1. акиттичарийа̄ван̣н̣ана̄

3. евам̣ бхагава̄ а̄йасмато са̄рипуттаттхерасса садеваманусса̄йа ча париса̄йа аттано пуббачарийа̄йа саване усса̄хам̣ джанетва̄ ида̄ни там̣ пуббачаритам̣ бхавантарапат̣иччханнам̣ хаттхатале а̄малакам̣ вийа паччаккхам̣ каронто ‘‘йада̄ ахам̣ браха̄ран̃н̃е’’тиа̄дима̄ха.

таттха йада̄ти йасмим̣ ка̄ле. браха̄ран̃н̃ети маха̄аран̃н̃е, аран̃н̃а̄нийам̣, маханте ванети аттхо. сун̃н̃ети джанавивитте. випинака̄нанети випинабхӯте ка̄нане, пададвайена̄пи тасса аран̃н̃асса гаханабха̄вамева дӣпети, саббаметам̣ ка̄радӣпам̣ сандха̄йа вуттам̣. аджджхога̄хетва̄ти анупависитва̄. вихара̄мӣти диббабрахмаарийаа̄нен̃джавиха̄рехи самуппа̄дитасукхависесена ирийа̄патхавиха̄рена сарӣрадуккхам̣ виччхиндитва̄ хара̄ми аттабха̄вам̣ паваттеми. акитти на̄ма та̄пасоти евам̣на̄мако та̄пасо хутва̄ йада̄ ахам̣ тасмим̣ аран̃н̃е вихара̄мӣти аттхо. саттха̄ тада̄ аттано акиттита̄пасабха̄вам̣ дхаммасена̄патисса вадати. татра̄йам̣ анупуббикатха̄ –

атӣте кира имасмим̣йева бхаддакаппе ба̄ра̄н̣асийам̣ брахмадатте на̄ма ра̄джини раджджам̣ ка̄ренте бодхисатто асӣтикот̣ивибхавасса бра̄хман̣амаха̄са̄ласса куле ниббатти, ‘‘акиттӣ’’тисса на̄мам̣ карим̣су. тасса падаса̄ гаманака̄ле бхагинӣпи джа̄йи. ‘‘йасаватӣ’’тисса̄ на̄мам̣ карим̣су. со сол̣асавассака̄ле таккасилам̣ гантва̄ саббасиппа̄ни уггахетва̄ пачча̄гама̄си. атхасса ма̄та̄питаро ка̄ламакам̣су. со тесам̣ петакичча̄ни ка̄ретва̄ катипайадиваса̄тиккамена ратана̄валоканам̣ а̄йуттакапурисехи ка̄райама̄но ‘‘еттакам̣ маттикам̣, еттакам̣ петтикам̣, еттакам̣ пита̄маха’’нти сутва̄ сам̣виггама̄насо хутва̄ ‘‘идам̣ дханамева пан̃н̃а̄йати, на дханасса сам̣ха̄рака̄, саббе имам̣ дханам̣ паха̄йева гата̄, ахам̣ пана нам̣ а̄да̄йа гамисса̄мӣ’’ти ра̄джа̄нам̣ а̄пуччхитва̄ бхерим̣ чара̄песи – ‘‘дханена аттхика̄ акиттипан̣д̣итасса гехам̣ а̄гаччхантӯ’’ти.

