5. дуббачабхиккхуваттху

кусо йатха̄ти имам̣ дхаммадесанам̣ саттха̄ джетаване вихаранто ан̃н̃атарам̣ дуббачабхиккхум̣ а̄раббха катхеси.

еко кира бхиккху асан̃чичча екам̣ тин̣ам̣ чхиндитва̄ куккучче уппанне екам̣ бхиккхум̣ упасан̇камитва̄, ‘‘а̄вусо, йо тин̣ам̣ чхиндати, тасса ким̣ хотӣ’’ти там̣ аттана̄ катабха̄вам̣ а̄рочетва̄ пуччхи. атха нам̣ итаро ‘‘твам̣ тин̣асса чхиннака̄ран̣а̄ кин̃чи хотӣти сан̃н̃ам̣ кароси, на еттха кин̃чи хоти, десетва̄ пана муччатӣ’’ти ватва̄ сайампи убхохи хаттхехи тин̣ам̣ лун̃читва̄ аггахеси. бхиккхӯ там̣ паваттим̣ саттху а̄рочесум̣. саттха̄ там̣ бхиккхум̣ анекапарийа̄йена вигарахитва̄ дхаммам̣ десенто има̄ га̄тха̄ абха̄си –

311. ‘‘кусо йатха̄ дуггахито, хаттхамева̄нукантати;

са̄ман̃н̃ам̣ дуппара̄мат̣т̣хам̣, нирайа̄йупакад̣д̣хати.

312. ‘‘йам̣ кин̃чи ситхилам̣ каммам̣, сам̣килит̣т̣хан̃ча йам̣ ватам̣;

сан̇кассарам̣ брахмачарийам̣, на там̣ хоти махаппхалам̣.

313. ‘‘кайира̄ че кайира̄тхенам̣, дал̣хаменам̣ параккаме;

ситхило хи парибба̄джо, бхиййо а̄кирате раджа’’нти.

таттха кусоти йам̣ кин̃чи тикхин̣адха̄рам̣ тин̣ам̣ антамасо та̄лапан̣н̣ампи, йатха̄ со кусо йена дуггахито, тасса хаттхам̣ анукантати пха̄лети, евамева саман̣адхаммасан̇кха̄там̣ са̄ман̃н̃ампи кхан̣д̣асӣла̄дита̄йа дуппара̄мат̣т̣хам̣ нирайа̄йупакад̣д̣хати, нирайе ниббатта̄петӣти аттхо. ситхиланти олӣйитва̄ каран̣ена ситхилага̄хам̣ катва̄ катам̣ йам̣кин̃чи каммам̣. сам̣килит̣т̣ханти весийа̄дикесу агочаресу чаран̣ена сам̣килит̣т̣хам̣. сан̇кассаранти сан̇ка̄хи саритаббам̣, упосатхакичча̄дӣсу ан̃н̃атаракиччена саннипатитампи сан̇гхам̣ дисва̄ ‘‘аддха̄ име мама чарийам̣ н̃атва̄ мам̣ уккхипитука̄ма̄ва саннипатита̄’’ти евам̣ аттано а̄сан̇ка̄хи саритам̣ уссан̇китам̣ парисан̇китам̣. на там̣ хотӣти там̣ еварӯпам̣ саман̣адхаммасан̇кха̄там̣ брахмачарийам̣ тасса пуггаласса махаппхалам̣ на хоти, тасса махаппхала̄бха̄венева бхиккхада̄йака̄намписса на махаппхалам̣ хотӣти аттхо. кайира̄ чети тасма̄ йам̣ каммам̣ кареййа, там̣ кареййа̄тхева. дал̣хаменам̣ параккамети тхиракатамева катва̄ аваттасама̄да̄но хутва̄ енам̣ кайира̄. парибба̄джоти ситхилабха̄вена като кхан̣д̣а̄дибха̄ваппатто саман̣адхаммо. бхиййо а̄кирате раджанти аббхантаре виджджама̄нам̣ ра̄гараджа̄дим̣ еварӯпо саман̣адхаммо апанетум̣ на саккоти, атха кхо тасса упари апарампи ра̄гараджа̄дим̣ а̄киратӣти аттхо.

десана̄васа̄не бахӯ сота̄паттипхала̄дӣни па̄пун̣им̣су, сопи бхиккху сам̣варе т̣хатва̄ паччха̄ випассанам̣ вад̣д̣хетва̄ арахаттам̣ па̄пун̣ӣти.

дуббачабхиккхуваттху пан̃чамам̣.