11. сукхаса̄ман̣ераваттху

удакан̃хи найантӣти имам̣ дхаммадесанам̣ саттха̄ джетаване вихаранто сукхаса̄ман̣ерам̣ а̄раббха катхеси.

атӣтасмин̃хи ба̄ра̄н̣асисет̣т̣хино гандхакума̄ро на̄ма путто ахоси. ра̄джа̄ тасса питари ка̄лакате там̣ паккоса̄петва̄ самасса̄сетва̄ махантена сакка̄рена тассева сет̣т̣хит̣т̣ха̄нам̣ ада̄си. со тато пат̣т̣ха̄йа гандхасет̣т̣хӣти пан̃н̃а̄йи. атхасса бхан̣д̣а̄га̄рико дханагаббхадва̄рам̣ виваритва̄, ‘‘са̄ми, идам̣ те еттакам̣ питу дханам̣, еттакам̣ пита̄маха̄дӣна’’нти нӣхаритва̄ дассеси. со там̣ дханара̄сим̣ олокетва̄ а̄ха – ‘‘ким̣ пана те имам̣ дханам̣ гахетва̄ на гамим̣сӯ’’ти. ‘‘са̄ми, дханам̣ гахетва̄ гата̄ на̄ма наттхи. аттана̄ катам̣ кусала̄кусаламева хи а̄да̄йа сатта̄ гаччхантӣ’’ти. со чинтеси – ‘‘те ба̄лата̄йа дханам̣ сан̣т̣ха̄петва̄ паха̄йа гата̄, ахам̣ панетам̣ гахетва̄ва гамисса̄мӣ’’ти. евам̣ пана чинтенто ‘‘да̄нам̣ ва̄ дасса̄ми, пӯджам̣ ва̄ карисса̄мӣ’’ти ачинтетва̄ ‘‘идам̣ саббам̣ кха̄дитва̄ва гамисса̄мӣ’’ти чинтеси. со сатасахассам̣ виссаджджетва̄ пхаликамайам̣ нха̄накот̣т̣хакам̣ ка̄реси, сатасахассам̣ датва̄ пхаликамайамева нха̄напхалакам̣, сатасахассам̣ датва̄ нисӣданапаллан̇кам̣, сатасахассам̣ датва̄ бходжанапа̄тим̣, сатасахассамева датва̄ бходжанат̣т̣ха̄не ман̣д̣апам̣ ка̄ра̄песи, сатасахассам̣ датва̄ бходжанапа̄тийа̄ а̄ситтакӯпадха̄нам̣ ка̄реси, сатасахассенева гехе сӣхапан̃джарам̣ сан̣т̣ха̄песи, аттано па̄тара̄саттха̄йа сахассам̣ ада̄си, са̄йама̄саттха̄йапи сахассамева. пун̣н̣амадивасе пана бходжанаттха̄йа сатасахассам̣ да̄песи, там̣ бхаттам̣ бхун̃джанадивасе сатасахассам̣ виссаджджетва̄ нагарам̣ алан̇каритва̄ бхерим̣ чара̄песи – ‘‘гандхасет̣т̣хисса кира бхаттабхун̃джана̄ка̄рам̣ олокентӯ’’ти.

