уване вихаранто екам̣ нат̣апуттакам̣ а̄раббха катхеси.

со кира екам̣ нат̣акӣл̣ам̣ кӣл̣айама̄но вичаранто саттху дхаммакатхам̣ сутва̄ паббаджитва̄ арахаттам̣ па̄пун̣и. тасмим̣ буддхаппамукхена бхиккхусан̇гхена саддхим̣ пин̣д̣а̄йа пависанте бхиккхӯ екам̣ нат̣апуттам̣ кӣл̣антам̣ дисва̄, ‘‘а̄вусо, еса тайа̄ кӣл̣итакӣл̣итам̣ кӣл̣ати, аттхи ну кхо те еттха синехо’’ти пуччхитва̄ ‘‘наттхӣ’’ти вутте ‘‘айам̣, бханте, абхӯтам̣ ватва̄ ан̃н̃ам̣ бйа̄каротӣ’’ти а̄хам̣су. саттха̄ тесам̣ катхам̣ сутва̄, ‘‘бхиккхаве, мама путто саббайоге атикканто’’ти ватва̄ имам̣ га̄тхама̄ха –

417. ‘‘хитва̄ ма̄нусакам̣ йогам̣, диббам̣ йогам̣ упаччага̄;

саббайогависам̣йуттам̣, тамахам̣ брӯми бра̄хман̣а’’нти.

таттха ма̄нусакам̣ йоганти ма̄нусакам̣ а̄йун̃чева пан̃ча ка̄магун̣е ча. диббайогепи есева найо. упаччага̄ти йо ма̄нусакам̣ йогам̣ хитва̄ диббам̣ йогам̣ атикканто, там̣ саббехи чатӯхипи йогехи висам̣йуттам̣ ахам̣ бра̄хман̣ам̣ вада̄мӣти аттхо.

десана̄васа̄не бахӯ сота̄паттипхала̄дӣни па̄пун̣им̣сӯти.

нат̣апуттакаттхераваттху пан̃чатим̣сатимам̣.