11. ваккалиттхераваттху

па̄моджджабахулоти имам̣ дхаммадесанам̣ саттха̄ вел̣уване вихаранто ваккалиттхерам̣ а̄раббха катхеси.

со кира̄йасма̄ са̄ваттхийам̣ бра̄хман̣акуле ниббаттитва̄ вайаппатто пин̣д̣а̄йа павит̣т̣хам̣ татха̄гатам̣ дисва̄ саттху сарӣрасампаттим̣ олокетва̄ сарӣрасампаттидассанена атитто ‘‘ева̄хам̣ ниччака̄лам̣ татха̄гатам̣ дат̣т̣хум̣ лабхисса̄мӣ’’ти саттху сантике паббаджитва̄ йаттха т̣хитена сакка̄ дасабалам̣ пасситум̣, таттха т̣хито саджджха̄йакаммат̣т̣ха̄наманасика̄ра̄дӣни паха̄йа саттха̄рам̣ олокентова вичарати. саттха̄ тасса н̃а̄н̣апарипа̄кам̣ а̄гаменто кин̃чи аватва̄ ‘‘ида̄нисса н̃а̄н̣ам̣ парипа̄кам̣ гата’’нти н̃атва̄ ‘‘ким̣ те, ваккали, имина̄ пӯтика̄йена дит̣т̣хена, йо кхо, ваккали, дхаммам̣ пассати, со мам̣ пассати. йо мам̣ пассати, со дхаммам̣ пассатӣ’’ти (сам̣. ни. 3.87) ватва̄ овади. со евам̣ овадитопи саттху дассанам̣ паха̄йа нева ан̃н̃аттха гантум̣ саккоти. атха нам̣ саттха̄ ‘‘на̄йам̣ бхиккху сам̣вегам̣ алабхитва̄ буджджхиссатӣ’’ти упакат̣т̣ха̄йа вассӯпана̄йика̄йа ра̄джагахам̣ гантва̄ вассӯпана̄йикадивасе ‘‘апехи, ваккали, апехи, ваккалӣ’’ти пан̣а̄меси. со ‘‘на мам̣ саттха̄ а̄лапатӣ’’ти тема̄сам̣ саттху саммукхе т̣ха̄тум̣ асакконто ‘‘ким̣ майхам̣ джӣвитена, паббата̄ атта̄нам̣ па̄тесса̄мӣ’’ти гиджджхакӯт̣ам̣ абхирухи.

саттха̄ тасса киламанабха̄вам̣ н̃атва̄ ‘‘айам̣ бхиккху мама сантика̄ асса̄сам̣ алабханто маггапхала̄нам̣ упаниссайам̣ на̄сеййа̄’’ти атта̄нам̣ дассетум̣ обха̄сам̣ мун̃чи. атхасса саттху дит̣т̣хака̄лато пат̣т̣ха̄йа та̄вамахантопи соко пахӣйи. саттха̄ суккхатал̣а̄кам̣ огхена пӯренто вийа тхерасса балавапӣтипа̄моджджам̣ уппа̄детум̣ имам̣ га̄тхама̄ха –

381. ‘‘па̄моджджабахуло бхиккху, пасанно буддхаса̄сане;

адхигаччхе падам̣ сантам̣, сан̇кха̄рӯпасамам̣ сукха’’нти.

тассаттхо – пакатийа̄пи па̄моджджабахуло бхиккху буддхаса̄сане паса̄дам̣ рочети, со евам̣ пасанно буддхаса̄сане сантам̣ падам̣ сан̇кха̄рӯпасамам̣ сукханти ладдхана̄мам̣ нибба̄нам̣ адхигаччхеййа̄ти. иман̃ча пана га̄тхам̣ ватва̄ саттха̄ ваккалиттхерасса хаттхам̣ паса̄ретва̄ –

‘‘ехи ваккали ма̄ бха̄йи, олокехи татха̄гатам̣;

ахам̣ там̣ уддхарисса̄ми, пан̇ке саннам̣ва кун̃джарам̣.

‘‘ехи ваккали ма̄ бха̄йи, олокехи татха̄гатам̣;

ахам̣ там̣ мочайисса̄ми, ра̄хуггахам̣ва сӯрийам̣.

‘‘ехи ваккали ма̄ бха̄йи, олокехи татха̄гатам̣;

ахам̣ там̣ мочайисса̄ми, ра̄хуггахам̣ва чандима’’нти. –

има̄ га̄тха̄ абха̄си. со ‘‘дасабало ме дит̣т̣хо, ехӣти ча авха̄нампи ладдха’’нти балавапӣтим̣ уппа̄детва̄ ‘‘куто ну кхо гантабба’’нти гаманамаггам̣ апассанто дасабаласса саммукхе а̄ка̄се уппатитва̄ пат̣хамапа̄де паббате т̣хитейева саттха̄ра̄ вуттага̄тха̄ а̄вадждженто а̄ка̄сейева пӣтим̣ виккхамбхетва̄ саха пат̣исамбхида̄хи арахаттам̣ патва̄ татха̄гатам̣ вандама̄нова отаритва̄ саттху сантике ат̣т̣ха̄си. атха нам̣ саттха̄ апарабха̄ге саддха̄дхимутта̄нам̣ аггат̣т̣ха̄не т̣хапесӣти.

ваккалиттхераваттху ека̄дасамам̣.