со сатта̄хам̣ маха̄да̄нам̣ паваттетва̄ дхане акхӣйама̄не ‘‘ким̣ ме има̄йа дханакӣл̣а̄йа, аттхика̄ ган̣хиссантӣ’’ти нивесанадва̄рам̣ виваритва̄ хиран̃н̃асуван̣н̣а̄дибхарите са̄рагаббхе вивара̄петва̄ ‘‘диннам̣йева харантӯ’’ти гехам̣ паха̄йа н̃а̄типариват̣т̣асса паридевантасса бхагиним̣ гахетва̄ ба̄ра̄н̣асито никкхамитва̄ надим̣ уттаритва̄ две тӣн̣и йоджана̄ни гантва̄ паббаджитва̄ раман̣ӣйе бхӯмибха̄ге пан̣н̣аса̄лам̣ каритва̄ васати. йена пана два̄рена тада̄ никкхами, там̣ акиттидва̄рам̣ на̄ма джа̄там̣. йена титтхена надим̣ отин̣н̣о, там̣ акиттититтхам̣ на̄ма джа̄там̣. тасса паббаджитабха̄вам̣ сутва̄ бахӯ манусса̄ га̄манигамара̄джадха̄нива̄сино тасса гун̣ехи а̄кад̣д̣хийама̄нахадайа̄ анупаббаджим̣су. маха̄парива̄ро ахоси, маха̄ла̄бхасакка̄ро ниббатти, буддхуппа̄до вийа ахоси. атха маха̄сатто ‘‘айам̣ ла̄бхасакка̄ро маха̄, парива̄ропи маханто, ка̄йавивекаматтампи идха на лабхати, майа̄ ека̄кина̄ вихаритум̣ ват̣т̣атӣ’’ти чинтетва̄ парамаппиччхабха̄вато вивеканинната̄йа ча кассачи аджа̄на̄петва̄ екакова никкхамитва̄ анупуббена дамил̣арат̣т̣хам̣ патва̄ ка̄вӣрапат̣т̣анасамӣпе уййа̄не вихаранто джха̄на̄бхин̃н̃а̄йо ниббаттеси. татра̄писса маха̄ла̄бхасакка̄ро уппаджджи. со там̣ джигуччханто чхад̣д̣етва̄ а̄ка̄сена гантва̄ ка̄радӣпе отари. тада̄ ка̄радӣпо ахидӣпо на̄ма. со таттха махантам̣ ка̄раруккхам̣ упанисса̄йа пан̣н̣аса̄лам̣ ма̄петва̄ ва̄сам̣ каппеси. аппиччхата̄йа пана каттхачи агантва̄ тасса руккхасса пхалака̄ле пхала̄ни кха̄данто пхале асати патта̄ни удакаситта̄ни кха̄данто джха̄насама̄паттӣхи вӣтина̄меси.

тасса сӣлатеджена саккасса пан̣д̣укамбаласила̄санам̣ ун̣ха̄ка̄рам̣ дассеси. сакко ‘‘ко ну кхо мам̣ имамха̄ т̣ха̄на̄ ча̄ветука̄мо’’ти а̄вадждженто пан̣д̣итам̣ дисва̄ ‘‘киматтхам̣ ну кхо айам̣ та̄пасо евам̣ дуккарам̣ тапам̣ чарати, саккаттам̣ ну кхо паттхети, уда̄ху ан̃н̃ам̣, вӣмам̣сисса̄ми нам̣. айан̃хи сувисуддхака̄йавачӣманосама̄ча̄ро джӣвите нирапеккхо удакаситта̄ни ка̄рапатта̄ни кха̄дати, саче саккаттам̣ паттхети аттано ситта̄ни ка̄рапатта̄ни майхам̣ дассати, но че, на дассатӣ’’ти бра̄хман̣аван̣н̣ена тасса сантикам̣ агама̄си. бодхисаттопи ка̄рапатта̄ни седетва̄ ‘‘сӣталӣбхӯта̄ни кха̄дисса̄мӣ’’ти пан̣н̣аса̄ладва̄ре нисӣди. атхасса пурато сакко бра̄хман̣арӯпена бхиккха̄йа аттхико хутва̄ ат̣т̣ха̄си. маха̄сатто там̣ дисва̄ ‘‘ла̄бха̄ вата ме, суладдхам̣ вата ме, чирассам̣ вата ме йа̄чако дит̣т̣хо’’ти соманассаппатто хутва̄ ‘‘аджджа мама маноратхам̣ маттхакам̣ па̄петва̄ да̄нам̣ дасса̄мӣ’’ти паккабха̄джаненева а̄да̄йа гантва̄ да̄напа̄рамим̣ а̄ваджджетва̄ аттано асесетва̄ва тасса бхиккха̄бха̄джане паккхипи. сакко там̣ гахетва̄ тхокам̣ гантва̄ антарадха̄йи. маха̄саттопи тасса датва̄ пуна парийет̣т̣хим̣ ана̄паджджитва̄ тенева пӣтисукхена вӣтина̄меси.

