29. ревататтхераваттху

йодха пун̃н̃ан̃ча̄ти имам̣ дхаммадесанам̣ саттха̄ пубба̄ра̄ме вихаранто ревататтхерам̣ а̄раббха катхеси. ваттху ‘‘га̄ме ва̄ йади ва̄ран̃н̃е’’ти (дха. па. 98) га̄тха̄ван̣н̣ана̄йа виттха̄ритамева. вуттан̃хи таттха (дха. па. ат̣т̣ха. 1.98) –

пуна екадивасам̣ бхиккхӯ катхам̣ самут̣т̣ха̄песум̣ ‘‘ахо са̄ман̣ерасса ла̄бхо, ахо пун̃н̃ам̣, йена екакена пан̃чаннам̣ бхиккхусата̄нам̣ пан̃чакӯт̣а̄га̄расата̄ни ката̄нӣ’’ти. саттха̄ а̄гантва̄ ‘‘ка̄йа нуттха, бхиккхаве, етарахи катха̄йа саннисинна̄’’ти пуччхитва̄ ‘‘има̄йа на̄ма̄’’ти вутте, ‘‘бхиккхаве, майхам̣ путтасса нева пун̃н̃ам̣ аттхи, на па̄пам̣, убхайамасса пахӣна’’нти ватва̄ имам̣ га̄тхама̄ха –

412. ‘‘йодха пун̃н̃ан̃ча па̄пан̃ча, убхо сан̇гамупаччага̄;

асокам̣ вираджам̣ суддхам̣, тамахам̣ брӯми бра̄хман̣а’’нти.

таттха убхоти двепи пун̃н̃а̄ни ча па̄па̄ни ча чхад̣д̣етва̄ти аттхо. сан̇ганти ра̄га̄дибхедам̣ сан̇гам̣. упаччага̄ти атикканто. ват̣т̣амӯлакасока̄бха̄вена асокам̣ аббхантаре ра̄гараджа̄дӣнам̣ абха̄вена вираджам̣ нирупаккилесата̄йа суддхам̣ тамахам̣ бра̄хман̣ам̣ вада̄мӣти аттхо.

десана̄васа̄не бахӯ сота̄паттипхала̄дӣни па̄пун̣им̣сӯти.

ревататтхераваттху екӯнатим̣сатимам̣.