9. субхаддаттхераапада̄наван̣н̣ана̄

падумуттаро локавидӯтиа̄дикам̣ а̄йасмато субхаддаттхерасса апада̄нам̣. айампи пуримабуддхесу ката̄дхика̄ро таттха таттха бхаве нибба̄на̄дхигаманаттха̄йа пун̃н̃а̄ни упачинанто падумуттарасса бхагавато ка̄ле вибхавасампанне саддха̄сампанне екасмим̣ кулагехе ниббато вин̃н̃утам̣ патва̄ гхарабандханена баддхо ратанаттайе пасанно паринибба̄наман̃че нипаннам̣ падумуттарам̣ бхагавантам̣ дисва̄ саннипатита̄ дасасахассачаккава̄л̣адевата̄йо ча дисва̄ пасаннама̄насо ниггун̣д̣икет̣аканӣлака̄сока̄сита̄дианекехи сугандхапуппхехи пӯджеси. со тена пун̃н̃акаммена йа̄вата̄йукам̣ т̣хатва̄ тато чавитва̄ тусита̄дӣсу диббасампаттийо анубхавитва̄ тато мануссесу мануссасампаттийо анубхавитва̄ ниббаттаниббаттат̣т̣ха̄несу ча сугандхехи пуппхехи пӯджито ахоси. имасмим̣ пана буддхуппа̄де екасмим̣ вибхавасампанне куле ниббаттитва̄ вин̃н̃утам̣ патто ка̄месу а̄дӣнавам̣ дисва̄пи йа̄ва буддхасса бхагавато паринибба̄нака̄ло та̄ва аладдхабуддхадассано бхагавато паринибба̄наман̃че нипаннака̄лейева паббаджитва̄ арахаттам̣ па̄пун̣и. пуббе катапун̃н̃ана̄мена субхаддоти па̄кат̣о ахоси.

101. со аттано пуббакаммам̣ саритва̄ соманассавасена пуббачарита̄пада̄нам̣ пака̄сенто падумуттаро локавидӯтиа̄дима̄ха. там̣ утта̄наттхамева. сун̣а̄тха мама бха̄сато…пе… нибба̄йиссатина̄савоти идам̣ паринибба̄наман̃че нипаннова падумуттаро бхагава̄ бйа̄ка̄си.

пан̃чамабха̄н̣ава̄раван̣н̣ана̄ саматта̄.

115. со аттано пат̣ипаттим̣ дассенто пуббакаммена сам̣йуттотиа̄дима̄ха. екагготи екаггачитто. сусама̄хитоти сут̣т̣ху сама̄хито, сантака̄йачиттоти аттхо. буддхасса орасо путтоти буддхасса ураса̄ хадайена ниггатаова̄да̄нуса̄саним̣ сутва̄ паттаарахаттапхалоти аттхо. дхаммаджомхи суниммитоти дхаммато каммат̣т̣ха̄надхаммато джа̄то арийа̄йа джа̄тийа̄ суниммито сут̣т̣ху ниппха̄дитасаббакиччо амхи бхава̄мӣти аттхо.

116. дхаммара̄джам̣ упагамма̄ти дхаммена саббасатта̄нам̣ ра̄джа̄нам̣ иссарабхӯтам̣ бхагавантам̣ упагантва̄ самӣпам̣ гантва̄ти аттхо. апуччхим̣ пан̃хамуттаманти уттамам̣ кхандха̄йатанадха̄тусаччасамуппа̄да̄дипат̣исам̣йуттам̣ пан̃хам̣ апуччхинти аттхо. катхайанто ча ме пан̃ханти есо амха̄кам̣ бхагава̄ ме майхам̣ пан̃хам̣ катхайанто бйа̄каронто. дхаммасотам̣ упа̄найӣти анупа̄дисесанибба̄надха̄тусан̇кха̄там̣ дхаммасотам̣ дхаммапава̄хам̣ упа̄найи па̄висӣти аттхо.

118. джаладжуттамана̄йакоти падумуттарана̄мако ма-ка̄расса йа-ка̄рам̣ катва̄ катавоха̄ро. нибба̄йи анупа̄да̄ноти упа̄да̄не пан̃чаккхандхе аггахетва̄ нибба̄йи на пан̃н̃а̄йи адассанам̣ агама̄си, мануссалока̄дӣсу каттхачипи апатит̣т̣хитоти аттхо. дӣпова теласан̇кхайа̄ти ват̣т̣итела̄нам̣ сан̇кхайа̄ абха̄ва̄ падӣпо ива нибба̄йӣти самбандхо.

119. саттайоджаникам̣ а̄сӣти тасса париниббутасса падумуттарасса бхагавато ратанамайам̣ тхӯпам̣ саттайоджануббедхам̣ а̄си ахосӣти аттхо. дхаджам̣ таттха апӯджесинти таттха тасмим̣ четийе саббабхаддам̣ саббато бхаддам̣ саббасо манорамам̣ дхаджам̣ пӯджесинти аттхо.

120. кассапасса ча буддхасса̄ти падумуттарасса бхагавато ка̄лато пат̣т̣ха̄йа а̄гатасса девамануссесу сам̣сарато ме майхам̣ орасо путто тиссо на̄ма кассапасса самма̄самбуддхасса аггаса̄вако джинаса̄сане буддхаса̄сане да̄йа̄до а̄си ахосӣти самбандхо.

121. тасса хӣнена манаса̄ти тасса мама путтасса тиссасса аггаса̄вакасса хӣнена ла̄макена манаса̄ читтена абхаддакам̣ асундарам̣ айуттакам̣ ‘‘антако паччхимо’’ти ва̄чам̣ вачанам̣ абха̄сим̣ катхесинти аттхо. тена каммавипа̄кена̄ти тена арахантабхаккха̄насан̇кха̄тасса акусалакаммасса випа̄кена. паччхиме аддасам̣ джинанти паччхиме парийоса̄не паринибба̄нака̄ле малла̄нам̣ упаваттане са̄лаване паринибба̄наман̃че нипаннам̣ джинам̣ джитасаббама̄рам̣ амха̄кам̣ готамасамма̄самбуддхам̣ аддасам̣ аханти аттхо. ‘‘паччха̄ ме а̄си бхаддака’’нтипи па̄т̣хо. тасса паччха̄ тасса бхагавато аваса̄нака̄ле нибба̄на̄саннака̄ле ме майхам̣ бхаддакам̣ сундарам̣ чатусаччапат̣ивиджджханам̣ а̄си ахосӣти аттхо.

122. пабба̄джеси маха̄вӣроти маха̄вӣрийо саббасаттахито карун̣а̄йутто джитама̄ро муни малла̄нам̣ упаваттане са̄лаване паччхиме сайане паринибба̄наман̃че сайитова мам̣ пабба̄джесӣти самбандхо.

123. аджджева да̄ни паббаджджа̄ти аджджа ева бхагавато паринибба̄надивасейева мама паббаджджа̄, татха̄ аджджа ева упасампада̄, аджджа ева двипадуттамасса саммукха̄ паринибба̄нам̣ ахосӣти самбандхо. сесам̣ сувин̃н̃еййамева̄ти.

субхаддаттхераапада̄наван̣н̣ана̄ саматта̄.