3. ма̄раваттху

йасса па̄ранти имам̣ дхаммадесанам̣ саттха̄ джетаване вихаранто ма̄рам̣ а̄раббха катхеси.

со кирекасмим̣ дивасе ан̃н̃атаро пурисо вийа хутва̄ саттха̄рам̣ упасан̇камитва̄ пуччхи – ‘‘бханте, па̄рам̣ па̄ранти вуччати, кинну кхо етам̣ па̄рам̣ на̄ма̄’’ти. саттха̄ ‘‘ма̄ро айа’’нти видитва̄, ‘‘па̄пима, ким̣ тава па̄рена, тан̃хи вӣтара̄гехи паттабба’’нти ватва̄ имам̣ га̄тхама̄ха –

385. ‘‘йасса па̄рам̣ апа̄рам̣ ва̄, па̄ра̄па̄рам̣ на виджджати;

вӣтаддарам̣ висам̣йуттам̣, тамахам̣ брӯми бра̄хман̣а’’нти.

таттха па̄ранти аджджхаттика̄ни чха а̄йатана̄ни. апа̄ранти ба̄хира̄ни чха а̄йатана̄ни. па̄ра̄па̄ранти тадубхайам̣. на виджджатӣти йасса саббампетам̣ ‘‘аха’’нти ва̄ ‘‘мама’’нти ва̄ гахан̣а̄бха̄вена наттхи, там̣ килесадаратха̄нам̣ вигамена вӣтаддарам̣ саббакилесехи висам̣йуттам̣ ахам̣ бра̄хман̣ам̣ вада̄мӣти аттхо.

десана̄васа̄не бахӯ сота̄паттипхала̄дӣни па̄пун̣им̣сӯти.

ма̄раваттху татийам̣.