11. кухакабра̄хман̣аваттху

ким̣ тети имам̣ дхаммадесанам̣ саттха̄ кӯт̣а̄га̄раса̄ла̄йам̣ вихаранто екам̣ ваггуливатам̣ кухакабра̄хман̣ам̣ а̄раббха катхеси.

со кира веса̄линагарадва̄ре екам̣ какудхаруккхам̣ а̄руйха двӣхи па̄дехи руккхаса̄кхам̣ ган̣хитва̄ адхосиро оламбанто ‘‘капила̄нам̣ ме сатам̣ детха, каха̄пан̣е детха, парича̄рикам̣ детха, но че дассатха, ито патитва̄ маранто нагарам̣ анагарам̣ карисса̄мӣ’’ти вадати. татха̄гатасса бхиккхусан̇гхапаривутасса нагарам̣ пависанака̄ле бхиккхӯ там̣ бра̄хман̣ам̣ дисва̄ никкхаманака̄лепи нам̣ татхева оламбантам̣ пассим̣су. на̄гара̄пи ‘‘айам̣ па̄това пат̣т̣ха̄йа евам̣ оламбанто патитва̄ маранто нагарам̣ анагарам̣ кареййа̄’’ти чинтетва̄ нагаравина̄сабхӣта̄ ‘‘йам̣ со йа̄чати, саббам̣ дема̄’’ти пат̣иссун̣итва̄ адам̣су. со отаритва̄ саббам̣ гахетва̄ агама̄си. бхиккхӯ виха̄рӯпача̄ре там̣ га̄вим̣ вийа виравитва̄ гаччхантам̣ дисва̄ сан̃джа̄нитва̄ ‘‘ладдхам̣ те, бра̄хман̣а, йатха̄паттхита’’нти пуччхитва̄ ‘‘а̄ма, ладдхам̣ ме’’ти сутва̄ антовиха̄рам̣ гантва̄ татха̄гатасса таматтхам̣ а̄рочесум̣. саттха̄ ‘‘на, бхиккхаве, ида̄нева со кухакачоро, пуббепи кухакачоройева ахоси. ида̄ни панеса ба̄ладжанам̣ ван̃чети, тада̄ пана пан̣д̣ите ван̃четум̣ на̄саккхӣ’’ти ватва̄ техи йа̄чито атӣтама̄хари.

атӣте екам̣ ка̄сикага̄мам̣ нисса̄йа еко кухаката̄пасо ва̄сам̣ каппеси. там̣ екам̣ кулам̣ пат̣иджагги. дива̄ уппаннакха̄данӣйабходжанӣйато аттано путта̄нам̣ вийа тассапи екам̣ кот̣т̣ха̄сам̣ дети, са̄йам̣ уппаннакот̣т̣ха̄сам̣ т̣хапетва̄ дутийадивасе дети. атхекадивасам̣ са̄йам̣ годхамам̣сам̣ лабхитва̄ са̄дхукам̣ пачитва̄ тато кот̣т̣ха̄сам̣ т̣хапетва̄ дутийадивасе тасса адам̣су. та̄пасо мам̣сам̣ кха̄дитва̄ва расатан̣ха̄йа баддхо ‘‘ким̣ мам̣сам̣ на̄мета’’нти пуччхитва̄ ‘‘годхамам̣са’’нти сутва̄ бхиккха̄йа чаритва̄ саппидадхикат̣укабхан̣д̣а̄дӣни гахетва̄ пан̣н̣аса̄лам̣ гантва̄ екамантам̣ т̣хапеси. пан̣н̣аса̄ла̄йа пана авидӯре екасмим̣ ваммике годхара̄джа̄ вихарати. со ка̄лена ка̄лам̣ та̄пасам̣ вандитум̣ а̄гаччхати. там̣дивасам̣ панеса ‘‘там̣ вадхисса̄мӣ’’ти дан̣д̣ам̣ пат̣иччха̄детва̄ тасса ваммикасса авидӯре т̣ха̄не нидда̄йанто вийа нисӣди. годхара̄джа̄ ваммикато никкхамитва̄ тасса сантикам̣ а̄гаччхантова а̄ка̄рам̣ саллаккхетва̄ ‘‘на ме аджджа а̄чарийасса а̄ка̄ро руччатӣ’’ти татова ниватти. та̄пасо тасса ниваттанабха̄вам̣ н̃атва̄ тасса ма̄ран̣аттха̄йа дан̣д̣ам̣ кхипи, дан̣д̣о вираджджхитва̄ гато. годхара̄джа̄пи дхаммикам̣ пависитва̄ тато сӣсам̣ нӣхаритва̄ а̄гатамаггам̣ олокенто та̄пасам̣ а̄ха –

