2. сатарам̣ситтхераапада̄наван̣н̣ана̄

уччийам̣ селама̄руйха̄тиа̄дикам̣ а̄йасмато сатарам̣ситтхерасса апада̄нам̣. айампи пуримабуддхесу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто падумуттарасса бхагавато ка̄ле бра̄хман̣акуле ниббатто вин̃н̃утам̣ патто саккат̣абйа̄каран̣е ведаттайе ча па̄ран̇гато гхара̄ва̄сам̣ паха̄йа аран̃н̃ам̣ пависитва̄ исипаббаджджам̣ паббаджитва̄ химаванте ва̄сам̣ каппеси. тасмим̣ самайе падумуттаро бхагава̄ вивекака̄мата̄йа уччам̣ екам̣ паббатам̣ а̄руйха джалитаггиккханто вийа нисӣди. там̣ татха̄нисиннам̣ бхагавантам̣ дисва̄ та̄пасо соманассаджа̄то ан̃джалим̣ паггайха анекехи ка̄ран̣ехи тхомеси. со тена пун̃н̃акаммена тато чуто чхасу ка̄ма̄вачарадевесу диббасампаттим̣ анубхавитва̄ тато мануссалоке сатарам̣сӣ на̄ма чаккаваттӣ ра̄джа̄ хутва̄ ниббатти. тампи сампаттим̣ анекаккхаттум̣ анубхавитва̄ имасмим̣ буддхуппа̄де екасмим̣ кулагехе ниббатто пуббапун̃н̃асамбха̄равасена н̃а̄н̣асса парипаккатта̄ саттавассикова паббаджитва̄ арахаттам̣ па̄пун̣и.

8-9. со ‘‘ахам̣ кена каммена саттавассикова сантипадам̣ ануппаттосмӣ’’ти сарама̄но пуббакаммам̣ н̃а̄н̣ена паччаккхато дисва̄ соманассаджа̄то пуббачарита̄пада̄нам̣ уда̄навасена пака̄сенто уччийам̣ селама̄руйха̄тиа̄дима̄ха. таттха уччийанти уччам̣ селамайам̣ паббатам̣ а̄руйха нисӣди падумуттароти самбандхо. паббатасса̄видӯрамхӣти бхагавато нисиннасса паббатасса а̄саннат̣т̣ха̄нети аттхо. бра̄хман̣о мантапа̄рагӯти мантасан̇кха̄тасса ведаттайасса па̄рам̣ парийоса̄нам̣ кот̣им̣ гато еко бра̄хман̣оти аттхо, ан̃н̃ам̣ вийа атта̄нам̣ ниддисати айам̣ мантапа̄рагӯти. упавит̣т̣хам̣ маха̄вӣранти тасмим̣ паббате нисиннам̣ вӣравантам̣ джинам̣, ким̣ висит̣т̣хам̣? девадевам̣ сакалачхака̄ма̄вачарабрахмадева̄нам̣ атидевам̣ нара̄сабхам̣ нара̄нам̣ а̄сатам̣ сет̣т̣хам̣ локана̄йакам̣ сакаласатталокам̣ найантам̣ нибба̄нам̣ па̄пентам̣ ахам̣ ан̃джалим̣ дасанакхасамодха̄нан̃джалипут̣ам̣ сираси муддхани паггахетва̄на патит̣т̣хапетва̄ сантхавим̣ сут̣т̣хум̣ тхомесинти самбандхо.

12. абха̄сатха̄ти ‘‘йена̄йам̣ ан̃джалӣ динно…пе… араха̄ со бхависсатӣ’’ти бйа̄ка̄си. сесам̣ утта̄наттхамева̄ти.

сатарам̣ситтхераапада̄наван̣н̣ана̄ саматта̄.