2. хаттха̄чарийапуббакабхиккхуваттху

на хи етехӣти имам̣ дхаммадесанам̣ саттха̄ джетаване вихаранто екам̣ хаттха̄чарийапуббакам̣ бхиккхум̣ а̄раббха катхеси.

со кира екадивасам̣ ачираватӣнадӣтӣре хаттхидамакам̣ ‘‘екам̣ хаттхим̣ дамесса̄мӣ’’ти аттана̄ иччхитам̣ ка̄ран̣ам̣ сиккха̄петум̣ асакконтам̣ дисва̄ самӣпе т̣хите бхиккхӯ а̄мантетва̄ а̄ха – ‘‘а̄вусо, саче айам̣ хаттха̄чарийо имам̣ хаттхим̣ асукат̣т̣ха̄не на̄ма виджджхеййа, кхиппамева имам̣ ка̄ран̣ам̣ сиккха̄пеййа̄’’ти. со тасса катхам̣ сутва̄ татха̄ катва̄ там̣ хаттхим̣ судантам̣ дамеси. те бхиккхӯ там̣ паваттим̣ саттху а̄рочесум̣. саттха̄ там̣ бхиккхум̣ паккоса̄петва̄ ‘‘саччам̣ кира тайа̄ евам̣ вутта’’нти пуччхитва̄ ‘‘саччам̣, бханте’’ти вутте вигарахитва̄ ‘‘ким̣ те, могхапуриса, хаттхийа̄нена ва̄ ан̃н̃ена ва̄ дантена. на хи етехи йа̄нехи агатапуббам̣ т̣ха̄нам̣ гантум̣ саматтха̄ на̄ма аттхи, аттана̄ пана судантена сакка̄ агатапуббам̣ т̣ха̄нам̣ гантум̣, тасма̄ атта̄намева дамехи, ким̣ те етесам̣ даманена̄’’ти ватва̄ имам̣ га̄тхама̄ха –

323. ‘‘на хи етехи йа̄нехи, гаччхеййа агатам̣ дисам̣;

йатха̄ттана̄ судантена, данто дантена гаччхатӣ’’ти.

тассаттхо – йа̄ни та̄ни хаттхийа̄на̄дӣни йа̄на̄ни, на хи етехи йа̄нехи кочи пуггало супинантенапи агатапуббатта̄ ‘‘агата’’нти сан̇кха̄там̣ нибба̄надисам̣ татха̄ гаччхеййа, йатха̄ пуббабха̄ге индрийадамена апарабха̄ге арийамаггабха̄вана̄йа судантена данто ниббисевано саппан̃н̃о пуггало там̣ агатапуббам̣ дисам̣ гаччхати, дантабхӯмим̣ па̄пун̣а̄ти. тасма̄ аттадаманамева тато варанти аттхо.

десана̄васа̄не бахӯ сота̄паттипхала̄дӣни па̄пун̣им̣сӯти.

хаттха̄чарийапуббакабхиккхуваттху дутийам̣.