22. ан̃н̃атарабхиккхуваттху

нидха̄йа дан̣д̣анти имам̣ дхаммадесанам̣ саттха̄ джетаване вихаранто ан̃н̃атарам̣ бхиккхум̣ а̄раббха катхеси.

со кира саттху сантике каммат̣т̣ха̄нам̣ гахетва̄ аран̃н̃е ва̄йаманто арахаттам̣ патва̄ ‘‘пат̣иладдхагун̣ам̣ саттху а̄рочесса̄мӣ’’ти тато никкхами. атха нам̣ екасмим̣ га̄ме ека̄ иттхӣ са̄микена саддхим̣ калахам̣ катва̄ тасмим̣ бахи никкханте ‘‘кулагхарам̣ гамисса̄мӣ’’ти маггам̣ пат̣ипанна̄ антара̄магге дисва̄ ‘‘имам̣ тхерам̣ нисса̄йа гамисса̄мӣ’’ти пит̣т̣хито пит̣т̣хито анубандхи. тхеро пана там̣ на пассати. атхасса̄ са̄мико гехам̣ а̄гато там̣ адисва̄ ‘‘кулага̄мам̣ гата̄ бхависсатӣ’’ти анубандханто там̣ дисва̄ ‘‘на сакка̄ има̄йа екика̄йа имам̣ ат̣авим̣ пат̣ипаджджитум̣, кам̣ ну кхо нисса̄йа гаччхатӣ’’ти олокенто тхерам̣ дисва̄ ‘‘айам̣ имам̣ ган̣хитва̄ никкханто бхависсатӣ’’ти чинтетва̄ тхерам̣ сантаджджеси. атха нам̣ са̄ иттхӣ ‘‘нева мам̣ еса бхаданто пассати, на а̄лапати, ма̄ нам̣ кин̃чи авача̄’’ти а̄ха. со ‘‘ким̣ пана твам̣ атта̄нам̣ гахетва̄ гаччхантам̣ мама а̄чиккхиссаси, туйхамева ануччхавикам̣ имасса карисса̄мӣ’’ти уппаннакодхо иттхийа̄ а̄гха̄тена тхерам̣ потхетва̄ там̣ а̄да̄йа ниватти. тхерасса сакаласарӣрам̣ сан̃джа̄таган̣д̣ам̣ ахоси. атхасса виха̄рам̣ гатака̄ле бхиккхӯ сарӣрам̣ самба̄ханта̄ ган̣д̣е дисва̄ ‘‘ким̣ ида’’нти пуччхим̣су. со тесам̣ таматтхам̣ а̄рочеси. атха нам̣ бхиккхӯ, ‘‘а̄вусо, тасмим̣ пурисе евам̣ пахаранте твам̣ ким̣ авача, ким̣ ва̄ те кодхо уппанно’’ти. ‘‘на ме, а̄вусо, кодхо уппаджджӣ’’ти вутте саттху сантикам̣ гантва̄ таматтхам̣ а̄рочетва̄, ‘‘бханте, еса бхиккху ‘кодхо те уппаджджатӣ’ти вуччама̄но ‘на ме, а̄вусо, кодхо уппаджджатӣ’ти абхӯтам̣ ватва̄ ан̃н̃ам̣ бйа̄каротӣ’’ти а̄рочесум̣. саттха̄ тесам̣ катхам̣ сутва̄, ‘‘бхиккхаве, кхӣн̣а̄сава̄ на̄ма нихитадан̣д̣а̄, те пахарантесупи кодхам̣ на каронтийева̄’’ти ватва̄ имам̣ га̄тхама̄ха –

405. ‘‘нидха̄йа дан̣д̣ам̣ бхӯтесу, тасесу тха̄варесу ча;

йо на ханти на гха̄тети, тамахам̣ брӯми бра̄хман̣а’’нти.

таттха нидха̄йа̄ти никкхипитва̄ оропетва̄. тасесу тха̄варесу ча̄ти тан̣ха̄та̄сена тасесу, тан̣ха̄абха̄вена тхирата̄йа тха̄варесу ча. йо на хантӣти йо евам̣ саббасаттесу вигатапат̣игхата̄йа никкхиттадан̣д̣о нева кан̃чи сайам̣ ханати, на ан̃н̃е гха̄тети, тамахам̣ бра̄хман̣ам̣ вада̄мӣти аттхо.

десана̄васа̄не бахӯ сота̄паттипхала̄дӣни па̄пун̣им̣сӯти.

ан̃н̃атарабхиккхуваттху ба̄вӣсатимам̣.