9. упака̄джӣвакаваттху

сабба̄бхибхӯти имам̣ дхаммадесанам̣ саттха̄ антара̄магге упакам̣ а̄джӣвакам̣ а̄раббха катхеси.

екасмин̃хи самайе саттха̄ паттасаббан̃н̃утан̃н̃а̄н̣о бодхиман̣д̣е саттасатта̄хам̣ вӣтина̄метва̄ аттано паттачӣварама̄да̄йа дхаммачаккапаваттанаттхам̣ ба̄ра̄н̣асим̣ сандха̄йа ат̣т̣ха̄расайоджанамаггам̣ пат̣ипанно антара̄магге упакам̣ а̄джӣвакам̣ аддаса. сопи саттха̄рам̣ дисва̄ ‘‘виппасанна̄ни кхо те, а̄вусо, индрийа̄ни, парисуддхо чхавиван̣н̣о парийода̄то, кам̣си твам̣, а̄вусо, уддисса паббаджито, ко ва̄ те саттха̄, касса ва̄ твам̣ дхаммам̣ рочесӣ’’ти пуччхи. атхасса саттха̄ ‘‘майхам̣ упаджджха̄йо ва̄ а̄чарийо ва̄ наттхӣ’’ти ватва̄ имам̣ га̄тхама̄ха –

353. ‘‘сабба̄бхибхӯ саббавидӯхамасми,

саббесу дхаммесу анӯпалитто;

саббан̃джахо тан̣хаккхайе вимутто,

сайам̣ абхин̃н̃а̄йа камуддисеййа’’нти.

таттха сабба̄бхибхӯти саббесам̣ тебхӯмакадхамма̄нам̣ абхибхаванато сабба̄бхибхӯ. саббавидӯти видитасаббачатубхӯмакадхаммо. саббесу дхаммесӯти саббесупи тебхӯмакадхаммесу тан̣ха̄дит̣т̣хӣхи анӯпалитто. саббан̃джахоти саббе тебхӯмакадхамме джахитва̄ т̣хито. тан̣хаккхайе вимуттоти тан̣хаккхайанте уппа̄дите тан̣хаккхайасан̇кха̄те арахатте асекха̄йа вимуттийа̄ вимутто. сайам̣ абхин̃н̃а̄йа̄ти абхин̃н̃еййа̄дибхеде дхамме сайамева джа̄нитва̄. камуддисеййанти ‘‘айам̣ ме упаджджха̄йо ва̄ а̄чарийо ва̄’’ти кам̣ на̄ма уддисеййанти.

десана̄васа̄не упако а̄джӣвако татха̄гатасса вачанам̣ нева̄бхинанди, на пат̣иккоси. сӣсам̣ пана ча̄летва̄ дживхам̣ нилла̄л̣етва̄ екападикамаггам̣ гахетва̄ ан̃н̃атарам̣ луддаканива̄санат̣т̣ха̄нам̣ агама̄сӣти.

упака̄джӣвакаваттху навамам̣.