маха̄джано ман̃ча̄тиман̃че бандхитва̄ саннипати. сопи сатасахассаггханаке нха̄накот̣т̣хаке сатасахассаггханаке пхалаке нисӣдитва̄ сол̣асахи гандходакагхат̣ехи нхатва̄ там̣ сӣхапан̃джарам̣ виваритва̄ тасмим̣ паллан̇ке нисӣди. атхасса тасмим̣ а̄ситтакӯпадха̄не там̣ па̄тим̣ т̣хапетва̄ сатасахассаггханакам̣ бходжанам̣ вад̣д̣хесум̣. со на̄т̣акапаривуто еварӯпа̄йа сампаттийа̄ там̣ бходжанам̣ бхун̃джати. апарена самайена еко га̄микамануссо аттано париббайа̄харан̣аттхам̣ да̄руа̄дӣни йа̄наке паккхипитва̄ нагарам̣ гантва̄ саха̄йакасса гехе нива̄сам̣ ган̣хи. тада̄ пана пун̣н̣амадивасо хоти. ‘‘гандхасет̣т̣хино бхун̃джаналӣл̣ам̣ олокентӯ’’ти нагаре бхерим̣ чара̄песи. атха нам̣ саха̄йако а̄ха – ‘‘самма, гандхасет̣т̣хино те бхун̃джаналӣл̣ам̣ дит̣т̣хапубба’’нти. ‘‘на дит̣т̣хапуббам̣, самма̄’’ти. ‘‘тена хи ехи, гаччха̄ма, айам̣ нагаре бхерӣ чарати, етасса маха̄сампаттим̣ пасса̄ма̄’’ти нагарава̄сӣ джанападава̄сим̣ гахетва̄ агама̄си. маха̄джанопи ман̃ча̄тиман̃че абхирухитва̄ пассати. га̄мава̄сӣ бхаттагандхам̣ гха̄йитва̄ва нагарава̄сим̣ а̄ха – ‘‘майхам̣ ета̄йа па̄тийа̄ бхаттапин̣д̣е пипа̄са̄ джа̄та̄’’ти. самма, ма̄ етам̣ паттхайи, на сакка̄ ладдхунти. самма, алабханто на джӣвисса̄мӣти. со там̣ пат̣иба̄хитум̣ асакконто парисапарийанте т̣хатва̄ ‘‘пан̣ама̄ми те, са̄мӣ’’ти тиккхаттум̣ маха̄саддам̣ ниччха̄ретва̄ ‘‘ко есо’’ти вутте ахам̣, са̄мӣти. ‘‘кимета’’нти. ‘‘айам̣ еко га̄мава̄сӣ тумха̄кам̣ па̄тийам̣ бхаттапин̣д̣е пипа̄сам̣ упа̄деси, екам̣ бхаттапин̣д̣ам̣ да̄петха̄’’ти. ‘‘на сакка̄ ладдху’’нти. ‘‘ким̣, самма, сутам̣ те’’ти? ‘‘сутам̣ ме, апича лабханто джӣвисса̄ми, алабхантасса ме маран̣ам̣ бхависсатӣ’’ти. со пунапи вирави – ‘‘айам̣ кира, са̄ми, алабханто мариссати, джӣвитамасса детха̄’’ти. амбхо бхаттапин̣д̣о на̄ма сатампи аггхати, сатадвайампи аггхати. йо йо йа̄чати, тасса тасса дадама̄но ахам̣ ким̣ бхун̃джисса̄мӣти? са̄ми, айам̣ алабханто мариссати, джӣвитамасса детха̄ти. на сакка̄ва мудха̄ ладдхум̣, йади пана алабханто на джӣвати, тӣн̣и сам̣ваччхара̄ни мама гехе бхатим̣ кароту, евамасса бхаттапа̄тим̣ да̄песса̄мӣти. га̄мава̄сӣ там̣ сутва̄ ‘‘евам̣ хоту, самма̄’’ти саха̄йакам̣ ватва̄ путтада̄рам̣ паха̄йа ‘‘бхаттапа̄тиаттха̄йа тӣн̣и сам̣ваччхара̄ни бхатим̣ карисса̄мӣ’’ти сет̣т̣хисса гехам̣ па̄виси. со бхатим̣ каронто саббакичча̄ни саккаччам̣ ака̄си. гехе ва̄ аран̃н̃е ва̄ раттим̣ ва̄ дива̄ ва̄ сабба̄ни каттаббакамма̄ни ката̄нева пан̃н̃а̄йим̣су. ‘‘бхаттабхатико’’ти ча вутте сакаланагарепи пан̃н̃а̄йи. атхасса дивасе парипун̣н̣е бхаттавеййа̄ват̣ико ‘‘бхаттабхатикасса, са̄ми, дивасо пун̣н̣о, дуккарам̣ тена катам̣ тӣн̣и сам̣ваччхара̄ни бхатим̣ каронтена, екампи каммам̣ на копитапубба’’нти а̄ха.

