2. самбахулабхиккхуваттху

йада̄ двайесӯти имам̣ дхаммадесанам̣ саттха̄ джетаване вихаранто самбахуле бхиккхӯ а̄раббха катхеси.

екадивасан̃хи тим̣саматта̄ диса̄ва̄сика̄ бхиккхӯ а̄гантва̄ саттха̄рам̣ вандитва̄ нисӣдим̣су. са̄рипуттаттхеро тесам̣ арахаттасса упаниссайам̣ дисва̄ саттха̄рам̣ упасан̇камитва̄ т̣хитакова имам̣ пан̃хам̣ пуччхи – ‘‘бханте, две дхамма̄ти вуччанти, катаме ну кхо две дхамма̄’’ти? атха нам̣ саттха̄ ‘‘две дхамма̄ти кхо, са̄рипутта, саматхавипассана̄ вуччантӣ’’ти ватва̄ имам̣ га̄тхама̄ха –

384. ‘‘йада̄ двайесу дхаммесу, па̄рагӯ хоти бра̄хман̣о;

атхасса саббе сам̣йога̄, аттхам̣ гаччханти джа̄нато’’ти.

таттха йада̄ти йасмим̣ ка̄ле двидха̄ т̣хитесу саматхавипассана̄дхаммесу абхин̃н̃а̄па̄рага̄дивасена айам̣ кхӣн̣а̄саво па̄рагӯ хоти, атхасса ват̣т̣асмим̣ сам̣йоджанасаматтха̄ саббе ка̄майога̄дайо сам̣йога̄ евам̣ джа̄нантасса аттхам̣ париккхайам̣ гаччхантӣти аттхо.

десана̄васа̄не саббепи те бхиккхӯ арахатте патит̣т̣хахим̣сӯти.

самбахулабхиккхуваттху дутийам̣.