8. па̄т̣алипуппхийаттхераапада̄наван̣н̣ана̄

суван̣н̣аван̣н̣ам̣ самбуддхантиа̄дикам̣ а̄йасмато па̄т̣алипуппхийаттхерасса апада̄нам̣. айампи пуримаджинаваресу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто тиссасса бхагавато ка̄ле екасмим̣ кулагехе сет̣т̣хипутто хутва̄ ниббатто вуддхиппатто кусала̄кусалан̃н̃ӯ саттхари пасӣдитва̄ па̄т̣алипуппхам̣ гахетва̄ саттху пӯджеси. со тена пун̃н̃ена бахудха̄ сукхасампаттийо анубхаванто девамануссесу сам̣саранто имасмим̣ буддхуппа̄де кулагехе ниббатто вуддхиманва̄йа саттхари пасанно паббаджитва̄ начирассева араха̄ ахоси.

36. со апарабха̄ге аттано пуббакаммам̣ саритва̄ соманассаджа̄то пуббачарита̄пада̄нам̣ пака̄сенто суван̣н̣аван̣н̣ам̣ самбуддхантиа̄дима̄ха. таттха антара̄пан̣ети а̄ самантато хиран̃н̃асуван̣н̣а̄дикам̣ бхан̣д̣ам̣ пан̣енти виккин̣анти паттхаранти еттха̄ти а̄пан̣ам̣, а̄пан̣асса антарам̣ вӣтхӣти антара̄пан̣ам̣, тасмим̣ антара̄пан̣е. суван̣н̣аван̣н̣ам̣ кан̃чанаггхийасам̣ка̄сам̣ дваттим̣саваралаккхан̣ам̣ самбуддхам̣ дисва̄ па̄т̣алипуппхам̣ пӯджесинти аттхо. сесам̣ саббаттха утта̄наттхамева̄ти.

па̄т̣алипуппхийаттхераапада̄наван̣н̣ана̄ саматта̄.