атхасса сет̣т̣хи аттано са̄йапа̄тара̄саттха̄йа две сахасса̄ни, тасса па̄тара̄саттха̄йа сахассанти тӣн̣и сахасса̄ни да̄петва̄ а̄ха – ‘‘аджджа майхам̣ каттаббам̣ париха̄рам̣ тассева каротха̄’’ти. ватва̄ ча пана т̣хапетва̄ екам̣ чинта̄ман̣им̣ на̄ма пийабхарийам̣ авасесаджанампи ‘‘аджджа тамева парива̄ретха̄’’ти ватва̄ саббасампаттим̣ тасса ниййа̄деси. со сет̣т̣хино нха̄нодакена тассева кот̣т̣хаке тасмим̣ пхалаке нисинно нхатва̄ тассева нива̄санаса̄т̣аке нива̄сетва̄ тассева паллан̇ке нисӣди. сет̣т̣хипи нагаре бхерим̣ чара̄песи – ‘‘бхаттабхатико гандхасет̣т̣хисса гехе тӣн̣и сам̣ваччхара̄ни бхатим̣ катва̄ па̄тим̣ лабхи, тасса бхун̃джанасампаттим̣ олокентӯ’’ти. маха̄джано ман̃ча̄тиман̃че абхирухитва̄ пассати, га̄мава̄сисса олокитолокитат̣т̣ха̄нам̣ кампана̄ка̄раппаттам̣ ахоси. на̄т̣ака̄ парива̄ретва̄ ат̣т̣хасум̣, тасса пурато бхаттапа̄тим̣ вад̣д̣хетва̄ т̣хапайим̣су. атхасса хаттхадхованавела̄йа гандхама̄дане еко паччекабуддхо саттаме дивасе сама̄паттито вут̣т̣ха̄йа ‘‘каттха ну кхо аджджа бхиккха̄ча̄раттха̄йа гаччха̄мӣ’’ти упадха̄ренто бхаттабхатикам̣ аддаса. атха со ‘‘айам̣ тӣн̣и сам̣ваччхара̄ни бхатим̣ катва̄ бхаттапа̄тим̣ лабхи, аттхи ну кхо етасса саддха̄, наттхӣ’’ти упадха̄ренто ‘‘аттхӣ’’ти н̃атва̄ ‘‘саддха̄пи екачче сан̇гахам̣ ка̄тум̣ на сакконти, саккхиссати ну кхо ме сан̇гахам̣ ка̄ту’’нти чинтетва̄ ‘‘саккхиссати чева мама ча сан̇гахакаран̣ам̣ нисса̄йа маха̄сампаттим̣ лабхиссатӣ’’ти н̃атва̄ чӣварам̣ па̄рупитва̄ паттама̄да̄йа веха̄сам̣ аббхуггантва̄ парисантарена гантва̄ тасса пурато т̣хитамева атта̄нам̣ дассеси.

