13. екабра̄хман̣аваттху

на ча̄ханти имам̣ дхаммадесанам̣ саттха̄ джетаване вихаранто екам̣ бра̄хман̣ам̣ а̄раббха катхеси.

со кира ‘‘саман̣о готамо аттано са̄ваке бра̄хман̣а̄ти вадати ахан̃чамхи бра̄хман̣айонийам̣ ниббатто, мампи ну кхо евам̣ ваттум̣ ват̣т̣атӣ’’ти саттха̄рам̣ упасан̇камитва̄ таматтхам̣ пуччхи. атха нам̣ саттха̄ ‘‘на̄хам̣, бра̄хман̣а, бра̄хман̣айонийам̣ ниббаттаматтеневам̣ вада̄ми, йо пана акин̃чано агахан̣о, тамахам̣ бра̄хман̣ам̣ вада̄мӣ’’ти ватва̄ имам̣ га̄тхама̄ха –

396. ‘‘на ча̄хам̣ бра̄хман̣ам̣ брӯми, йониджам̣ маттисамбхавам̣;

бхова̄ди на̄ма со хоти, саче хоти сакин̃чано;

акин̃чанам̣ ана̄да̄нам̣, тамахам̣ брӯми бра̄хман̣а’’нти.

таттха йониджанти йонийам̣ джа̄там̣. маттисамбхаванти бра̄хман̣ийа̄ ма̄ту сантаке ударасмим̣ самбхӯтам̣. бхова̄дӣти со пана а̄мантана̄дӣсу ‘‘бхо, бхо’’ти ватва̄ вичаранто бхова̄ди на̄ма хоти, саче ра̄га̄дӣхи кин̃чанехи сакин̃чано. ахам̣ пана ра̄га̄дӣхи акин̃чанам̣ чатӯхи упа̄да̄нехи ана̄да̄нам̣ бра̄хман̣ам̣ вада̄мӣти аттхо.

десана̄васа̄не со бра̄хман̣о сота̄паттипхале патит̣т̣хахи, сампатта̄нампи са̄ттхика̄ дхаммадесана̄ ахосӣти.

екабра̄хман̣аваттху терасамам̣.