дутийадивасе пана ка̄рапатта̄ни пачитва̄ ‘‘хиййо даккхин̣еййам̣ алабхим̣, аджджа ну кхо катха’’нти пан̣н̣аса̄ладва̄ре нисӣди. саккопи татхева а̄гами. маха̄сатто пунапи татхева датва̄ вӣтина̄меси. татийадивасе ча татхева датва̄ ‘‘ахо вата ме ла̄бха̄, бахум̣ вата пун̃н̃ам̣ пасава̄ми, сача̄хам̣ даккхин̣еййам̣ лабхеййам̣, евамева ма̄сампи двема̄сампи да̄нам̣ дадеййа’’нти чинтеси. тӣсупи дивасесу ‘‘тена да̄нена на ла̄бхасакка̄расилокам̣ на чаккаваттисампаттим̣ на саккасампаттим̣ на брахмасампаттим̣ на са̄вакабодхим̣ на паччекабодхим̣ паттхеми, апи ча идам̣ ме да̄нам̣ саббан̃н̃утан̃н̃а̄н̣асса паччайо хотӯ’’ти йатха̄дхика̄рам̣ читтам̣ т̣хапеси. тена вуттам̣ –

4. ‘‘тада̄ мам̣ тапатеджена, сантатто тидива̄бхибхӯ;

дха̄ренто бра̄хман̣аван̣н̣ам̣, бхиккха̄йа мам̣ упа̄гами.

5. ‘‘павана̄ а̄бхатам̣ пан̣н̣ам̣, ателан̃ча алон̣икам̣;

мама два̄ре т̣хитам̣ дисва̄, сакат̣а̄хена а̄кирим̣.

6. ‘‘тасса датва̄нахам̣ пан̣н̣ам̣, никуджджитва̄на бха̄джанам̣;

пунесанам̣ джахитва̄на, па̄висим̣ пан̣н̣аса̄лакам̣.

7. ‘‘дутийампи татийампи, упаган̃чхи мамантикам̣;

акампито анолагго, евамевамада̄сахам̣.

8. ‘‘на ме таппаччайа̄ аттхи, сарӣрасмим̣ виван̣н̣ийам̣;

пӣтисукхена ратийа̄, вӣтина̄меми там̣ дивам̣.

9. ‘‘йади ма̄сампи двема̄сам̣, даккхин̣еййам̣ варам̣ лабхе;

акампито анолӣно, дадеййам̣ да̄намуттамам̣.

10. ‘‘на тасса да̄нам̣ дадама̄но, йасам̣ ла̄бхан̃ча паттхайим̣;

саббан̃н̃утам̣ паттхайа̄но, та̄ни камма̄ни а̄чари’’нти.

таттха тада̄ти йада̄ ахам̣ акиттина̄мако та̄пасо хутва̄ тасмим̣ дӣпе ка̄ра̄ран̃н̃е вихара̄ми, тада̄. манти мама. тапатеджена̄ти сӣлапа̄рамита̄нубха̄вена. сӣлан̃хи дуччаритасам̣килесасса тапанато ‘‘тапо’’ти вуччати, неккхаммавӣрийапа̄рамита̄нубха̄вена ва̄. та̄пи хи тан̣ха̄сам̣килесасса косаджджасса ча тапанато ‘‘тапо’’ти вуччати, уккам̣сагата̄ ча та̄ бодхисаттасса имасмим̣ аттабха̄вети. кхантисам̣варасса ча̄пи парамуккам̣сагаманато ‘‘кхантипа̄рамита̄нубха̄вена̄’’типи ваттум̣ ват̣т̣атева. ‘‘кхантӣ парамам̣ тапо’’ти (дӣ. ни. 2.90; дха. па. 184) хи вуттам̣. сантаттоти йатха̄вуттагун̣а̄нубха̄ваджанитена дхаммата̄сиддхена пан̣д̣укамбаласила̄санасса ун̣ха̄ка̄рена санта̄пито. тидива̄бхибхӯти девалока̄дхипати, саккоти аттхо. пан̣н̣аса̄ла̄йа самӣпе гахитампи ка̄рапан̣н̣ам̣ пан̣н̣аса̄ла̄йа аран̃н̃амаджджхагататта̄ ‘‘павана̄ а̄бхата’’нти вуттам̣.

ателан̃ча алон̣иканти деййадхаммасса анул̣а̄рабха̄вепи аджджха̄сайасампаттийа̄ да̄надхаммасса маха̄джутикабха̄вам̣ дассетум̣ вуттам̣. мама два̄рети майхам̣ пан̣н̣аса̄ла̄йа два̄ре. сакат̣а̄хена а̄киринти имина̄ аттано кин̃чипи асесетва̄ диннабха̄вам̣ дассети.

пунесанам̣ джахитва̄на̄ти ‘‘екадивасам̣ двиккхаттум̣ гха̄сесанам̣ на саллекха’’нти чинтетва̄ да̄напӣтийа̄ титто вийа хутва̄ тасмим̣ дивасе пуна а̄ха̄рапарийет̣т̣хим̣ акатва̄.