со паччекабуддхам̣ дисва̄ чинтеси – ‘‘ахам̣ пуббе адиннабха̄вена екисса̄ бхаттапа̄тийа̄ аттха̄йа тӣн̣и сам̣ваччхара̄ни парагехе бхатим̣ ака̄сим̣, ида̄ни ме идам̣ бхаттам̣ екам̣ раттиндивам̣ раккхеййа, саче пана нам̣ аййасса дасса̄ми, анека̄нипи каппакот̣исахасса̄ни раккхиссати, аййассева нам̣ дасса̄мӣ’’ти. со тӣн̣и сам̣ваччхара̄ни бхатим̣ катва̄ ладдхабхаттапа̄тито екапин̣д̣ампи мукхе ат̣т̣хапетва̄ тан̣хам̣ винодетва̄ сайамева па̄тим̣ уккхипитва̄ паччекабуддхасса сантикам̣ гантва̄ па̄тим̣ ан̃н̃асса хаттхе датва̄ пан̃чапатит̣т̣хитена вандитва̄ па̄тим̣ ва̄махаттхена гахетва̄ даккхин̣ахаттхена тасса патте бхаттам̣ а̄кири. паччекабуддхо бхаттасса упад̣д̣хасесака̄ле паттам̣ хаттхена пидахи. атха нам̣ со а̄ха – ‘‘бханте, екова пат̣ивисо на сакка̄ двидха̄ ка̄тум̣, ма̄ мам̣ идхалокена сан̇ган̣хатха, паралокена сан̇гахамева каротха, са̄васесам̣ акатва̄ ниравасесамева дасса̄мӣ’’ти. аттано хи тхокампи анавасесетва̄ диннам̣ ниравасесада̄нам̣ на̄ма, там̣ махаппхалам̣ хоти. со татха̄ каронто саббам̣ датва̄ пуна вандитва̄ а̄ха – ‘‘бханте, екам̣ бхаттапа̄тим̣ нисса̄йа тӣн̣и сам̣ваччхара̄ни ме парагехе бхатим̣ каронтена дуккхам̣ анубхӯтам̣, ида̄ни ме ниббаттаниббаттат̣т̣ха̄не сукхамева хоту, тумхехи дит̣т̣хадхаммассева бха̄гӣ асса’’нти. паччекабуддхо ‘‘евам̣ хоту, чинта̄ман̣и вийа те саббака̄мададо маносан̇каппа̄ пун̣н̣ачандо вийа пӯрентӯ’’ти анумоданам̣ каронто –

‘‘иччхитам̣ паттхитам̣ туйхам̣, саббамева самиджджхату;

саббе пӯренту сан̇каппа̄, чандо паннарасо йатха̄.

‘‘иччхитам̣ паттхикам̣ туйхам̣, кхиппамева самиджджхату;

саббе пӯренту сан̇каппа̄, ман̣и джотирасо йатха̄’’ти. –

ватва̄ ‘‘айам̣ маха̄джано йа̄ва гандхама̄данапаббатагамана̄ мам̣ пассанто тит̣т̣хатӯ’’ти адхит̣т̣ха̄йа а̄ка̄сена гандхама̄данам̣ агама̄си.

маха̄джанопи нам̣ пассантова ат̣т̣ха̄си. со таттха гантва̄ там̣ пин̣д̣апа̄там̣ пан̃часата̄нам̣ паччекабуддха̄нам̣ вибхаджитва̄ ада̄си. саббе аттано пахонакам̣ ган̣хим̣су. ‘‘аппо пин̣д̣апа̄то катхам̣ пахосӣ’’ти на чинтетаббам̣. чатта̄ри хи ачинтеййа̄ни (а. ни. 4.77) вутта̄ни, татра̄йам̣ паччекабуддхависайоти. маха̄джано паччекабуддха̄нам̣ пин̣д̣апа̄там̣ вибхаджитва̄ диййама̄нам̣ дисва̄ са̄дхука̄расахасса̄ни паваттеси, асанисатанипа̄касаддо вийа ахоси. там̣ сутва̄ гандхасет̣т̣хи чинтеси – ‘‘бхаттабхатико майа̄ диннасампаттим̣ дха̄ретум̣ на̄саккхи ман̃н̃е, тена̄йам̣ маха̄джано париха̄сам̣ каронто саннипатито надатӣ’’ти. со таппаваттиджа̄нанаттхам̣ мануссе песеси. те а̄гантва̄ ‘‘сампаттидха̄рака̄ на̄ма, са̄ми, евам̣ хонтӯ’’ти ватва̄ там̣ паваттим̣ а̄рочесум̣. сет̣т̣хи там̣ сутва̄ва пан̃чаван̣н̣а̄йа пӣтийа̄ пхут̣т̣хасарӣро хутва̄ ‘‘ахо дуккарам̣ тена катам̣, ахам̣ еттакам̣ ка̄лам̣ еварӯпа̄йа сампаттийа̄ т̣хито кин̃чи да̄тум̣ на̄саккхи’’нти там̣ паккоса̄петва̄ ‘‘саччам̣ кира тайа̄ идам̣ на̄ма ката’’нти пуччхитва̄ ‘‘а̄ма, са̄мӣ’’ти вутте, ‘‘ханда, сахассам̣ гахетва̄ тава да̄не майхампи паттим̣ дехӣ’’ти а̄ха. со татха̄ ака̄си. сет̣т̣хиписса саббам̣ аттано сантакам̣ маджджхе бхиндитва̄ ада̄си.

