1. паса̄дабахулабра̄хман̣аваттху

чхинда сотанти имам̣ дхаммадесанам̣ саттха̄ джетаване вихаранто паса̄дабахулам̣ бра̄хман̣ам̣ а̄раббха катхеси.

со кира бра̄хман̣о бхагавато дхаммадесанам̣ сутва̄ пасанначитто аттано гехе сол̣асаматта̄нам̣ бхиккхӯнам̣ ниччабхаттам̣ пат̣т̣хапетва̄ бхиккхӯнам̣ а̄гатавела̄йа паттам̣ гахетва̄ ‘‘а̄гаччханту бхонто араханто, нисӣданту бхонто араханто’’ти йам̣кин̃чи ваданто арахантава̄дапат̣исам̣йуттамева вадати. тесу путхуджджана̄ ‘‘айам̣ амхесу арахантасан̃н̃ӣ’’ти чинтайим̣су, кхӣн̣а̄сава̄ ‘‘айам̣ но кхӣн̣а̄савабха̄вам̣ джа̄на̄тӣ’’ти. евам̣ те саббепи куккучча̄йанта̄ тасса гехам̣ на̄гамим̣су. со дуккхӣ думмано ‘‘кинну кхо, аййа̄, на̄гаччхантӣ’’ти виха̄рам̣ гантва̄ саттха̄рам̣ вандитва̄ таматтхам̣ а̄рочеси. саттха̄ бхиккхӯ а̄мантетва̄ ‘‘ким̣ етам̣, бхиккхаве’’ти пуччхитва̄ техи тасмим̣ аттхе а̄рочите ‘‘са̄дийатха пана тумхе, бхиккхаве, арахантава̄да’’нти а̄ха. ‘‘на са̄дийа̄ма майам̣, бханте’’ти. ‘‘евам̣ санте манусса̄нам̣ етам̣ паса̄дабхан̃н̃ам̣, ана̄патти, бхиккхаве, паса̄дабхан̃н̃е, апи ча кхо пана бра̄хман̣асса арахантесу адхиматтам̣ пемам̣, тасма̄ тумхехипи тан̣ха̄сотам̣ чхетва̄ арахаттамева паттум̣ йутта’’нти ватва̄ дхаммам̣ десенто имам̣ га̄тхама̄ха –

383. ‘‘чхинда сотам̣ параккамма, ка̄ме пануда бра̄хман̣а;

сан̇кха̄ра̄нам̣ кхайам̣ н̃атва̄, акатан̃н̃ӯси бра̄хман̣а̄’’ти.

таттха параккамма̄ти тан̣ха̄сотам̣ на̄ма на аппаматтакена ва̄йа̄мена чхиндитум̣ сакка̄, тасма̄ н̃а̄н̣асампайуттена махантена параккамена параккамитва̄ там̣ сотам̣ чхинда. убхопи ка̄ме пануда нӣхара. бра̄хман̣а̄ти кхӣн̣а̄сава̄нам̣ а̄лапанаметам̣. сан̇кха̄ра̄нанти пан̃чаннам̣ кхандха̄нам̣ кхайам̣ джа̄нитва̄. акатан̃н̃ӯти евам̣ санте твам̣ суван̣н̣а̄дӣсу кеначи акатасса нибба̄насса джа̄нанато акатан̃н̃ӯ на̄ма хосӣти.

десана̄васа̄не бахӯ сота̄паттипхала̄дӣни па̄пун̣им̣сӯти.

паса̄дабахулабра̄хман̣аваттху пат̣хамам̣.