‘‘саман̣ам̣ там̣ ман̃н̃ама̄но, упагаччхимасан̃н̃атам̣;

со мам̣ дан̣д̣ена па̄ха̄си, йатха̄ асаман̣о татха̄.

‘‘ким̣ те джат̣а̄хи думмедха, ким̣ те аджинаса̄т̣ийа̄;

аббхантарам̣ те гаханам̣, ба̄хирам̣ паримаджджасӣ’’ти. (джа̄. 1.4.97-98);

атха нам̣ та̄пасо аттано сантакена палобхетум̣ евама̄ха –

‘‘ехи годха ниваттассу, бхун̃джа са̄лӣнамоданам̣;

телам̣ лон̣ан̃ча ме аттхи, пахӯтам̣ майха пиппхалӣ’’ти. (джа̄. 1.4.99);

там̣ сутва̄ годхара̄джа̄ ‘‘йатха̄ йатха̄ твам̣ катхеси, татха̄ татха̄ ме пала̄йитука̄мата̄ва хотӣ’’ти ватва̄ имам̣ га̄тхама̄ха –

‘‘еса бхиййо павеккха̄ми, ваммикам̣ сатапорисам̣;

телам̣ лон̣ан̃ча киттеси, ахитам̣ майха пиппхалӣ’’ти. (джа̄. 1.4.100);

еван̃ча пана ватва̄ ‘‘ахам̣ еттакам̣ ка̄лам̣ тайи саман̣асан̃н̃ам̣ ака̄сим̣, ида̄ни пана те мам̣ пахаритука̄мата̄йа дан̣д̣о кхитто, тасса кхиттака̄лейева асаман̣о джа̄то. ким̣ та̄дисасса дуппан̃н̃асса пуггаласса джат̣а̄хи, ким̣ сакхурена аджиначаммена. аббхантаран̃хи те гаханам̣, кевалам̣ ба̄хирамева паримаджджасӣ’’ти а̄ха. саттха̄ имам̣ атӣтам̣ а̄харитва̄ ‘‘тада̄ еса кухако та̄пасо ахоси, годхара̄джа̄ пана ахамева̄’’ти ватва̄ джа̄такам̣ самодха̄нетва̄ тада̄ годхапан̣д̣итена тасса ниггахитака̄ран̣ам̣ дассенто имам̣ га̄тхама̄ха –

394. ‘‘ким̣ те джат̣а̄хи думмедха, ким̣ те аджинаса̄т̣ийа̄;

аббхантарам̣ те гаханам̣, ба̄хирам̣ паримаджджасӣ’’ти. (джа̄. 1.4.98);

таттха ким̣ те джат̣а̄хӣти амбхо дуппан̃н̃а тава баддха̄хипи има̄хи джат̣а̄хи сакхура̄йа ниваттха̄йапи има̄йа аджиначаммаса̄т̣ика̄йа ча киматтхоти. аббхантаранти аббхантаран̃хи те ра̄га̄дикилесагаханам̣, кевалам̣ хаттхилан̣д̣ам̣ ассалан̣д̣ам̣ вийа мат̣т̣хам̣ ба̄хирам̣ паримаджджасӣти аттхо.

десана̄васа̄не бахӯ сота̄паттипхала̄дӣни па̄пун̣им̣сӯти.

кухакабра̄хман̣аваттху ека̄дасамам̣.