чатассо хи сампада̄ на̄ма – ваттхусампада̄, паччайасампада̄, четана̄сампада̄, гун̣а̄тирекасампада̄ти. таттха ниродхасама̄паттирахо араха̄ ва̄ ана̄га̄мӣ ва̄ даккхин̣еййо ваттхусампада̄ на̄ма. паччайа̄нам̣ дхаммена самена уппатти паччайасампада̄ на̄ма. да̄нато пуббе да̄нака̄ле паччха̄ бха̄гети тӣсу ка̄лесу четана̄йа соманассасахагатан̃а̄н̣асампайуттабха̄во четана̄сампада̄ на̄ма. даккхин̣еййасса сама̄паттито вут̣т̣хитабха̄во гун̣а̄тирекасампада̄ на̄ма̄ти. имасса ча кхӣн̣а̄саво паччекабуддхо даккхин̣еййа̄, бхатим̣ катва̄ ладдхабха̄вена паччайо дхаммато уппанно, тӣсу ка̄лесу парисуддха̄ четана̄, сама̄паттито вут̣т̣хитаматто паччекабуддхо гун̣а̄тирекоти чатассопи сампада̄ ниппханна̄. ета̄сам̣ а̄нубха̄вена дит̣т̣хева дхамме маха̄сампаттим̣ па̄пун̣анти. тасма̄ со сет̣т̣хино сантика̄ сампаттим̣ лабхи. апарабха̄ге ча ра̄джа̄пи имина̄ катакаммам̣ сутва̄ там̣ паккоса̄петва̄ сахассам̣ датва̄ паттим̣ гахетва̄ тут̣т̣хама̄насо махантам̣ бхогаккхандхам̣ датва̄ сет̣т̣хит̣т̣ха̄нам̣ ада̄си. бхаттабхатикасет̣т̣хӣтисса на̄мам̣ ака̄си. со гандхасет̣т̣хина̄ саддхим̣ саха̄йо хутва̄ екато кха̄данто пиванто йа̄вата̄йукам̣ т̣хатва̄ тато чуто девалоке ниббаттитва̄ екам̣ буддхантарам̣ диббасампаттим̣ анубхавитва̄ имасмим̣ буддхуппа̄де са̄ваттхийам̣ са̄рипуттаттхерассӯпат̣т̣ха̄какуле пат̣исандхим̣ ган̣хи. атхасса ма̄та̄ ладдхагаббхапариха̄ра̄ катипа̄хаччайена ‘‘ахо вата̄хам̣ пан̃часатехи бхиккхӯхи саддхим̣ са̄рипуттаттхерасса сатарасабходжанам̣ датва̄ ка̄са̄йаваттханиваттха̄ суван̣н̣асаракам̣ а̄да̄йа а̄санапарийанте нисинна̄ тесам̣ бхиккхӯнам̣ уччхит̣т̣ха̄васесакам̣ парибхун̃джеййа’’нти дохал̣инӣ хутва̄ татхева катва̄ дохал̣ам̣ пат̣ивинодеси. са̄ сесаман̇галесупи татха̄рӯпамева да̄нам̣ датва̄ путтам̣ виджа̄йитва̄ на̄маггахан̣адивасе ‘‘путтасса ме, бханте, сиккха̄пада̄ни детха̄’’ти тхерам̣ а̄ха. тхеро ‘‘кимасса на̄ма’’нти пуччхи. ‘‘бханте, путтасса ме пат̣исандхиггахан̣ато пат̣т̣ха̄йа имасмим̣ гехе кассачи дуккхам̣ на̄ма на бхӯтапуббам̣, теневасса сукхакума̄роти на̄мам̣ бхависсатӣ’’ти вутте тадевасса на̄мам̣ гахетва̄ сиккха̄пада̄ни ада̄си.

