4. кимилаттхераапада̄наван̣н̣ана̄

чатуттха̄пада̄не ниббуте какусандхамхӣтиа̄дикам̣ а̄йасмато кимилаттхерасса апада̄нам̣. айампи пуримабуддхесу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто какусандхасса бхагавато ка̄ле кулагехе ниббаттитва̄ вин̃н̃утам̣ патто париниббуте саттхари тасса дха̄туйо уддисса салалама̄ла̄хи ман̣д̣апам̣ ка̄ретва̄ пӯджам̣ ака̄си. со тена пун̃н̃акаммена та̄ватим̣сесу уппаджджитва̄ апара̄парам̣ девамануссесу сам̣саранто имасмим̣ буддхуппа̄де капилаваттхунагаре сакйара̄джакуле ниббаттитва̄ кимилоти тасса на̄мам̣ ака̄си. со вайаппатто бхогасампаттийа̄ паматто вихарати. тасса н̃а̄н̣апарипа̄кам̣ н̃атва̄ сам̣вегаджананаттхам̣ анупийа̄йам̣ вихаранто саттха̄ пат̣хамайоббане т̣хитам̣ раман̣ӣйам̣ иттхирӯпам̣ абхинимминитва̄ пурато дассетва̄ пуна ануккамена йатха̄ джара̄рогавипаттӣхи абхибхӯта̄ диссати, татха̄ ака̄си. там̣ дисва̄ кимилакума̄ро ативийа сам̣вегаджа̄то аттано сам̣вегам̣ пака̄сенто бхагавато па̄кат̣ам̣ катва̄ ладдха̄нуса̄сано арахаттам̣ па̄пун̣и.

42. со арахаттам̣ патва̄ соманассаджа̄то аттано пуббачарита̄пада̄нам̣ пака̄сенто ниббуте какусандхамхӣтиа̄дима̄ха. бра̄хман̣амхи вусӣматӣти пан̃чахи васита̄хи васиппаттамхи бхагавати. бра̄хман̣асса саббагун̣аган̣ехи ман̣д̣итатта̄ абхивӯл̣хӣтатта̄ бра̄хман̣амхи какусандхе бхагавати париниббутети аттхо. сесам̣ саббам̣ утта̄намева̄ти.

кимилаттхераапада̄наван̣н̣ана̄ саматта̄.