14. уггасенасет̣т̣хипуттаваттху

саббасам̣йоджананти имам̣ дхаммадесанам̣ саттха̄ вел̣уване вихаранто уггасенам̣ на̄ма сет̣т̣хипуттам̣ а̄раббха катхеси. ваттху ‘‘мун̃ча пуре мун̃ча паччхато’’ти (дха. па. 348) га̄тха̄ван̣н̣ана̄йа виттха̄ритамева.

тада̄ хи саттха̄, ‘‘бханте, уггасено ‘на бха̄йа̄мӣ’ти вадати, абхӯтена ман̃н̃е ан̃н̃ам̣ бйа̄каротӣ’’ти бхиккхӯхи вутте, ‘‘бхиккхаве, мама путтасадиса̄ чхиннасам̣йоджана̄ на бха̄йантийева̄’’ти ватва̄ имам̣ га̄тхама̄ха –

397. ‘‘саббасам̣йоджанам̣ чхетва̄, йо ве на паритассати;

сан̇га̄тигам̣ висам̣йуттам̣, тамахам̣ брӯми бра̄хман̣а’’нти.

таттха саббасам̣йоджананти дасавидхасам̣йоджанам̣. на паритассатӣти тан̣ха̄йа на бха̄йати. тамаханти там̣ ахам̣ ра̄га̄дӣнам̣ сан̇га̄нам̣ атӣтатта̄ сан̇га̄тигам̣, чатуннампи йога̄нам̣ абха̄вена висам̣йуттам̣ бра̄хман̣ам̣ вада̄мӣти аттхо.

десана̄васа̄не бахӯ сота̄паттипхала̄дӣни па̄пун̣им̣сӯти.

уггасенасет̣т̣хипуттаваттху чуддасамам̣.