тада̄ еван̃часса ма̄ту ‘‘на̄хам̣ мама путтасса аджджха̄сайам̣ бхиндисса̄мӣ’’ти читтам̣ уппаджджи. са̄ тасса кан̣н̣авиджджханаман̇гала̄дӣсупи татхева да̄нам̣ ада̄си. кума̄ропи саттавассикака̄ле ‘‘иччха̄махам̣, амма, тхерасса сантике паббаджиту’’нти а̄ха. са̄ ‘‘са̄дху, та̄та, на̄хам̣ тава аджджха̄сайам̣ бхиндисса̄мӣ’’ти тхерам̣ нимантетва̄ бходжетва̄, ‘‘бханте, путто ме паббаджитум̣ иччхати, има̄хам̣ са̄йанхасамайе виха̄рам̣ а̄несса̄мӣ’’ти тхерам̣ уййоджетва̄ н̃а̄таке саннипа̄тетва̄ ‘‘путтасса ме гихика̄ле каттаббам̣ киччам̣ аджджева карисса̄ма̄’’ти ватва̄ путтам̣ алан̇каритва̄ махантена сирисобхаггена виха̄рам̣ нетва̄ тхерасса ниййа̄деси. тхеропи там̣, ‘‘та̄та, паббаджджа̄ на̄ма дуккара̄, саккхиссаси абхирамиту’’нти ватва̄ ‘‘карисса̄ми во, бханте, ова̄да’’нти вутте каммат̣т̣ха̄нам̣ датва̄ пабба̄джеси. ма̄та̄питарописса паббаджджа̄йа сакка̄рам̣ каронта̄ антовиха̄рейева сатта̄хам̣ буддхаппамукхасса бхиккхусан̇гхасса сатарасабходжанам̣ датва̄ са̄йам̣ аттано гехам̣ агамам̣су. ат̣т̣хаме дивасе са̄рипуттаттхеро бхиккхусан̇гхе га̄мам̣ павит̣т̣хе виха̄ре каттаббакиччам̣ катва̄ са̄ман̣ерам̣ паттачӣварам̣ га̄ха̄петва̄ га̄мам̣ пин̣д̣а̄йа па̄виси. са̄ман̣еро антара̄магге ма̄тика̄дӣни дисва̄ пан̣д̣итаса̄ман̣еро вийа пуччхи. тхеропи тасса татхева бйа̄ка̄си. са̄ман̣еро та̄ни ка̄ран̣а̄ни сутва̄ ‘‘саче тумхе аттано паттачӣварам̣ ган̣хеййа̄тха, ахам̣ ниваттеййа’’нти ватва̄ тхерена тасса аджджха̄сайам̣ абхиндитва̄, ‘‘са̄ман̣ера, дехи мама паттачӣвара’’нти паттачӣваре гахите тхерам̣ вандитва̄ ниваттама̄но, ‘‘бханте, майхам̣ а̄ха̄рам̣ а̄харама̄но сатарасабходжанам̣ а̄хареййа̄тха̄’’ти а̄ха. куто там̣ лабхисса̄мӣти? аттано пун̃н̃ена алабханто мама пун̃н̃ена лабхиссатха, бхантети. атхасса тхеро кун̃чикам̣ датва̄ га̄мам̣ пин̣д̣а̄йа па̄виси. сопи виха̄рам̣ а̄гантва̄ тхерасса габбхам̣ виваритва̄ пависитва̄ два̄рам̣ пидха̄йа аттано ка̄йе н̃а̄н̣ам̣ ота̄ретва̄ нисӣди.

