12. киса̄готамӣваттху

пам̣сукӯладхаранти имам̣ дхаммадесанам̣ саттха̄ гиджджхакӯт̣е паббате вихаранто киса̄готамим̣ а̄раббха катхеси.

тада̄ кира сакко пат̣хамайа̄ма̄васа̄не девапариса̄йа саддхим̣ саттха̄рам̣ упасан̇камитва̄ вандитва̄ екаманте са̄ран̣ӣйадхаммакатхам̣ сун̣анто нисӣди. тасмим̣ кхан̣е киса̄готамӣ ‘‘саттха̄рам̣ пассисса̄мӣ’’ти а̄ка̄сена̄гантва̄ саккам̣ дисва̄ ниватти. со там̣ вандитва̄ ниваттантим̣ дисва̄ саттха̄рам̣ пуччхи – ‘‘ка̄ на̄меса̄, бханте, а̄гаччхама̄на̄ва тумхе дисва̄ ниваттатӣ’’ти? саттха̄ ‘‘киса̄готамӣ на̄меса̄, маха̄ра̄джа, мама дхӣта̄ пам̣сукӯликаттхерӣнам̣ агга̄’’ти ватва̄ имам̣ га̄тхама̄ха –

395. ‘‘пам̣сукӯладхарам̣ джантум̣, кисам̣ дхаманисантхатам̣;

екам̣ ванасмим̣ джха̄йантам̣, тамахам̣ брӯми бра̄хман̣а’’нти.

таттха кисанти пам̣сукӯлика̄ хи аттано анурӯпам̣ пат̣ипадам̣ пӯрента̄ аппамам̣салохита̄ чева хонти дхаманисантхатагатта̄ ча, тасма̄ евама̄ха. екам̣ ванасминти вивиттат̣т̣ха̄не екакам̣ ванасмим̣ джха̄йантам̣ тамахам̣ бра̄хман̣ам̣ вада̄мӣти аттхо.

десана̄васа̄не бахӯ сота̄паттипхала̄дӣни па̄пун̣им̣сӯти.

киса̄готамӣваттху два̄дасамам̣.