9. кассападасабаласса суван̣н̣ачетийаваттху

пӯджа̄рахети имам̣ дхаммадесанам̣ саттха̄ ча̄рикам̣ чарама̄но кассападасабаласса суван̣н̣ачетийам̣ а̄раббха катхеси.

татха̄гато са̄ваттхито никкхамитва̄ анупуббена ба̄ра̄н̣асим̣ гаччханто антара̄магге тодеййага̄масса самӣпе маха̄бхиккхусан̇гхапарива̄ро ан̃н̃атарам̣ деват̣т̣ха̄нам̣ сампа̄пун̣и. татра нисинно сугато дхаммабхан̣д̣а̄га̄рикам̣ песетва̄ авидӯре касикаммам̣ каронтам̣ бра̄хман̣ам̣ паккоса̄песи. со бра̄хман̣о а̄гантва̄ татха̄гатам̣ анабхивандитва̄ тамева деват̣т̣ха̄нам̣ вандитва̄ ат̣т̣ха̄си. сугатопи ‘‘имам̣ падесам̣ кинти ман̃н̃аси бра̄хман̣а̄’’ти а̄ха. амха̄кам̣ павен̣ийа̄ а̄гатачетийат̣т̣ха̄нанти ванда̄ми, бхо готама̄ти. ‘‘имам̣ т̣ха̄нам̣ вандантена тайа̄ са̄дху катам̣ бра̄хман̣а̄’’ти сугато там̣ сампахам̣сеси. там̣ сутва̄ бхиккхӯ ‘‘кена ну кхо ка̄ран̣ена бхагава̄ евам̣ сампахам̣сесӣ’’ти сам̣сайам̣ сан̃джанесум̣. тато татха̄гато тесам̣ сам̣сайамапанетум̣ маджджхиманика̄йе гхат̣ика̄расуттантам̣ (ма. ни. 2.282 а̄дайо) ватва̄ иддха̄нубха̄вена кассападасабаласса йоджануббедхам̣ канакачетийам̣ апаран̃ча канакачетийам̣ а̄ка̄се нимминитва̄ маха̄джанам̣ дассетва̄, ‘‘бра̄хман̣а, евам̣видха̄нам̣ пӯджа̄раха̄нам̣ пӯджа̄ йуттатара̄ва̄’’ти ватва̄ маха̄паринибба̄насутте (дӣ. ни. 2.206) дасситанайенева буддха̄дике чатта̄ро тхӯпа̄рахе пака̄сетва̄ сарӣрачетийам̣ уддиссачетийам̣ парибхогачетийанти тӣн̣и четийа̄ни висесато паридӣпетва̄ има̄ га̄тха̄ абха̄си –

195. ‘‘пӯджа̄рахе пӯджайато, буддхе йади ча са̄ваке;

папан̃часаматикканте, тин̣н̣асокапариддаве.

196. ‘‘те та̄дисе пӯджайато, ниббуте акутобхайе;

на сакка̄ пун̃н̃ам̣ сан̇кха̄тум̣, иметтамапи кеначӣ’’ти. (апа. тхера 1.10.1-2);

таттха пӯджитум̣ араха̄ пӯджа̄раха̄, пӯджитум̣ йутта̄ти аттхо. пӯджа̄рахе пӯджайатоти абхива̄дана̄дӣхи ча чатӯхи ча паччайехи пӯджентасса. пӯджа̄рахе дассети буддхетиа̄дина̄. буддхети самма̄самбуддхе. йадӣти йади ва̄, атха ва̄ти аттхо. таттха паччекабуддхети катхитам̣ хоти, са̄ваке ча. папан̃часаматиккантети саматиккантатан̣ха̄дит̣т̣хима̄напапан̃че. тин̣н̣асокапариддавети атиккантасокапариддаве, име две атиккантети аттхо. етехи пӯджа̄рахаттам̣ дасситам̣.

тети буддха̄дайо. та̄дисети вуттагахан̣авасена. ниббутети ра̄га̄диниббутийа̄. наттхи куточи бхавато ва̄ а̄рамман̣ато ва̄ етесам̣ бхайанти акутобхайа̄, те акутобхайе. на сакка̄ пун̃н̃ам̣ сан̇кха̄тунти пун̃н̃ам̣ ган̣етум̣ на сакка̄. катханти че? иметтамапи кеначӣти имам̣ еттакам̣, имам̣ еттаканти кеначӣти аписаддо идха самбандхитаббо, кеначи пуггалена ма̄нена ва̄. таттха пуггалена̄ти тена брахма̄дина̄. ма̄нена̄ти тивидхена ма̄нена тӣран̣ена дха̄ран̣ена пӯран̣ена ва̄. тӣран̣ам̣ на̄ма идам̣ еттаканти найато тӣран̣ам̣. дха̄ран̣анти тула̄йа дха̄ран̣ам̣. пӯран̣ам̣ на̄ма ад̣д̣хапасатапаттхана̄л̣ика̄дивасена пӯран̣ам̣. кеначи пуггалена имехи тӣхи ма̄нехи буддха̄дике пӯджайато пун̃н̃ам̣ випа̄кавасена ган̣етум̣ на сакка̄ парийантарахитатоти двӣсу т̣ха̄несу пӯджайато ким̣ да̄нам̣ пат̣хамам̣ дхарама̄не буддха̄дӣ пӯджайато на сакка̄ пун̃н̃ам̣ сан̇кха̄тум̣, пуна те та̄дисе килесапаринибба̄нанимиттена кхандхапаринибба̄нена ниббутепи пӯджайато на сакка̄ сан̇кха̄тунти бхеда̄ йуджджанти. тена хи вима̄наваттхумхи –

‘‘тит̣т̣ханте ниббуте ча̄пи, саме читте самам̣ пхалам̣;

четопан̣идхихету хи, сатта̄ гаччханти суггати’’нти. (ви. ва. 806);

десана̄васа̄не со бра̄хман̣о сота̄панно ахосӣти. йоджаникам̣ канакачетийам̣ сатта̄хама̄ка̄сева ат̣т̣ха̄си, махантена сама̄гамо ча̄хоси, сатта̄хам̣ четийам̣ на̄наппака̄рена пӯджесум̣. тато бхинналаддхика̄нам̣ ладдхибхедо джа̄то, буддха̄нубха̄вена там̣ четийам̣ сакат̣т̣ха̄намева гатам̣, таттхева там̣кхан̣е махантам̣ па̄са̄н̣ачетийам̣ ахоси. тасмим̣ сама̄гаме чатура̄сӣтийа̄ па̄н̣асахасса̄нам̣ дхамма̄бхисамайо ахосӣти.

кассападасабаласса суван̣н̣ачетийаваттху навамам̣.

буддхаваггаван̣н̣ана̄ нит̣т̣хита̄.

чуддасамо вагго.

пат̣хамабха̄н̣ава̄рам̣ нит̣т̣хитам̣.