тасса гун̣атеджена саккасса а̄санам̣ ун̣ха̄ка̄рам̣ дассеси. сакко ‘‘ким̣ ну кхо ета’’нти олокенто са̄ман̣ерам̣ дисва̄ ‘‘сукхаса̄ман̣еро аттано упаджджха̄йасса паттачӣварам̣ датва̄ ‘саман̣адхаммам̣ карисса̄мӣ’ти ниватто, майа̄ таттха гантум̣ ват̣т̣атӣ’’ти чинтетва̄ чатта̄ро маха̄ра̄дже паккоса̄петва̄ ‘‘гаччхатха, та̄та̄, виха̄рассӯпаване дуссаддаке сакун̣е пала̄петха̄’’ти уййоджеси. те татха̄ катва̄ са̄манта̄ а̄раккхам̣ ган̣хим̣су. чандимасӯрийе ‘‘аттано вима̄на̄ни гахетва̄ тит̣т̣хатха̄’’ти а̄н̣а̄песи. тепи татха̄ карим̣су. сайампи а̄вин̃чханат̣т̣ха̄не а̄раккхам̣ ган̣хи. виха̄ро саннисинно нираво ахоси. са̄ман̣еро екаггачиттена випассанам̣ вад̣д̣хетва̄ тӣн̣и маггапхала̄ни па̄пун̣и. тхеро ‘‘са̄ман̣ерена ‘сатарасабходжанам̣ а̄хареййа̄тха̄’ти вуттам̣, касса ну кхо гхаре сакка̄ ладдху’’нти олокенто екам̣ аджджха̄сайасампаннам̣ упат̣т̣ха̄катулам̣ дисва̄ таттха гантва̄, ‘‘бханте, са̄дху во катам̣ аджджа идха̄гаччхантехӣ’’ти техи тут̣т̣хама̄насехи паттам̣ гахетва̄ нисӣда̄петва̄ йа̄гукхаджджакам̣ датва̄ йа̄ва бхаттака̄лам̣ дхаммакатхам̣ йа̄чито тесам̣ са̄ран̣ӣйадхаммакатхам̣ катхетва̄ ка̄лам̣ саллаккхетва̄ десанам̣ нит̣т̣ха̄песи. атхасса сатарасабходжанам̣ датва̄ там̣ а̄да̄йа гантука̄мам̣ тхерам̣ дисва̄ ‘‘бхун̃джатха, бханте, апарампи те дасса̄ма̄’’ти тхерам̣ бходжетва̄ пуна паттапӯрам̣ адам̣су. тхеро там̣ а̄да̄йа ‘‘са̄ман̣еро ме чха̄то’’ти туритатурито виха̄рам̣ па̄йа̄си. там̣ дивасам̣ саттха̄ па̄това никкхамитва̄ гандхакут̣ийам̣ нисиннова а̄ваджджеси – ‘‘аджджа сукхаса̄ман̣еро упаджджха̄йасса паттачӣварам̣ датва̄ ‘саман̣адхаммам̣ карисса̄мӣ’ти ниватто, ниппханнам̣ ну кхо тасса кичча’’нти. со тин̣н̣ам̣йева маггапхала̄нам̣ паттабха̄вам̣ дисва̄ уттарипи упадха̄ренто ‘‘саккхиссата̄йам̣ аджджа арахаттам̣ па̄пун̣итум̣, са̄рипутто пана ‘са̄ман̣еро ме чха̄то’ти вегена бхаттам̣ а̄да̄йа никкхамати, саче имасмим̣ арахаттам̣ аппатте бхаттам̣ а̄хариссати, имасса антара̄йо бхависсати, майа̄ гантва̄ два̄ракот̣т̣хаке а̄раккхам̣ ган̣хитум̣ ват̣т̣атӣ’’ти чинтетва̄ гандхакут̣ито никкхамитва̄ два̄ракот̣т̣хаке т̣хатва̄ а̄раккхам̣ ган̣хи.