акампитоти судӯравиккхамбхитатта̄ маччхарийена ачалито да̄наджджха̄сайато чаланаматтампи ака̄рито. анолагготи лобхавасена ӣсакампи алагго. татийампӣти пи-саддена дутийампӣти имам̣ сампин̣д̣ети. евамевамада̄саханти йатха̄ пат̣хамам̣, евамевам̣ дутийампи, татийампи ада̄сим̣ ахам̣.

на ме таппаччайа̄ти га̄тха̄йа вуттамеваттхам̣ па̄кат̣ам̣ кароти. таттха таппаччайа̄ти да̄напаччайа̄ тӣсу дивасесу чхинна̄ха̄рата̄йа сарӣрасмим̣ йена веван̣н̣ийена бхавитаббам̣, тампи ме сарӣрасмим̣ виван̣н̣ийам̣ да̄напаччайа̄йева наттхи. касма̄? да̄нависайена пӣтисукхена да̄нависайа̄йа ева ча ратийа̄. вӣтина̄меми там̣ диванти там̣ сакалам̣ тиматтадивасам̣ вӣтина̄меми, на кевалан̃ча тӣн̣и ева диваса̄ни, атха кхо ма̄садвима̄саматтампи ка̄лам̣, евамева да̄тум̣ пахомӣти дассетум̣ ‘‘йади ма̄сампӣ’’тиа̄ди вуттам̣. анолӣноти алӣначитто, да̄не асан̇кучитачиттоти аттхо.

тасса̄ти бра̄хман̣арӯпена а̄гатасса саккасса. йасанти киттим̣, парива̄расампаттим̣ ва̄. ла̄бхан̃ча̄ти девамануссесу чаккаваттиа̄дибха̄вена ладдхаббам̣ ла̄бхам̣ ва̄ на паттхайим̣. атха кхо саббан̃н̃утам̣ самма̄самбодхим̣ паттхайа̄но а̄кан̇кхама̄но та̄ни тӣсу дивасесу анекава̄рам̣ уппанна̄ни да̄намайа̄ни пун̃н̃акамма̄ни да̄насса ва̄ парива̄рабхӯта̄ни ка̄йасучарита̄дӣни пун̃н̃акамма̄ни а̄чарим̣ ака̄синти.

ити бхагава̄ тасмим̣ аттабха̄ве аттано судуккарам̣ пун̃н̃ачаритаматтамева идха маха̄тхерасса пака̄сеси. джа̄такадесана̄йам̣ пана чатуттхадивасе саккасса упасан̇камитва̄ бодхисаттасса аджджха̄сайаджа̄нанам̣ варена упанимантана̄ бодхисаттасса варасампат̣иччханасӣсена дхаммадесана̄ деййадхаммадаккхин̣еййа̄нам̣ пуна саккасса ана̄гаманасса ча а̄кан̇кхама̄ната̄ ча пака̄сита̄. вуттан̃хетам̣ –

‘‘акиттим̣ дисва̄на саммантам̣, сакко бхӯтапатӣ брави;

ким̣ паттхайам̣ маха̄брахме, еко саммаси гхаммани.

‘‘дуккхо пунаббхаво сакка, сарӣрасса ча бхеданам̣;

саммохамаран̣ам̣ дуккхам̣, тасма̄ самма̄ми, ва̄сава.

‘‘етасмим̣ те сулапите, патирӯпе субха̄сите;

варам̣ кассапа те дамми, йам̣ кин̃чи манасиччхаси.

‘‘варан̃че ме адо сакка, саббабхӯта̄намиссара;

йена путте ча да̄ре ча, дханадхан̃н̃ам̣ пийа̄ни ча;

ладдха̄ нара̄ на таппанти, со лобхо на майӣ васе.

етасмим̣ те сулапите…пе… манасиччхаси.

‘‘варан̃че ме адо сакка, саббабхӯта̄намиссара;

кхеттам̣ ваттхум̣ хиран̃н̃ан̃ча, гава̄ссам̣ да̄сапорисам̣;

йена джа̄тена джӣйанти, со досо на майӣ васе.

‘‘етасмим̣ те сулапите…пе… манасиччхаси.

‘‘варан̃че ме адо сакка, саббабхӯта̄намиссара;

ба̄лам̣ на пассе на сун̣е, на ча ба̄лена сам̣васе;

ба̄леналла̄пасалла̄пам̣, на каре на ча рочайе.

