10. джат̣илабра̄хман̣аваттху

на джат̣а̄хӣти имам̣ дхаммадесанам̣ саттха̄ джетаване вихаранто екам̣ джат̣илабра̄хман̣ам̣ а̄раббха катхеси.

со кира ‘‘ахам̣ ма̄тито ча питито ча суджа̄то бра̄хман̣акуле ниббатто. саче саман̣о готамо аттано са̄ваке бра̄хман̣а̄ти вадати, мампи ну кхо татха̄ ваттум̣ ват̣т̣атӣ’’ти саттху сантикам̣ гантва̄ таматтхам̣ пуччхи. атха нам̣ саттха̄ ‘‘на̄хам̣, бра̄хман̣а, джат̣а̄маттена, на джа̄тиготтаматтена бра̄хман̣ам̣ вада̄ми, пат̣ивиддхасаччамева пана̄хам̣ бра̄хман̣оти вада̄мӣ’’ти ватва̄ дхаммам̣ десенто имам̣ га̄тхама̄ха –

393. ‘‘на джат̣а̄хи на готтена, на джачча̄ хоти бра̄хман̣о;

йамхи саччан̃ча дхаммо ча, со сучӣ со ча бра̄хман̣о’’ти.

таттха саччанти йасмим̣ пуггале чатта̄ри сачча̄ни сол̣асаха̄ка̄рехи пат̣ивиджджхитва̄ т̣хитам̣ саччан̃а̄н̣ан̃чева нававидхо ча локуттарадхаммо аттхи, со сучи, со бра̄хман̣о ча̄ти аттхо.

десана̄васа̄не бахӯ сота̄паттипхала̄дӣни па̄пун̣им̣сӯти.

джат̣илабра̄хман̣аваттху дасамам̣.