9. сантака̄йаттхераваттху

сантака̄йоти имам̣ дхаммадесанам̣ саттха̄ джетаване вихаранто сантака̄йаттхерам̣ на̄ма а̄раббха катхеси.

тасса кира хаттхапа̄дакуккуччам̣ на̄ма на̄хоси, ка̄йавиджамбханарахито сантааттабха̄вова ахоси. со кира сӣхайонито а̄гато тхеро. сӣха̄ кира екадивасам̣ гочарам̣ гахетва̄ раджатасуван̣н̣аман̣ипава̄л̣агуха̄нам̣ ан̃н̃атарам̣ пависитва̄ маносила̄тале харита̄лачун̣н̣есу сатта̄хам̣ нипаджджитва̄ саттаме дивасе ут̣т̣ха̄йа нипаннат̣т̣ха̄нам̣ олокетва̄ саче нан̇гут̣т̣хасса ва̄ кан̣н̣а̄нам̣ ва̄ хаттхапа̄да̄нам̣ ва̄ чалитатта̄ маносила̄харита̄лачун̣н̣а̄нам̣ виппакин̣н̣атам̣ пассанти, ‘‘на те идам̣ джа̄тийа̄ ва̄ готтасса ва̄ патирӯпа’’нти пуна сатта̄хам̣ нира̄ха̄ра̄ нипаджджанти, чун̣н̣а̄нам̣ пана виппакин̣н̣абха̄ве асати ‘‘идам̣ те джа̄тиготта̄нам̣ ануччхавика’’нти а̄сайа̄ никкхамитва̄ виджамбхитва̄ диса̄ анувилокетва̄ тиккхаттум̣ сӣхана̄дам̣ надитва̄ гочара̄йа паккаманти. еварӯпа̄йа сӣхайонийа̄ а̄гато айам̣ бхиккху. тасса ка̄йасама̄ча̄рам̣ дисва̄ бхиккхӯ саттху а̄рочесум̣ – ‘‘на но, бханте, сантака̄йаттхерасадисо бхиккху дит̣т̣хапуббо. имасса хи нисиннат̣т̣ха̄не хаттхачаланам̣ ва̄ па̄дачаланам̣ ва̄ ка̄йавиджамбхита̄ ва̄ наттхӣ’’ти. там̣ сутва̄ саттха̄, ‘‘бхиккхаве, бхиккхуна̄ на̄ма сантака̄йаттхерена вийа ка̄йа̄дӣхи упасантенева бхавитабба’’нти ватва̄ имам̣ га̄тхама̄ха –

378. ‘‘сантака̄йо сантава̄чо, сантава̄ сусама̄хито;

ванталока̄мисо бхиккху, упасантоти вуччатӣ’’ти.

таттха сантака̄йоти па̄н̣а̄типа̄та̄дӣнам̣ абха̄вена сантака̄йо, муса̄ва̄да̄дӣнам̣ абха̄вена сантава̄чо, абхиджджха̄дӣнам̣ абха̄вена сантава̄, ка̄йа̄дӣнам̣ тин̣н̣ампи сут̣т̣ху сама̄хитатта̄ сусама̄хито, чатӯхи маггехи лока̄мисасса вантата̄йа ванталока̄мисо бхиккху аббхантаре ра̄га̄дӣнам̣ упасантата̄йа упасантоти вуччатӣти аттхо.

десана̄васа̄не со тхеро арахатте патит̣т̣хахи, сампатта̄нампи са̄ттхика̄ дхаммадесана̄ ахосӣти.

сантака̄йаттхераваттху навамам̣.