‘‘ким̣ ну те акарам̣ ба̄ло, вада кассапа ка̄ран̣ам̣;

кена кассапа ба̄ласса, дассанам̣ на̄бхикан̇кхаси.

‘‘анайам̣ найати думмедхо, адхура̄йам̣ нийун̃джати;

дуннайо сеййасо хоти, самма̄ вутто пакуппати;

винайам̣ со на джа̄на̄ти, са̄дху тасса адассанам̣.

‘‘етасмим̣ те сулапите…пе… манасиччхаси.

‘‘варан̃че ме адо сакка, саббабхӯта̄намиссара;

дхӣрам̣ пассе сун̣е дхӣрам̣, дхӣрена саха сам̣васе;

дхӣреналла̄пасалла̄пам̣, там̣ каре тан̃ча рочайе.

‘‘ким̣ ну те акарам̣ дхӣро, вада кассапа ка̄ран̣ам̣;

кена кассапа дхӣрасса, дассанам̣ абхикан̇кхаси.

‘‘найам̣ найати медха̄вӣ, адхура̄йам̣ на йун̃джати;

сунайо сеййасо хоти, самма̄ вутто на куппати;

винайам̣ со паджа̄на̄ти, са̄дху тена сама̄гамо.

‘‘етасмим̣ те сулапите…пе… манасиччхаси.

‘‘варан̃че ме адо сакка, саббабхӯта̄намиссара;

тато ратйа̄ виваса̄не, сӯрийуггаманам̣ пати;

дибба̄ бхаккха̄ па̄тубхавеййум̣, сӣлаванто ча йа̄чака̄.

‘‘дадато ме на кхӣйетха, датва̄ на̄нутапеййахам̣;

дадам̣ читтам̣ паса̄деййам̣, етам̣ сакка варам̣ варе.

‘‘етасмим̣ те сулапите…пе… манасиччхаси.

‘‘варан̃че ме адо сакка, саббабхӯта̄намиссара;

на мам̣ пуна упеййа̄си, етам̣ сакка варам̣ варе.

‘‘бахӯхи ватачарийа̄хи, нара̄ ча атха на̄рийо;

дассанам̣ абхикан̇кханти, ким̣ ну ме дассане бхайам̣.

‘‘там̣ та̄дисам̣ деваван̣н̣ам̣, саббака̄масамиддхинам̣;

дисва̄ тапо памаджджеййам̣, етам̣ те дассане бхайа’’нти. (джа̄. 1.13.83-103);

атха сакко ‘‘са̄дху, бханте, на те ито пат̣т̣ха̄йа сантикам̣ а̄гамисса̄мӣ’’ти там̣ абхива̄детва̄ пакка̄ми. маха̄сатто йа̄ваджӣвам̣ таттхева васанто а̄йупарийоса̄не брахмалоке ниббатти.

ануруддхаттхеро тада̄ сакко ахоси, локана̄тхо акиттипан̣д̣ито.

тасса маха̄бхиниккхаманасадисам̣ никкхантатта̄ неккхаммапа̄рамӣ. сувисуддхасӣла̄ча̄рата̄йа сӣлапа̄рамӣ. ка̄мавитакка̄дӣнам̣ сут̣т̣ху виккхамбхитатта̄ вӣрийапа̄рамӣ. кхантисам̣варасса парамуккам̣сагаманато кхантипа̄рамӣ. пат̣ин̃н̃а̄нурӯпам̣ пат̣ипаттийа̄ саччапа̄рамӣ. саббаттха ачаласама̄да̄на̄дхит̣т̣ха̄нена адхит̣т̣ха̄напа̄рамӣ. саббасаттесу хитаджджха̄сайена метта̄па̄рамӣ. саттасан̇кха̄ракатавиппака̄ресу маджджхаттабха̄ваппаттийа̄ упеккха̄па̄рамӣ. та̄сам̣ упака̄ра̄нупака̄ре дхамме джа̄нитва̄ анупака̄ре дхамме паха̄йа упака̄радхаммесу паватта̄панапуречара̄ сахаджа̄та̄ ча упа̄йакосаллабхӯта̄ атисаллекхавуттиса̄дханӣ ча пан̃н̃а̄ пан̃н̃а̄па̄рамӣти има̄пи даса па̄рамийо лаббханти.