тхеропи бхаттам̣ а̄хари. атха нам̣ хет̣т̣ха̄ вуттанайенева чатта̄ро пан̃хе пуччхи. пан̃хависсаджджана̄васа̄не са̄ман̣еро арахаттам̣ па̄пун̣и. саттха̄ тхерам̣ а̄мантетва̄ ‘‘гаччха, са̄рипутта, са̄ман̣ерасса те бхаттам̣ дехӣ’’ти а̄ха. тхеро гантва̄ два̄рам̣ а̄кот̣еси. са̄ман̣еропи никкхамитва̄ упаджджха̄йасса ваттам̣ катва̄ ‘‘бхаттакиччам̣ карохӣ’’ти вутте тхерасса бхаттена анаттхикабха̄вам̣ н̃атва̄ саттавассикакума̄ро тан̇кхан̣ан̃н̃ева арахаттам̣ патто нӣча̄санат̣т̣ха̄нам̣ паччавеккханто бхаттакиччам̣ катва̄ паттам̣ дхови. тасмим̣ ка̄ле чатта̄ро маха̄ра̄джа̄но а̄раккхам̣ виссаджджесум̣. чандимасӯрийа̄пи вима̄на̄ни мун̃чим̣су. саккопи а̄вин̃чханат̣т̣ха̄не а̄раккхам̣ виссаджджеси. сӯрийо набхамаджджхам̣ атиккантойева пан̃н̃а̄йи. бхиккхӯ ‘‘са̄йанхо пан̃н̃а̄йати, са̄ман̣ерена ча ида̄нева бхаттакиччам̣ катам̣, ким̣ ну кхо аджджа пуббан̣хо балава̄ джа̄то, са̄йанхо мандо’’ти вадим̣су. саттха̄ а̄гантва̄ ‘‘ка̄йа нуттха, бхиккхаве, етарахи катха̄йа саннисинна̄’’ти пуччхитва̄, ‘‘бханте, аджджа пуббан̣хо балава̄ джа̄то, са̄йанхо мандо, са̄ман̣ерена ча ида̄нева бхаттакиччам̣ катам̣, атха ча пана сӯрийо набхамаджджхам̣ атиккантойева пан̃н̃а̄йатӣ’’ти вутте, ‘‘бхиккхаве, евамевам̣ хоти пун̃н̃аванта̄нам̣ саман̣адхаммакаран̣ака̄ле. аджджа хи чатта̄ро маха̄ра̄джа̄но са̄манта̄ а̄раккхам̣ ган̣хим̣су, чандимасӯрийа̄ вима̄на̄ни гахетва̄ ат̣т̣хам̣су, сакко а̄вин̃чханаке а̄раккхам̣ ган̣хи, ахампи два̄ракот̣т̣хаке а̄раккхам̣ ган̣хим̣, аджджа сукхаса̄ман̣еро ма̄тика̄йа удакам̣ харанте, усука̄ре усум̣ уджум̣ каронте, таччхаке чакка̄дӣни каронте дисва̄ атта̄нам̣ даметва̄ арахаттам̣ патто’’ти ватва̄ имам̣ га̄тхама̄ха –

145. ‘‘удакан̃хи найанти неттика̄, усука̄ра̄ намайанти теджанам̣;

да̄рум̣ намайанти таччхака̄, атта̄нам̣ дамайанти суббата̄’’ти.

таттха суббата̄ти сувада̄, сукхена овадитабба̄ ануса̄ситабба̄ти аттхо. сесам̣ хет̣т̣ха̄ вуттанайамева.

десана̄васа̄не бахӯ сота̄паттипхала̄дӣни па̄пун̣им̣сӯти.

сукхаса̄ман̣ераваттху ека̄дасамам̣.

дан̣д̣аваггаван̣н̣ана̄ нит̣т̣хита̄.

дасамо вагго.