1. сакачинтанийаттхераапада̄наван̣н̣ана̄

паванам̣ ка̄нанам̣ дисва̄тиа̄дикам̣ а̄йасмато сакачинтанийаттхерасса апада̄нам̣. айампи пуримабуддхесу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто випассисса бхагавато ка̄ле екасмим̣ кулагехе ниббатто вуддхиманва̄йа тасса бхагавато а̄йупарийоса̄не уппанно дхарама̄нам̣ бхагавантам̣ апа̄пун̣итва̄ париниббутака̄ле исипаббаджджам̣ паббаджитва̄ химаванте васанто вивекам̣ раман̣ӣйам̣ екам̣ ванам̣ патва̄ таттхевека̄йа кандара̄йа пулиначетийам̣ катва̄ бхагавати сан̃н̃ам̣ катва̄ садха̄тукасан̃н̃ан̃ча катва̄ ванапуппхехи пӯджетва̄ намассама̄но паричари. со тена пун̃н̃акаммена девамануссесу сам̣саранто двӣсу аггам̣ аггасампаттим̣ агган̃ча чаккаваттисампаттим̣ анубхавитва̄ имасмим̣ буддхуппа̄де екасмим̣ кулагехе ниббатто вибхавасампанно саддха̄сампанно саттхари пасӣдитва̄ паббаджитва̄ араха̄ чхал̣абхин̃н̃о ахоси.

1. со аттано пуббакаммам̣ саритва̄ соманассаджа̄то пуббачарита̄пада̄нам̣ пака̄сенто паванам̣ ка̄нанам̣ дисва̄тиа̄дима̄ха. таттха павананти пака̄рена ванам̣ паттхат̣ам̣ виттхин̣н̣ам̣ гаханабхӯтанти паванам̣. ка̄нанам̣ авакуччхитам̣ а̄нанам̣ аваханам̣ сататам̣ сӣхабйаггхайаккхараккхасамаддахаттхиассасупан̣н̣аурагехи вихан̇гаган̣асаддакуккут̣акокилехи ва̄ бахаланти ка̄нанам̣, там̣ ка̄нанасан̇кха̄там̣ паванам̣ мануссасаддавирахитатта̄ аппасаддам̣ ниссадданти аттхо. ана̄виланти на а̄вилам̣ упаддаварахитанти аттхо. исӣнам̣ анучин̣н̣анти буддхапаччекабуддхаарахантакхӣн̣а̄савасан̇кха̄та̄нам̣ исӣнам̣ анучин̣н̣ам̣ нисевитанти аттхо. а̄хутӣнам̣ пат̣иггаханти а̄хунам̣ вуччати пӯджа̄сакка̄рам̣ пат̣иггахам̣ гехасадисанти аттхо.

2. тхӯпам̣ катва̄на вел̣уна̄ти вел̣упесика̄хи четийам̣ катва̄ти аттхо. на̄на̄пуппхам̣ самокиринти чампака̄дӣхи анекехи пуппхехи самокирим̣ пӯджесинти аттхо. саммукха̄ вийа самбуддханти саджӣвама̄насса самбуддхасса саммукха̄ ива ниммитам̣ уппа̄дитам̣ четийам̣ ахам̣ абхи висесена вандим̣ пан̣а̄мамака̄синти аттхо. сесам̣ сувин̃н̃еййамева̄ти.

сакачинтанийаттхераапада̄наван̣н̣ана̄ саматта̄.