да̄наджджха̄сайасса пана атиул̣а̄рабха̄вена да̄намукхена десана̄ паватта̄. тасма̄ саббаттха самака̄ маха̄карун̣а̄, двепи пун̃н̃ан̃а̄н̣асамбха̄ра̄, ка̄йасучарита̄дӣни тӣн̣и бодхисаттасучарита̄ни, сачча̄дхит̣т̣ха̄на̄дӣни чатта̄ри адхит̣т̣ха̄на̄ни, усса̄ха̄дайо чатассо буддхабхӯмийо, саддха̄дайо пан̃ча маха̄бодхипарипа̄чанӣйа̄ дхамма̄, алобхаджджха̄сайа̄дайо чха бодхисатта̄нам̣ аджджха̄сайа̄, тин̣н̣о та̄ресса̄мӣтиа̄дайо сатта пат̣ин̃н̃а̄ дхамма̄, аппиччхасса̄йам̣ дхаммо, на̄йам̣ дхаммо махиччхасса̄тиа̄дайо (дӣ. ни. 3.358; а. ни. 8.30) ат̣т̣ха маха̄пурисавитакка̄ (дӣ. ни. 3.358), нава йонисоманасика̄рамӯлака̄ дхамма̄, да̄наджджха̄сайа̄дайо даса маха̄пурисаджджха̄сайа̄, да̄насӣла̄дайо даса пун̃н̃акирийаваттхӯнӣти евама̄дайо йе анекасатаанекасахассаппабхеда̄ бодхисамбха̄рабхӯта̄ маха̄бодхисаттагун̣а̄. те саббепи йатха̄рахам̣ идха ниддха̄ретва̄ ваттабба̄.

апи четтха махантам̣ бхогаккхандхам̣ махантан̃ча н̃а̄типариват̣т̣ам̣ паха̄йа маха̄бхиниккхаманасадисам̣ гехато никкхаманам̣, никкхамитва̄ паббаджитасса бахуджанасамматасса сато парамаппиччхабха̄вена кулесу ган̣есу ча алаггата̄, аччантамева ла̄бхасакка̄расилокаджигуччха̄, павивека̄бхирати, ка̄йаджӣвитанирапеккхо паричча̄го, ана̄ха̄рассева сато дивасаттайампи да̄напӣтийа̄ паритут̣т̣хасса ниббика̄расарӣрайа̄панам̣, ма̄садвима̄саматтампи ка̄лам̣ йа̄чаке сати а̄ха̄рам̣ татхева датва̄ ‘‘да̄нагатенева пӣтисукхена сарӣрам̣ йа̄песса̄мӣ’’ти паричча̄ге анолӣнавуттиса̄дхако ул̣а̄ро да̄наджджха̄сайо, да̄нам̣ датва̄ пуна а̄ха̄рапарийет̣т̣хийа̄ акаран̣ахетубхӯта̄ парамасаллекхавуттӣти евама̄дайо маха̄саттасса гун̣а̄нубха̄ва̄ ведитабба̄. тенетам̣ вуччати –

‘‘евам̣ аччхарийа̄ хете, аббхута̄ ча махесино;

маха̄ка̄рун̣ика̄ дхӣра̄, саббалокекабандхава̄.

‘‘ачинтеййа̄нубха̄ва̄ ча, сада̄ саддхаммагочара̄;

бодхисатта̄ маха̄сатта̄, сучисаллекхавуттино.

‘‘маха̄ва̄тасамуддхата-вӣчима̄ло маходадхи;

апи лан̇гхеййа велантам̣, бодхисатта̄ на дхамматам̣.

‘‘локе сан̃джа̄таваддха̄пи, на те бха̄витабха̄вино;

лимпанти локадхаммехи, тойена падумам̣ йатха̄.

‘‘йесам̣ ве аттани снехо, нихӣйати йатха̄ йатха̄;

саттесу карун̣а̄снехо, вад̣д̣хатева татха̄ татха̄.

‘‘йатха̄ читтам̣ васе хоти, на ча читтаваса̄нуга̄;

татха̄ каммам̣ васе хоти, на ча каммаваса̄нуга̄.

‘‘досехи на̄бхибхӯйанти, самуггха̄тенти ва̄ на те;

чаранта̄ бодхипарийет̣т̣хим̣, пуриса̄джа̄нийа̄ будха̄.

‘‘тесу читтаппаса̄допи, дуккхато паримочайе;

пагева̄нукирийа̄ тесам̣, дхаммасса анудхаммато’’ти.

параматтхадӣпанийа̄ чарийа̄пит̣акасам̣ван̣н̣ана̄йа

акиттичарийа̄ван̣н̣ана̄ нит̣т̣хита̄.