6. дутийарам̣сисан̃н̃акаттхераапада̄наван̣н̣ана̄

паббате химавантамхӣтиа̄дикам̣ а̄йасмато дутийарам̣сисан̃н̃акаттхерасса апада̄нам̣. айампи пуримабуддхесу катакусало уппаннуппаннабхаве виват̣т̣ӯпаниссайа̄ни пун̃н̃а̄ни упачинанто пхуссасса бхагавато ка̄ле кулагехе ниббатто вуддхиппатто гхара̄ва̄сам̣ сан̣т̣хапетва̄ таттха досам̣ дисва̄ там̣ паха̄йа та̄пасапаббаджджам̣ паббаджитва̄ химавантапаббате васанто ва̄качӣранивасано вивекасукхена вихарати. тасмим̣ самайе со пхуссам̣ бхагавантам̣ там̣ падесам̣ сампаттам̣ дисва̄ тасса сарӣрато никкхантачхаббан̣н̣абуддхарам̣сийо ито чито видха̄вантийо дан̣д̣адӣпика̄никкхантавиппхурантамива дисва̄ тасмим̣ пасанно ан̃джалим̣ паггахетва̄ вандитва̄ читтам̣ паса̄детва̄ тенева пӣтисоманассена ка̄лам̣ катва̄ тусита̄дӣсу ниббатто таттха чха ка̄ма̄вачарасампаттийо ча анубхавитва̄ апарабха̄ге мануссасампаттийо ча анубхавитва̄ имасмим̣ буддхуппа̄де кулагехе ниббатто вуддхиппатто пуббава̄сана̄васена паббаджитва̄ начирассева араха̄ ахоси.

35. со апарабха̄ге пуббакаммам̣ саритва̄ соманассаджа̄то пуббачарита̄пада̄нам̣ пака̄сенто паббате химавантамхӣтиа̄дима̄ха. там̣ саббам̣ утта̄наттхамева̄ти.

дутийарам̣сисан̃н̃акаттхераапада̄наван̣н̣ана̄ саматта̄.