6. исса̄пакатиттхиваттху

акатанти имам̣ дхаммадесанам̣ саттха̄ джетаване вихаранто ан̃н̃атарам̣ исса̄пакатам̣ иттхим̣ а̄раббха катхеси.

тасса̄ кира са̄мико ека̄йа гехада̄сийа̄ саддхим̣ сантхавам̣ ака̄си. са̄ исса̄паката̄ там̣ да̄сим̣ хаттхапа̄десу бандхитва̄ тасса̄ кан̣н̣ана̄сам̣ чхиндитва̄ екасмим̣ гул̣хагаббхе паккхипитва̄ два̄рам̣ пидахитва̄ тасса каммасса аттана̄ катабха̄вам̣ пат̣иччха̄детум̣ ‘‘ехи, аййа, виха̄рам̣ гантва̄ дхаммам̣ сун̣исса̄ма̄’’ти са̄микам̣ а̄да̄йа виха̄рам̣ гантва̄ дхаммам̣ сун̣антӣ нисӣди. атхасса̄ а̄гантукан̃а̄така̄ гехам̣ а̄гантва̄ два̄рам̣ виваритва̄ там̣ виппака̄рам̣ дисва̄ да̄сим̣ мочайим̣су. са̄ виха̄рам̣ гантва̄ чатупарисамаджджхе т̣хита̄ таматтхам̣ дасабаласса а̄рочеси. саттха̄ тасса̄ вачанам̣ сутва̄ ‘‘дуччаритам̣ на̄ма ‘идам̣ ме ан̃н̃е на джа̄нантӣ’ти аппаматтакампи на ка̄таббам̣, ан̃н̃асмим̣ аджа̄нантепи сучаритамева ка̄таббам̣. пат̣иччха̄детва̄ катампи хи дуччаритам̣ на̄ма паччха̄нута̄пам̣ кароти, сучаритам̣ па̄моджджамева джанетӣ’’ти ватва̄ имам̣ га̄тхама̄ха –

314. ‘‘акатам̣ дуккат̣ам̣ сеййо, паччха̄ таппати дуккат̣ам̣;

катан̃ча сукатам̣ сеййо, йам̣ катва̄ на̄нутаппатӣ’’ти.

таттха дуккат̣анти са̄ваджджам̣ апа̄йасам̣ваттаникам̣ каммам̣ акатамева сеййо варам̣ уттамам̣. паччха̄ таппатӣти тан̃хи ануссарита̄нуссаритака̄ле таппатийева. сукатанти анаваджджам̣ пана сукхада̄йакам̣ сугатисам̣ваттаникамева каммам̣ катам̣ сеййо. йам̣ катва̄ти йам̣ каммам̣ катва̄ паччха̄ ануссаран̣ака̄ле на таппати на̄нутаппати, соманассаджа̄това хоти, там̣ каммам̣ варанти аттхо.

десана̄васа̄не упа̄сако ча са̄ ча иттхӣ сота̄паттипхале патит̣т̣хахим̣су. тан̃ча пана да̄сим̣ таттхева бхуджиссам̣ катва̄ дхаммача̄риним̣ карим̣сӯти.

исса̄пакатиттхиваттху чхат̣т̣хам̣.